കോട്ടയം: കഴിഞ്ഞ കുറച്ചു നാളുകളായി കേരള രാഷ്ട്രീയം കലങ്ങി മറിയുകയാണ്. പലരും പല പാർട്ടികൾ വിടുന്നതും മറ്റു പാർട്ടികളിലേക്ക് ചേക്കേറുന്നതുമാണ് കേരളക്കര കണ്ടത്. ഇപ്പോഴിതാ ഇടത് സഹയാത്രികനായിരുന്ന നിലമ്പൂർ എംഎൽഎ പി വി അൻവർ കോൺഗ്രസിൽ ചേരാനുള്ള നീക്കങ്ങൾ നടത്തിയതായിട്ടാണ് പുറത്തുവരുന്ന വിവരം. സംസ്ഥാനത്തെ പ്രമുഖ കോൺഗ്രസ് നേതാവും കെപിസിസി അധ്യക്ഷനുമായ കെ സുധാകരന്റെ പിന്തുണയോടെയാണ് അൻവറിന്റെ നീക്കങ്ങൾ. ഡൽഹിയിൽ കോൺഗ്രസ് ദേശീയ നേതൃത്വവുമായി അൻവർ ചർച്ച നടത്തിയെന്ന വിവരമാണ് പുറത്തുവരുന്നത്. കെ സി വേണുഗോപാലുമായി ചർച്ച നടത്തിയെന്നും റിപ്പോർട്ടുകൾ പുറത്തുവരുന്നു.
എല്‍.ഡി.എഫ് വിട്ട ശേഷം ഡി.എം.കെ, തൃണമൂല്‍ കോണ്‍ഗ്രസ് പാര്‍ട്ടികളില്‍ ചേരാനുള്ള നീക്കങ്ങള്‍ നടത്തിയ അന്‍വര്‍ ഏറ്റവും ഒടുവിലായി തന്റെ പഴയ പാര്‍ട്ടിയിലേക്ക് തിരിച്ചെത്താനുള്ള നീക്കമാണ് നടത്തിവരുന്നത്. എന്നാല്‍ ഈ നീക്കത്തെ എതിര്‍ത്തിരുന്ന പ്രതിപക്ഷ നേതാവ് വി.ഡി.സതീശന്റെയും മറ്റു ചില നേതാക്കളുടെയും നിലപാട് നിര്‍ണായകമാകും.
അന്‍വറിനെ യുഡിഎഫില്‍ എടുക്കുന്നതിനോട് നേരത്തെ ലീഗ് നേതൃത്വം അനുകൂല സമീപനമല്ല സ്വീകരിച്ചിരുന്നത്. എന്നാല്‍ ലീഗ് മയപ്പെടുമെന്നാണ് അൻവറിന്റെ വരവിനെ സ്വാഗതം ചെയ്യുന്ന കോൺഗ്രസ് നേതാക്കൾ കരുതുന്നത്. കെ. സുധാകരനുമായി അൻവർ നേരത്തെ കൂടിക്കാഴ്ച നടത്തിയിരുന്നു. ഉപതിരഞ്ഞെടുപ്പിൽ ചേലക്കരയിൽ സ്ഥാനാർഥിയെ നിർത്തിയ അൻവർ പാലക്കാടും വയനാടും യുഡിഎഫിനെ പിന്തുണയ്ക്കുകയായിരുന്നു.
STORY HIGHLIGHT: p v anvar maybe join congress