അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കാറിനുള്ളിൽ പൊടിയാണോ? ഇത് എല്ലാവരും നേരിടുന്ന ഒരു പ്രധാന പ്രശ്നമാണ്. കാറിനുള്ളിലേക്ക് പൊടി കയറാതെ സൂക്ഷിക്കുക ഒരു പരിധിവരെ അസാധ്യമാണ്. കൃത്യമായ രീതിയില്‍ പൊടി വൃത്തിയാക്കിയെടുക്കുക മാത്രമാണ് ഈ പ്രശ്‌നത്തിനുള്ള പരിഹാരമാര്‍ഗം. പൊടിയും അഴുക്കും നിറഞ്ഞ കാറിന്റെ ഉള്‍ഭാഗം സുഖയാത്രക്ക് മാത്രമല്ല ആരോഗ്യത്തിനു കൂടിയാണ് വെല്ലുവിളിയാവുന്നത്. കാറിനുള്ളിലെ വായുവിന്റെ നിലവാരത്തെ ബാധിക്കുന്ന പൊടി, അലര്‍ജി അടക്കമുള്ള ആരോഗ്യപ്രശ്‌നങ്ങള്‍ക്കും കാരണമാവാറുണ്ട്.
ഈ കാലാവസ്ഥയില്‍ കാറിനുള്ളിലേക്ക് പൊടി കയറാതെ നോക്കുക എന്നത് അസാധ്യമാണെന്ന് തന്നെ പറയാം. ഗ്ലാസ് വിന്‍ഡോകള്‍ തുറന്നില്ലെങ്കില്‍ പോലും എസി വഴി പൊടി അകത്തെത്തും. എസിയുടെ തണുപ്പിനൊപ്പം ചേര്‍ന്ന് പൊടി കൂടി വരുന്നതോടെ പലര്‍ക്കും അതൊരു അലര്‍ജിയുടെ കാരണമാവാറുമുണ്ട്. ഒരിക്കല്‍ അകത്തെത്തി കഴിഞ്ഞാല്‍ പൊടി കാറിനുള്ളില്‍ സ്ഥിരതാമസമാക്കുകയും ചെയ്യും. കാറില്‍ എസി പ്രവര്‍ത്തിക്കുമ്പോഴൊക്കെ ഉള്ളിലെ പൊടിയും കറങ്ങികളിക്കും. മാത്രമല്ല എസിയുടെ പ്രവര്‍ത്തനത്തേയും വായുസഞ്ചാരത്തേയുമെല്ലാം പൊടി സ്വാധീനിക്കുകയും ചെയ്യും.
വാഹനത്തിനുള്ളിലേക്ക് പൊടി കയറുന്നത് തടയാന്‍ ഗുണനിലവാരമുള്ള എയര്‍ഫില്‍റ്ററുകള്‍ ഉപയോഗിക്കേണ്ടത് അത്യാവശ്യമാണ്. എയര്‍ഫില്‍റ്ററുകള്‍ കൃത്യമായി മാറ്റുന്നതും പൊടിയെ തടയാന്‍ സഹായിക്കും. കാറിന്റെ വെന്റുകളില്‍ പൊടികയറാതെ നോക്കിയാല്‍ അത് വാഹനത്തിന്റെ ഇന്ധനക്ഷമതയെ വരെ മെച്ചപ്പെടുത്തും. എസിയുടെ പ്രവര്‍ത്തനം തകരാറിലാക്കാനും വെന്റുകളിലെ പൊടി കാരണമാവും. പൊടി കുറവുള്ള വെന്റുകളുള്ള വാഹനങ്ങളില്‍ എസിയുടെ തണുപ്പില്‍ പോലും വ്യത്യാസമുണ്ടാവും.
മറ്റൊന്ന് ദീര്‍ഘകാലം വാഹനം നിര്‍ത്തിയിടേണ്ടി വന്നാല്‍ പൊടിയുടെ കാര്യത്തിലും ശ്രദ്ധവേണം. വാഹനത്തിന് മാത്രമല്ല എസി വെന്റുകള്‍ക്കും കവറുകള്‍ ഇടണം. ഇത്തരം കവറുകള്‍ എസി വെന്റുകളില്‍ പൊടി നിറയുന്നതു തടയാന്‍ സഹായിക്കും. കൂടാതെ ഡ്രൈവ് ചെയ്യുമ്പോള്‍ കാറിന്റെ വിന്‍ഡോസ് അടച്ചിടുന്നതുപോലുള്ള പ്രാഥമിക കാര്യങ്ങളിലും ശ്രദ്ധ വേണം. എസി ലാഭിക്കാനായി കാറിന്റെ വിന്‍ഡോ തുറന്നു വെച്ചു യാത്ര ചെയ്യുന്നതും കാറിനുള്ളിൽ പൊടികയറാൻ ഇടയാക്കും.
കാർ കൃത്യമായ ഇടവേളകളില്‍ വൃത്തിയാക്കുകയെന്നതാണ് പൊടിയെ നേരിടാനുള്ള ഏറ്റവും നല്ല മാർഗം. കാറിലെ പൊടി പ്രശ്നം പരിഹരിക്കാന്‍ സാധിക്കുന്ന പല ഉപകരണങ്ങളും വസ്തുക്കളുമെല്ലാം വിപണിയില്‍ ലഭ്യമാണ്. മൈക്രോഫൈബര്‍ തുണികളും ഡീറ്റെയ്‌ലിങ് ബ്രഷുകളുമെല്ലാം പൊടി ഒഴിവാക്കാന്‍ നല്ലതാണ്. സോഫ്റ്റ് ബ്രഷുകളും ചെറിയ നോസിലുള്ള വാക്വം ക്ലീനറുമെല്ലാം ഇതിനായി ഉപയോഗിക്കാം. സോഫ്റ്റ് തുണിയുപയോഗിച്ച് പൊടി തുടച്ചുകളയുന്നതും കാറിനുള്ളിൽ പൊടി നിൽക്കുന്നത് ഒരു പരിധി വരെ കുറയ്ക്കാൻ സാധിക്കും.
