അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.നിയമസഭ തെരഞ്ഞെടുപ്പ് പ്രചാരണത്തിന് തുടക്കമിട്ട് ഡല്‍ഹിയിൽ പ്രധാനമന്ത്രി നരേന്ദ്രമോദിയുടെ വമ്പൻ റാലി. രോഹിണിയിലെ തെരഞ്ഞെടുപ്പ് റാലിയിലാണ് മോദി പങ്കെടുത്തത്. ആം ആദ്മി പാര്‍ട്ടി ദുരന്തം എന്ന പരാമര്‍ശം മോദി ഇന്ന് വീണ്ടും ആവര്‍ത്തിച്ചു. എഎപി ഭരണം ഡല്‍ഹിയുടെ വളര്‍ച്ച മുരടിപ്പിച്ചെന്നും വികസന പ്രവര്‍ത്തനങ്ങള്‍ നടത്തിയത് കേന്ദ്രസര്‍ക്കാരെന്നും മോദി പറഞ്ഞു. ലോകോത്തര നിലവാരത്തിലുള്ള തലസ്ഥാന നഗരമായി ഡല്‍ഹിയെ വികസിപ്പിക്കുമെന്ന് പറഞ്ഞ പ്രധാനമന്ത്രി ഇതിനായി വരാനിരിക്കുന്ന തെരഞ്ഞെടുപ്പില്‍ ജനങ്ങള്‍ അവസരം നല്‍കണമെന്നും ആവശ്യപ്പെട്ടു.
ഡല്‍ഹിയുടെ ശോഭനമായ ഭാവിക്കായി ബിജെപിക്ക് അവസരം നല്‍കണമെന്ന് ജനങ്ങളോട് അഭ്യര്‍ത്ഥിക്കാന്‍ ഞാന്‍ ആഗ്രഹിക്കുന്നു. കഴിഞ്ഞ 10 വര്‍ഷങ്ങളില്‍ ആം ആദ്മി പാര്‍ട്ടി ദുരന്തമല്ലാതെ മറ്റൊന്നും കേട്ടിട്ടില്ല. ഈ ദുരന്തം ഇനി സഹിക്കില്ല. ഡല്‍ഹിയില്‍ നല്ല മാറ്റമാണ് ഞങ്ങള്‍ ആഗ്രഹിക്കുന്നത്. കെജ്രിവാളിന്റെ നേതൃത്വത്തിലുള്ള പാര്‍ട്ടിക്ക് ഡല്‍ഹിയില്‍ വികസന കാഴ്ചപ്പാട് ഇല്ലെന്നും പാര്‍ട്ടി ജനവിരുദ്ധമാണെന്നും മോദി പറഞ്ഞു.
ഡല്‍ഹിയില്‍ എല്ലായിടത്തും താമര വിരിയുമെന്ന് എനിക്ക് ആത്മവിശ്വസമുണ്ട്. ഡല്‍ഹിയിലെ ജനങ്ങളുടെ ഹൃദയം കീഴടക്കാനും ആം ആദ്മി പാര്‍ട്ടിയെന്ന ദുരന്തത്തെ ഇവിടെ നിന്ന് നീക്കം ചെയ്യാനും ഇതാണ് ഏറ്റവും നല്ല സമയമെന്നും അദ്ദേഹം വ്യക്തമാക്കി. വികസന പ്രവര്‍ത്തനങ്ങള്‍ നടത്താനുള്ള പാര്‍ട്ടിയുടെ പ്രതിബദ്ധത കാരണം ജനങ്ങള്‍ ബിജെപിയെ വിശ്വസിക്കാന്‍ തുടങ്ങിയെന്നും അദ്ദേഹം കൂട്ടിച്ചേർത്തു.
