വെട്രിമാരൻ ചിത്രം വിടുതലൈ 2വിലെ ആദ്യഗാനം റിലീസ് ചെയ്തു. ഇളയരാജ സംഗീതം നൽകിയ ഗാനത്തിന്റെ ലിറിക്കൽ വീഡിയോയാണ് പുറത്തുവന്നിരിക്കുന്നത്. ഇളയരാജയും അനന്യ ഭട്ടും ചേർന്ന് ആലപിച്ച ഗാനത്തിന് വരികൾ എഴുതിയതും ഇളയരാജയാണ്. വിജയ് സേതുപതിയും മഞ്ജുവാര്യരും നായികാനായകന്മാരായി എത്തുന്ന ചിത്രത്തിലെ ഇവരുടെ ലുക്കും ഗാനരംഗത്ത് ഉൾക്കൊള്ളിച്ചിട്ടുണ്ട്. മുടി മുറിച്ചാണ് ഗാനരംഗത്തിൽ മഞ്ജു വാര്യരുള്ളത്. രണ്ടുപേരും പ്രണയാർദ്രമായി നോക്കുന്നതാണ് രംഗം.
ചിത്രത്തിന്റെ ആദ്യഭാഗം കഴി‍ഞ്ഞ വര്‍ഷം മാര്‍ച്ചിലാണ് റിലീസ് ചെയ്തത്. 1987 കാലഘട്ടത്തെ പശ്ചാത്തലമാക്കി ഒരുക്കിയ ഒരു പിരിഡ് ക്രൈം ത്രില്ലറായിരുന്നു വിടുതലൈ. വിടുതലൈ 2വിൽ വിജയ് സേതുപതിക്കും മഞ്ജു വാര്യരിനും പുറമെ സൂരിയും പ്രധാന വേഷത്തിൽ എത്തുന്നുണ്ട്. ഡിസംബർ 20ന് ചിത്രം തിയറ്ററുകളിലേക്കെത്തും. വെട്രിമാരൻ സംവിധാനം ചെയ്യുന്ന ചിത്രത്തിൽ അനുരാഗ് കശ്യപ്, കിഷോർ, ഗൗതം വസുദേവ് മേനോൻ, രാജീവ് മേനോൻ, ചേതൻ എന്നിവരാണ് മറ്റ് പ്രധാന വേഷങ്ങളിൽ അഭിനയിക്കുന്നത്.