നിങ്ങൾ ആർക്കെങ്കിലും പാർസൽ അയച്ചിട്ടുണ്ടോ

സാധാരണക്കാരായ വീട്ടമ്മമാർ മുതൽ ഐടി കമ്പനികളിൽ ലക്ഷങ്ങൾ ശമ്പളം വാങ്ങുന്ന എൻജിനീയർമാർ വരെ തട്ടിപ്പുകളിൽ കുടുങ്ങുന്നു. കേരളത്തിൽ നടക്കുന്ന ഓൺലൈൻ തട്ടിപ്പുകൾ ചിലതെല്ലാം വലിയ വാർത്തയാകുന്നതിനാൽ നമുക്ക് അറിയുന്നവയായിരിക്കും. എന്നാൽ മറ്റുചിലവ അത്ര വലിയ വാർത്തയാകാതെ പോകാറുണ്ട്. ചെറിയൊരു അധികവരുമാനം ആഗ്രഹിച്ച് ഓൺലൈനായി ജോലിക്ക് ശ്രമിക്കുന്നവർ പെട്ടുപോകുന്ന ചില തട്ടിപ്പുകളുണ്ട്. ഇവ വലിയ തുകകളാകില്ല എന്നതുകൊണ്ട് നാമത് വാർത്തയിലൂടെ അറിയാതെ പോകുന്നു. കേരളത്തിൽ ഇന്ന് നടന്നുകൊണ്ടിരിക്കുന്ന ഓൺലൈൻ തട്ടിപ്പുകൾ ഏതെല്ലാമെന്ന് ഒന്ന് അറിഞ്ഞിരിക്കാം. നമുക്കും നമ്മുടെ സുഹൃത്തുക്കൾക്കും ഈ സ്ഥിതി വരാതിരിക്കാൻ ശ്രദ്ധിക്കാം.

പ്രശസ്തരായ നിരവധി വയോധികർ അടക്കമുള്ളവർ കുടുങ്ങിയ ഒരു തട്ടിപ്പുരീതിയാണിത്. വ്യാജ പോലീസ് ഉദ്യോഗസ്ഥർ ചമഞ്ഞ് തട്ടിപ്പുകാർ വിളിക്കുന്നു. ഡിജിറ്റൽ അറസ്റ്റ് നടത്തിയതായി പ്രഖ്യാപിക്കുന്നു. ഓൺലൈൻ ചോദ്യം ചെയ്യൽ നടത്തുന്നു, ഭീഷണിപ്പെടുത്തുന്നു. പിടിയിലാകാതിരിക്കാൻ പണം ട്രാൻസ്ഫർ ചെയ്യാൻ ആവശ്യപ്പെടുന്നു. തട്ടിപ്പാണിത്. നമ്മുടെ പോലീസിനോ മറ്റേതെങ്കിലും അന്വേഷണ ഏജൻസിക്കോ ഡിജിറ്റൽ അറസ്റ്റ് പരിപാടിയോ, ഓൺലൈൻ ചോദ്യം ചെയ്യലോ ഒന്നുമില്ല.

ടെലിഫോൺ റെഗുലേറ്ററി അതോരിറ്റിയായ ട്രായിൽ (TRAI) നിന്നും ഉള്ളവരാണെന്ന് അവകാശപ്പെട്ട് ചിലർ വിളിക്കുകയോ മെസ്സേജ് അയയ്ക്കുകയോ ചെയ്യുന്നു. ഇവർ, നിങ്ങളുടെ മൊബൈൽ നമ്പർ നിയമവിരുദ്ധ പ്രവർത്തനങ്ങൾക്ക് ഉപയോഗിച്ചിട്ടുണ്ടെന്ന് പേടിപ്പിക്കുകയാണ് ചെയ്യുക. മൊബൈൽ നമ്പർ നഷ്ടമാകാതിരിക്കാൻ മെസ്സേജിലുള്ള ലിങ്കിൽ ക്ലിക്ക് ചെയ്യാൻ ആവശ്യപ്പെടും. ഒരു കാരണവശാലും ക്ലിക്ക് ചെയ്യരുത്. തട്ടിപ്പാണത്. ടെലികോം കമ്പനികളാണ് സേവനങ്ങൾ നിർത്തി വെയ്ക്കുന്നത്. TRAI അല്ല.

ഇപ്പോൾ വളരെ വ്യാപകമായി നടക്കുന്ന ഒരു തട്ടിപ്പാണിത്. നിങ്ങൾ ഏതെങ്കിലും പാർസൽ ആർക്കെങ്കിലും അയച്ചിട്ടുണ്ടെങ്കിലോ, നിങ്ങൾക്ക് ആരോങ്കിലും പാർസൽ അയച്ചിട്ടുണ്ടെങ്കിലോ അത് മനസ്സിലാക്കിയാണ് തട്ടിപ്പുകാർ വിളിക്കുക. നിരോധിതവസ്തുക്കൾ അടങ്ങിയ ഒരു പാഴ്സൽ കസ്റ്റംസ് തടഞ്ഞിരിക്കുന്നുവെന്ന് തട്ടിപ്പുകാർ പറയും. കേസിൽ നിന്ന് രക്ഷപ്പെടാൻ നിങ്ങളോട് പണമടയ്ക്കാൻ ആവശ്യപ്പെടുകയും ചെയ്യും. തട്ടിപ്പാണത്, കുടുങ്ങരുത്.