അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സൗത്ത് ഡല്ഹിയില് ദമ്പതിമാരെയും മകളെയും വീട്ടില് മരിച്ചനിലയില് കണ്ടെത്തിയ സംഭവത്തില് വഴിത്തിരിവ്. മൂവരെയും കൊലപ്പെടുത്തിയത് ദമ്പതിമാരുടെ 20 വയസുള്ള മകനാണെന്നാണ് കണ്ടെത്തൽ. രാജേഷ് കുമാർ , ഭാര്യ കോമൾ, മകൾ കവിത എന്നിവരെയാണ് ഇന്നലെ രാവിലെ ഡൽഹിയിലെ നെബ് സരായിലെ വീട്ടിലാണ് മരിച്ച നിലയിൽ കണ്ടെത്തയത്. ഇന്നലെ ദമ്പതികളുടെ വിവാഹ വാർഷിക ദിനമായിരുന്നു. രാവിലത്തെ പതിവു നടത്തം കഴിഞ്ഞു മടങ്ങിയെത്തിയ മകൻ അർജുനാണ് സംഭവം പൊലീസിനെ വിളിച്ച് അറിയിച്ചത്.
പോലീസിന്റെ തുടർന്നുള്ള അന്വേഷണത്തിലാണ് ബോക്സറായ അർജുൻ സ്വന്തം കുടുംബത്തിന്റെ കൊലയാളിയായി മാറിയ ഭീകര കഥ പുറത്തുവരുന്നത്. കുറ്റകൃത്യം നടന്ന സ്ഥലത്ത് മോഷണങ്ങളൊന്നും നടന്നിട്ടില്ലെന്നു പൊലീസ് കണ്ടെത്തിയിരുന്നു. പ്രദേശത്തെ സിസിടിവി ദൃശ്യങ്ങൾ പരിശോധിച്ചപ്പോഴും സംശയാസ്പദമായ ഒന്നും കണ്ടെത്തിയില്ല. ഇതോടെയാണ് പൊലീസിന്റെ ചോദ്യങ്ങൾ ദമ്പതികളുടെ മകനായ അർജുനിലേക്ക് തിരിഞ്ഞത്. അന്വേഷണത്തെ വഴിതെറ്റിക്കാനാണ് അർജുൻ ആദ്യം ശ്രമിച്ചതെന്നും എന്നാൽ ചോദ്യം ചെയ്യലിൽ പൊട്ടിത്തെറിച്ച ഇയാൾ ഒടുവിൽ കുറ്റം സമ്മതിക്കുകയായിരുന്നുവെന്നും പൊലീസ് പറഞ്ഞു.
പരിശീലനം ലഭിച്ച സംസ്ഥാനതല ബോക്സറായ അർജുൻ ബിരുദ വിദ്യാർഥിയാണ്. തന്റെ പിതാവ് നന്നായി പഠിക്കാത്തതിനു തന്നെ ശകാരിക്കുകയും മർദിക്കുകയും ചെയ്തുവെന്നാണ് അർജുൻ പൊലീസിനോട് പറഞ്ഞത്. മറ്റുള്ളവരുടെ മുന്നിൽ വച്ചുള്ള ശകാരം അപമാനിതനാക്കി. വീട്ടില് ആരും പിന്തുണയ്ക്കാത്തതിനാൽ പിതാവിനോടും കുടുംബാംഗങ്ങളോടും കടുത്ത പക ഉണ്ടാക്കിയിരുന്നു. അവഗണനയും ഒറ്റപ്പെടലും അനുഭവപ്പെട്ടു. സഹോദരി കവിതയ്ക്ക് സ്വത്ത് വിട്ടുനൽകാൻ പിതാവ് തീരുമാനിച്ചതായി അടുത്തിടെയാണ് താൻ അറിഞ്ഞതെന്നും അർജുൻ പൊലീസിനോട് പറഞ്ഞു.
രാവിലെ ഉറക്കത്തിലായിരുന്ന ഇരുവരെയും സഹോദരിയെയും കത്തികൊണ്ട് കുത്തി കൊലപ്പെടുത്തിയെന്നും അർജുൻ പൊലീസിനോട് പറഞ്ഞു.
STORY HIGHLIGHT: son kills family delhi
