ഒരു വീടു പണിയുന്നത് എത്ര ബുദ്ധിമുട്ടുള്ള കാര്യമാണെന്ന് വീടു പണിതവര്‍ക്കെല്ലാം അറിയാം. എല്ലാ മനുഷ്യരുടെയും സ്വപ്നമാണ് സ്വന്തമായി നല്ലൊരു വീട്. ലാഘവത്തോടെ സമീപിക്കേണ്ട ഒന്നല്ല വീടുപണി. ‘ഹോം’ പണിയുംമുമ്പ് അതിനെക്കുറിച്ചുള്ള ‘ഹോംവര്‍ക്ക്’ തീര്‍ച്ചയായും ചെയ്തിരിക്കണം. വീട് പണിയുമ്പോള്‍ ശ്രദ്ധിക്കേണ്ട ചില കാര്യങ്ങളുണ്ട്. വീട് പണി തുടങ്ങുന്നതിനുമുമ്പ് ആ സ്ഥലം നന്നായി സ്റ്റഡി ചെയ്തതിനു ശേഷം മാത്രം പ്ലാന്‍ തയാറാക്കുക.
കേരളത്തിലെ ഭൂപ്രകൃതിയനുസരിച്ച് തട്ടുതട്ടുകളായിട്ടുള്ള പ്ലോട്ടുകളും ശരിയായ ആകൃതിയില്ലാത്തതുമായ പ്ലോട്ടുകളും വീട് നിര്‍മിക്കാനായി തിരഞ്ഞെടുക്കേണ്ടി വരാറുണ്ട്. അങ്ങനെയുള്ളപ്പോള്‍ ആ പ്ലോട്ടിനു ചുറ്റും മതിലുകെട്ടി മണ്ണിട്ട് നികത്തിയെടുക്കാറുണ്ട്. പക്ഷേ എല്ലായിടത്തും അങ്ങനെ ചെയ്യേണ്ട കാര്യമില്ല. പ്ലോട്ട് എങ്ങനെയാണോ കിടക്കുന്നത് അതിനനുസരിച്ച് വീടിന്റെ പ്ലാന്‍ ചെയ്യുക എന്നതാണ് അടിസ്ഥാനപരമായ കാര്യം. അങ്ങനെ ചെയ്യുമ്പോള്‍ റീറ്റെയിനിങ് വോള്‍, എര്‍ത്ത് ഫില്ലിങ് തുടങ്ങിയ കാര്യങ്ങള്‍ ഒഴിവാക്കുന്നത് വഴി ചെലവ് കുറയ്ക്കാന്‍ സാധിക്കും.
അടുത്തത് പ്ലാന്‍ ചെയ്യുമ്പോള്‍ Space Utilization ഉറപ്പായിട്ടും ചെയ്യേണ്ട കാര്യമാണ്. നിര്‍മാണചെലവ് വളരെ കൂടിയ ഈ കാലഘട്ടത്തില്‍ ഓരോ സ്‌ക്വയര്‍ഫീറ്റും പ്രധാനപ്പെട്ടതാണ്. 2500/ സ്‌ക്വയര്‍ഫീറ്റ് ചെലവ് വരുകയാണെങ്കില്‍ അതില്‍ 1 സ്‌ക്വയര്‍ഫീറ്റ് ഒഴിവാക്കാന്‍ പറ്റുന്നതാണെങ്കില്‍ 2500 രൂപ സേവ് ചെയ്യാന്‍ സാധിക്കും. അങ്ങനെ 100 സ്‌ക്വയര്‍ ഫീറ്റാകുമ്പോള്‍ 2.5 ലക്ഷം രൂപ സേവ് െചയ്യാന്‍ സാധിക്കും. 2000 സ്‌ക്വയര്‍ ഫീറ്റ് വീട് നിര്‍മിക്കുകയാണെങ്കില്‍ 2000 സ്‌ക്വയര്‍ഫീറ്റും നമുക്ക് ഉപയോഗിക്കാന്‍ സാധിക്കുന്നതായിരിക്കണം. എങ്കില്‍ മാത്രമേ നമുക്ക് കോസ്റ്റ് കുറച്ചുകൊണ്ട് വീട് നിര്‍മിക്കാന്‍ സാധിക്കൂ.
