ആരോഗ്യത്തോടെയിരിക്കാന്‍ നിര്‍ബന്ധമായും ചെയ്യേണ്ട ഒന്നാണ് ധാരാളം വെള്ളം കുടിക്കുക എന്നത്. ഏത് പ്രായത്തിലുള്ള ആളാണെങ്കിലും ജലാംശം നിലനിര്‍ത്താനും നല്ല ചര്‍മ്മം നേടാനും ആരോഗ്യകരമായ ഭാരം നിലനിര്‍ത്താനുമുള്ള ഏറ്റവും നല്ല മാര്‍ഗം വെള്ളം കുടിക്കുക എന്നതാണ്. ദിവസേന ഒരാള്‍ എട്ട് ഗ്ലാസ് വെള്ളമെങ്കിലും കുടിച്ചിരിക്കണം. ദഹനം, രക്തചംക്രമണം, താപനിലയുടെ നിയന്ത്രണം, വിഷാംശങ്ങളെ നീക്കൽ തുടങ്ങി ശരീരത്തിന്റെ വിവിധ പ്രവർത്തനങ്ങൾക്ക് വെള്ളം ശരീരത്തിൽ ഉണ്ടാകേണ്ടതുണ്ട്. രാവിലെ വെറുംവയറ്റിൽ വെള്ളം കുടിക്കുന്നതിന് ആരോഗ്യഗുണങ്ങൾ ഏറെയുണ്ട്. മണിക്കൂറുകളോളം ഉറങ്ങിയ ശേഷം എഴുന്നേൽക്കുമ്പോൾ ശരീരത്തിന്റെ ജലാംശം ഉണ്ടാവില്ല. രാവിലെ വെള്ളം കുടിക്കുന്നത് ശരീരത്തിൽ ജലാംശം ഉണ്ടാകാൻ സഹായിക്കും. ശരീരത്തിന്റെ പ്രവർത്തനങ്ങൾ ഫലപ്രദമായി നടക്കുകയും ചെയ്യും. രാവിലെ വെള്ളം കുടിക്കുന്നതു മൂലം ഉപാപചയപ്രവർത്തനം 30 ശതമാനം വരെ വർധിക്കുന്നു. ഇത് പകൽമുഴുവൻ കൂടുതൽ കാലറി കത്തിക്കാൻ സഹായിക്കും. ഇത് ശരീരഭാരം നിയന്ത്രിക്കാനും ഊർജം നിലനിർത്താനും സഹായിക്കും.
രാത്രിയിൽ ശരീരം അതിന്റെ കേടുപാടുകൾ പരിഹരിക്കുകയാവും, ഈ സമയത്ത് ശരീരത്തിൽ വിഷാംശം (toxins) അടിഞ്ഞുകൂടും. രാവിലെ വെറുംവയറ്റിൽ വെള്ളം കുടിക്കുന്നത് ഈ വിഷാംശങ്ങളെ നീക്കും. വൃക്കകളുടെ മെച്ചപ്പെട്ട പ്രവർത്തനത്തിനും ഇത് സഹായിക്കും. രാവിലെ വെള്ളം കുടിക്കുന്നത് ദഹനവ്യവസ്ഥയെ ആരോഗ്യമുള്ളതാക്കും. ദഹനപ്രക്രിയ മെച്ചപ്പെടുകയും മലബന്ധം തടയുകയും ചെയ്യും. ദിവസം മുഴുവൻ പോഷകങ്ങളുടെ മെച്ചപ്പെട്ട ആഗിരണത്തിനും വെള്ളം കുടി സഹായിക്കും. ആരോഗ്യമുള്ള ചർമത്തിന് ശരീരത്തില്‍ ജലാംശം നിലനിർത്തേണ്ടത് ആവശ്യമാണ്. രാവിലെ വെള്ളം കുടിക്കുന്നത് ചർമത്തിന്റെ ഇലാസ്തികത നിലനിർത്താൻ സഹായിക്കും. ചർമത്തിൽ ചുളിവുകൾ വരുന്നത് കുറയ്ക്കുകയും ചർമത്തിന് തിളക്കമേകുകയും ചെയ്യും. തലച്ചോറിന്റെ 75 ശതമാനവും വെള്ളമാണ്. നിർജലീകരണം ബൗദ്ധികപ്രവർത്തനങ്ങളെ തകരാറിലാക്കും. രാവിലെ വെറുംവയറ്റിൽ വെള്ളം കുടിക്കുന്നത് ഏകാഗ്രത വർധിപ്പിക്കാനും ഓർമശക്തി മെച്ചപ്പെടുത്താനും സഹായിക്കും.
