ഏറെക്കാലത്തെ പ്രണയത്തിനൊടുവിൽ ഇക്കഴിഞ്ഞ സെപ്റ്റംബർ മാസത്തിലായിരുന്നു നടി അദിതി റാവു ഹൈദരിയും നടൻ സിദ്ധാർഥും വിവാഹിതരായത്. വിവാഹത്തിന്റെ ചിത്രങ്ങൾ നവംബർ ആദ്യവാരം താരങ്ങൾ ആരാധകരുമായി പങ്കുവച്ചിരുന്നു. വളരെ സിപിളും സുന്ദരവുമായ ചിത്രങ്ങള്‍ വളരെ വേഗം തന്നെ സോഷ്യല്‍ മീഡിയയില്‍ വൈറലാവുകയും ചെയ്തിരുന്നു. ഇപ്പോഴിതാ വിവാഹ ചടങ്ങുകളിലെ ഏറ്റവും മനോഹരമായ കൂടുതൽ ചിത്രങ്ങൾ സാമൂഹികമാധ്യമങ്ങളിൽ പങ്കുവെച്ചിരിക്കുകയാണ് താരങ്ങൾ.
ചുവന്ന സബ്യസാചി ലെഹങ്കയിൽ, മുടി പിന്നിലേക്ക് കെട്ടിയിട്ട് യോജിച്ച ആഭരണങ്ങളുമായി അതിമനോഹരിയായിരുന്നു അതിഥി. സിദ്ധാർത്ഥ് വെള്ള ഷർവാണിയാണ് ചടങ്ങിനായി തിരഞ്ഞെടുത്തത്. വരമാല അണിഞ്ഞ് താലി ചാർത്തുന്ന ചിത്രങ്ങളടക്കം ആരാധകർ ഏറ്റെടുത്തുക്കഴിഞ്ഞു. സൗന്ദര്യത്തിൻ്റെ രാജ്ഞി, ഒരു മണിരത്‌നം പ്രണയ സിനിമ തുടങ്ങി എന്നിങ്ങനെ നിരവധി കമന്റുകളാണ് ചിത്രത്തിന് ലഭിക്കുന്നത്.
സെപ്റ്റംബർ 16-ന് തെലങ്കാനയിലെ വനപർത്ഥിയിലെ ശ്രീരംഗപുരത്തെ 400 വർഷം പഴക്കമുള്ള ശ്രീരംഗനായക സ്വാമി ക്ഷേത്രത്തിൽ വെച്ചായിരുന്നു വിവാഹം. 2021-ൽ പുറത്തിറങ്ങിയ ‘മഹാസമുദ്രം’ എന്ന സിനിമയിലൂടെയാണ് ഇരുവരും ആദ്യമായി ഒന്നിക്കുന്നത്. ആ സിനിമയുടെ സെറ്റിൽ നിന്നായിരുന്നു ഇരുവരുടെയും പ്രണയം തുടങ്ങിയതും.
STORY HIGHLIGHT: wedding photos of aditi rao hydari and siddharth