അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഹിന്ദുജ ഗ്രൂപ്പിൻ്റെ പിന്തുണയുള്ള ഇൻഡസ്ഇൻഡ് ഇൻ്റർനാഷണൽ ഏകദേശം 10,000 കോടി രൂപക്കാണ് കമ്പനി ഏറ്റെടുക്കാൻ താൽപ്പര്യം പ്രകടിപ്പിച്ചിരിക്കുന്നത്. പാപ്പരത്വ നടപടികൾ നേരിടുന്ന റിലയൻസ് കാപിറ്റൽ ഏറ്റെടുക്കാൻ കഴിഞ്ഞ വർഷമാണ് ഇൻഡസ്ഇൻഡ് താൽപ്പര്യം പ്രകടിപ്പിച്ചത്. കമ്പനിയുടെ റെസലൂഷൻ പ്ലാനിന് 2023-ൽ ക്രെഡിറ്റേഴ്‌സ് പാനലിൻ്റെ 99.6 ശതമാനം ഭൂരിപക്ഷ വോട്ടുകളും ലഭിച്ചിരുന്നു.
ഇൻഡസ്ഇൻഡ് ഇൻ്റർനാഷണലിന് റിലയൻസ് ക്യാപിറ്റൽ ഏറ്റെടുക്കുന്നതിന് എല്ലാ ഡിപിഐഐടി ക്ലിയറൻസുകളും ലഭിച്ചതായി റിപ്പോർട്ടുകളുണ്ട്. ഇൻഡസ്ഇൻഡ് ഇൻ്റർനാഷണലിനെ നിയന്ത്രിക്കുന്നത് ഹിന്ദുജ കുടുംബമാണ്. കഴിഞ്ഞ വർഷം റിലയൻസ് ക്യാപിറ്റൽ വായ്പാദാതാക്കൾ 10,000 കോടി രൂപയുടെ ഇൻഡസ്ഇൻഡിൻ്റെ ഏറ്റെടുക്കൽ പ്ലാനിന് അനുമതി നൽകിയിരുന്നു. 2021 ഡിസംബറിലാണ് റിസർവ് ബാങ്ക് ഓഫ് ഇന്ത്യ റിലയൻസ് ക്യാപിറ്റലിലെ പാപ്പരത്വ നടപടികൾ ആരംഭിച്ചത്.
റിലയൻസ് ക്യാപിറ്റൽ ഏറ്റെടുക്കാനുള്ള ഇൻഡസ്ഇൻഡിൻ്റെ ശ്രമത്തിന് അഹമ്മദാബാദിലെ ടോറൻ്റ് ഇൻവെസ്റ്റ്‌മെൻ്റ്‌സ് ആയിരുന്നു എതിരാളി. എന്നാൽ പിന്നീട് ഇൻഡസ് ഇൻഡിന് തന്നെ മുൻതൂക്കം ലഭിക്കുകയായിരുന്നു. കമ്പനി ഇതിനോടകം 3,000 കോടി രൂപ റിലയൻസ് ക്യാപിറ്റലിൻ്റെ വായ്പാ ദാതാക്കൾക്ക് നൽകിയിട്ടുണ്ട്.
ഇൻഡസ്ഇൻഡ് ഇൻ്റർനാഷണൽ റിലയൻസ് ഔപചാരികമായി ഏറ്റെടുക്കുന്നതിന് മുമ്പ് ബാക്കിയുള്ള 6,500 കോടി രൂപ കൂടെ നൽകുമെന്നാണ് സൂചന. 2021-ൽ 40,000 കോടി രൂപയുടെ കടബാധ്യതകളാണ് റിലയൻസ് കാപിറ്റലിനുണ്ടായിരുന്നത്. 2023 ജൂലൈയിൽ ഹിന്ദുജ ഗ്രൂപ്പിൻ്റെ ബിഡ് വായ്പാദാതാക്കൾ അംഗീകരിക്കുകയായിരുന്നു. വായ്പ ഏറ്റെടുക്കലും ഫണ്ടിംഗും ഉൾപ്പെടെയാണ് 9,650 കോടി രൂപയുടെ ഏറ്റെടുക്കൽ.
എൻസിഡി വഴി 7,300 കോടി രൂപ സമാഹരിക്കാൻ ഹിന്ദുജ ഗ്രൂപ്പ് പദ്ധതിയിടുന്നുണ്ട്.
