അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മലപ്പുറം: ബസ് ഓടിക്കുന്നതിനിടെ മൊബൈല്‍ ഫോണ്‍ ഉപയോഗിച്ചതിന് കെഎസ്ആര്‍ടിസി ബസ് ഡ്രൈവര്‍ക്കെതിരെ നടപടി. ബസ് ഡ്രൈവറുടെ ലൈസന്‍സ് സസ്പെന്‍ഡ് ചെയ്തു. കോഴിക്കോട് തിരുവമ്പാടി സ്വദേശിയായ കെഎസ്ആര്‍ടിസി ഡ്രൈവര്‍ അബ്ദുള്‍ അസീസിന്‍റെ ലൈസന്‍സ് ആണ് പൊന്നാനി എംവിഡി ആറു മാസത്തേക്ക് സസ്പെന്‍ഡ് ചെയ്തത്.
പൊന്നാനി-തിരൂര്‍ യാത്രക്കിടെയാണ് സംഭവം. കെഎസ്ആര്‍ടിസി ബസ് ഓടിക്കുന്നതിന്‍റെ ഇടയ്ക്ക് മൊബൈല്‍ ഫോണ്‍ ഉപയോഗിക്കുകയായിരുന്നു. ഡ്രൈവര്‍ മൊബൈല്‍ ഉപയോഗിക്കുന്നതിന്‍റെ ദൃശ്യങ്ങള്‍ ബസിലെ യാത്രക്കാരി പകര്‍ത്തിയിരുന്നു. ദൃശ്യങ്ങള്‍ ഉള്‍പ്പെടെ പുറത്തുവന്നതോടെയാണ് ഡ്രൈവര്‍ക്കെതിരെ എംവിഡി നടപടിയെടുത്തത്.
കെ.എസ്.ആര്‍.ടി.സി. ബസുകള്‍ അപകടത്തില്‍ പെടുന്നത് പതിവായിരിക്കെയാണ് ഡ്രൈവറുടെ മൊബൈല്‍ ഉപയോഗ വീഡിയോ പുറത്ത് വന്നത്. ഡ്രൈവര്‍ മൊബൈല്‍ ഉപയോഗിക്കുന്നതിലുള്ള അമര്‍ഷം പങ്ക് വെക്കുന്ന സ്ത്രീയുടെ ശബ്ദരേഖയും പ്രചരിക്കുന്നുണ്ട്. യുവതിയായ യാത്രക്കാരിയുടെ മൊബൈല്‍ വാങ്ങിയാണ് ഡ്രൈവര്‍ ഉപയോഗിച്ചതെന്ന് ശബ്ദരേഖയില്‍ പറയുന്നുണ്ട്.