നിർജലീകരണം, കടുത്ത ക്ഷീണത്തിനും മൂഡ്സ്വിങ്സിനും കാരണമാകും. രാവിലെ വെറും വയറ്റിൽ വെള്ളം കുടിക്കുന്നത് ശരീരത്തിൽ ജലാംശം നിലനിർത്താനും ഊർജനില വർധിപ്പിക്കാനും മൂഡ് മെച്ചപ്പെടുത്താനും സഹായിക്കും. ഉന്മേഷത്തോടെ ദിവസം തുടങ്ങാനും ഇത് സഹായിക്കും. ശരീരത്തിൽ ജലാംശം ധാരാളം ഉള്ളത് ലിംഫാറ്റിക് സിസ്റ്റത്തിന്റെ സന്തുലനത്തിന് സഹായകമാണ്. ആരോഗ്യകരമായ ഒരു രോഗപ്രതിരോധ സംവിധാനത്തിന് ഇതാവശ്യമാണ്. രാവിലെ വെള്ളം കുടിക്കുന്നത് ലിംഫ് ഫ്ലൂയ്ഡുകളുടെ സർക്കുലേഷന് സഹായിക്കുന്നു. ഒപ്പം വിഷാംശങ്ങളെ നീക്കുന്നതിനും ഇമ്മ്യൂൺ ഡിഫൻസിനും ഇത് സഹായിക്കും. രാവിലെ ആവശ്യത്തിന് ജലാംശം ശരീരത്തിലെത്തുന്നത് ഹൃദയത്തിനുള്ള സമ്മർദം കുറയ്ക്കുന്നു. ഇത് രക്തസമ്മർദത്തിന്റെ അളവ് ആരോഗ്യകരമായി നിലനിർത്താനും രക്തചംക്രമണം മെച്ചപ്പെടുത്താനും സഹായിക്കുന്നു. ഇതോടൊപ്പം പ്രധാനപ്പെട്ട അവയവങ്ങളിലേക്ക് ഓക്സിജനും പോഷകങ്ങളും എത്തുന്നതിനും ഹൃദയസംബന്ധമായ രോഗങ്ങൾക്കുള്ള സാധ്യത കുറയ്ക്കാനും സഹായിക്കുന്നു. രാവിലെ വെള്ളം കുടിച്ച് ദിവസം തുടങ്ങുന്നത് വഴി ദിവസം മുഴുവൻ ശരീരം നന്നായി പ്രവർത്തിക്കാനും ആരോഗ്യവും സൗഖ്യവും നിലനിർത്താനും സഹായിക്കും. വെള്ളം സ്വാഭാവികമായും വിശപ്പ് കുറയ്ക്കും. രാവിലെ മുതൽ തുടങ്ങി ഓരോ ഭക്ഷണത്തിനും മുൻപായി വെള്ളം കുടിക്കുന്നത് വിശപ്പ് നിയന്ത്രിക്കാനും അമിതമായി ഭക്ഷണം കഴിക്കുന്നത് തടയാനും സഹായിക്കും. ശരീരഭാരം കുറയ്ക്കാനും ഇതുവഴി സാധിക്കും.