അടുത്തഘട്ടം നമ്മുടെ പരിസരപ്രദേശത്ത് കിട്ടുന്നതും അഥവാ പുറത്തുനിന്ന് കൊണ്ടുവരേണ്ടതാണെങ്കില്‍ ട്രാന്‍സ്പോര്‍ട്ടേഷന്‍ ചാര്‍ജ് കുറച്ച് സാധനങ്ങള്‍ എങ്ങനെ എത്തിക്കാന്‍ പറ്റുമെന്നും ചിന്തിച്ച് നമ്മുടെ ബജറ്റിനനുസരിച്ച് സാധനങ്ങള്‍ തിരഞ്ഞെടുക്കാന്‍ ശ്രദ്ധിക്കുക. തടി ആവശ്യമാണെങ്കില്‍ നമുക്കു ചുറ്റുമുള്ള മരങ്ങള്‍ ഉപയോഗിക്കുക. ഫൗണ്ടേഷന്‍ സെലക്റ്റ് ചെയ്യുമ്പോള്‍ റോക്കാണ് കിട്ടാന്‍ സാധ്യതയെങ്കില്‍ റോക്ക് ഉപയോഗിക്കുക. ലാറ്ററൈറ്റ് ബ്ലോക്കാണ് കിട്ടുന്നതെങ്കില്‍ അതുപയോഗിക്കുക. ആ രീതിയില്‍ വേണം വീടിന്റെ പ്ലാന്‍ സെറ്റ് ചെയ്യാന്‍. ഒരുപാട് വെയ്റ്റ് കേറ്റാത്ത രീതിയിലാണെങ്കില്‍ വീടിന്റെ ബേസ്‌മെന്റ് മാറ്റാന്‍ സാധിക്കും. ഒരുപാട് വെയ്റ്റ് വരുന്ന സ്ഥലത്താണ് കോളംബീം യൂസ് ചെയ്യുന്നത്. മുകളിലത്തെ കോണ്‍ക്രീറ്റ് ഒഴിവാക്കി സ്ട്രക്ചര്‍ റൂഫ് ചെയ്താല്‍ ബേസ്‌മെന്റ് സ്‌ട്രോങ്ങ് ആയി ചെയ്യണമെന്നില്ല. ബേസ്‌മെന്റ് തൊട്ടേ അനാവശ്യ ചെലവ് കുറയ്ക്കാന്‍ സാധിക്കും.
പലരും കണ്‍സള്‍ട്ടന്റ് ഫീസ് കൊടുക്കണമെന്ന് കരുതി അവരെ ഒഴിവാക്കാറുണ്ട്. അങ്ങനെ ഒരിക്കലും ചെയ്യരുത്. കാരണം സാങ്കേതിക ജ്ഞാനമില്ലാത്ത ഒരാള്‍ വീടുപണിയുന്നതും നല്ല ഒരു കണ്‍സള്‍ട്ടന്റ്/സൂപ്പര്‍വൈസര്‍ വീടുപണിയുന്നതും തമ്മില്‍ ഒരുപാട് വ്യത്യാസം ഉണ്ട്. അനുഭവവും അറിവുമുള്ള നല്ല ഒരു കണ്‍സള്‍ട്ടന്റ് ആണെങ്കില്‍ വീടുപണിയുന്ന സമയത്ത് അനാവശ്യചെലവുകള്‍ ഒഴിവാക്കാനും സാധിക്കും. മെറ്റീരിയല്‍ സെലക്ഷന്‍ തൊട്ട് നിര്‍മാണത്തിന്റെ ഓരോഘട്ടത്തിലും ചെലവ് മൊത്തം ബജറ്റിന്റെ ഏകദേശം 20 ശതമാനത്തോളം സേവ് െചയ്യാന്‍ സാധിക്കും. അതുകൊണ്ട് തീര്‍ച്ചയായും വീടു പണിയുമ്പോള്‍ ഒരു കണ്‍സള്‍ട്ടന്റിനെ വയ്‌ക്കേണ്ടത് വളരെ പ്രധാനമാണ്.
നമ്മുടെ ആവശ്യങ്ങള്‍ കുടുംബാംഗങ്ങളുമായി ചേര്‍ന്നിരുന്ന് ആലോചിച്ചു തീരുമാനിക്കുക. രണ്ട് ബെഡ്‌റൂം ആവശ്യമുള്ളയിടത്ത് 5 ബെഡ്‌റൂം നിര്‍മിക്കേണ്ട ആവശ്യമില്ലല്ലോ. അടുത്ത 5 വര്‍ഷത്തിനിടയില്‍ നമുക്ക് എന്തൊക്കെ ആവശ്യമുണ്ടോ അത് മുന്നില്‍ കണ്ട് വേണം ഓരോ ആവശ്യങ്ങളും തീരുമാനിക്കേണ്ടത്. ഗസ്റ്റ് റൂമുകള്‍ ആവശ്യമില്ലെങ്കില്‍ ഒഴിവാക്കുക.
നിര്‍മ്മാണത്തിന് മുമ്പ് തന്നെ നിര്‍മ്മാണത്തെക്കുറിച്ച് വ്യക്തമായ തീരുമാനങ്ങള്‍ എടുക്കുകയും , ഒരു കാരണവശാലും , ഒരു ഘട്ടത്തിലും അതില്‍നിന്ന് മാറ്റം വരുത്തുകയും ചെയ്യരുത്. പ്ലാന്‍, എലിവേഷന്‍, ഫിനിഷിംഗ് എന്നിവയെ കുറിച്ചുള്ള തീരുമാനങ്ങള്‍ നിര്‍മ്മാണത്തിന് മുമ്പേ തന്നെ ഉറപ്പിച്ചിരിക്കണം. ഫിനിഷിംഗ് മെറ്റീരിയല്‍സ് ഉള്‍പ്പെടെയുള്ള മെറ്റീരിയല്‍സിന്റെ ഗുണനിലവാരത്തെക്കുറിച്ച് നിര്‍മ്മാണം തുടങ്ങുന്നതിനുമുമ്പുതന്നെ വ്യക്തത വരുത്തിയിരിക്കണം. അതില്‍നിന്ന് ഒരു ചെറിയ മാറ്റം പോലും നിങ്ങളുടെ ബഡ്ജറ്റില്‍ വലിയ വ്യത്യാസങ്ങള്‍ ഉണ്ടാക്കും.