കാത്തിരിപ്പിന് വിരാമമിട്ട് മോഹൻലാൽ ആരാധകർക്ക് നൂറ് ശതമാനം സംതൃപ്തി നൽകിക്കൊണ്ട് ബറോസിന്‍റെ ട്രെയിലര്‍ എത്തി. മോഹൻലാൽ ആദ്യമായി സംവിധാനം ചെയ്യുന്ന ചിത്രമാണ് ബറോസ്. ത്രീ ഡി ഓൺലൈൻ ട്രെയിലറാണ് ഇപ്പോൾ റിലീസ് ചെയ്തിരിക്കുന്നത്. അഞ്ചു വര്‍ഷം നീണ്ട നീണ്ട കാത്തിരിപ്പിന് ഒടുവിലാണ് ചിത്രത്തിന്റെ ട്രെയിലർ എത്തിയിരിക്കുന്നത്. മോഹൻലാലിന്റെ തന്നെ ഔദ്യോഗിക ഫേസ്ബുക്ക് പേജിലൂടെയാണ് ട്രെയിലർ പുറത്തുവിട്ടത്. ആരാധകരെ കോരിത്തരിപ്പിക്കുന്ന ദൃശ്യവിസ്മയങ്ങളാണ് ആദ്യ സംവിധാനത്തിൽ മോഹൻലാൽ ഒരുക്കിയിരിക്കുന്നതെന്ന് വ്യക്തമാക്കുന്നതാണ് ട്രെയിലർ. ഇന്ത്യയിലെ തന്നെ ആദ്യ ത്രീഡി ചിത്രമായ മൈഡിയർ കുട്ടിച്ചാത്തന്റെ സംവിധായകൻ ജിജോയുടെ കഥയെ ആസ്പദമാക്കിയാണ് സിനിമ ഒരുങ്ങുന്നത്. ഡിഗാമയുടെ നിധി കാക്കുന്ന ബറോസ് എന്ന ഭൂതമായി മോഹന്‍ലാല്‍ തന്നെയാണ് പ്രധാന കഥാപാത്രത്തെ ചിത്രത്തിൽ അവതരിപ്പിക്കുന്നത്. ചിത്രത്തിൽ വിദേശതാരങ്ങളും വേഷമിടുന്നുണ്ട്. ഒക്ടോബർ മൂന്നിനായിരുന്നു ആദ്യം സിനിമയുടെ റിലീസ് പ്രഖ്യാപിച്ചിരുന്നതെങ്കിലും വിഎഫ്എക്സ് വർക്കുകളും ഐ മാക്സ് പതിപ്പും പൂർത്തിയാകാത്തതിനാൽ റിലീസ് നീട്ടിവെക്കുകയായിരുന്നു. ക്രിസ്മസ് റീലായി ഡിസംബർ 25നായിരിക്കും ചിത്രം തിയേറ്ററുകളിൽ എത്തുക. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് ബറോസ് നിർമ്മിക്കുന്നത്.