അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.രാഷ്ട്രീയമായ വിയോജിപ്പുകളുണ്ടെങ്കിലും അഭിരുചികള്‍ സമാനമാണെന്ന് യുവരാഷ്ട്രീയ നേതാക്കളായ എം സ്വരാജും കെ എസ് ശബരീനാഥും. വായിച്ച പുസ്തകങ്ങളിലും വായനയെ കുറിച്ചുള്ള കാഴ്ചപ്പാടിലും കലാവിഷ്‌കാരങ്ങളോടുള്ള സമീപനത്തിലും ഇരുവരും ഒരേ അഭിപ്രായക്കാര്‍. വായനയാണ് തങ്ങളിലെ രാഷ്ട്രീയ നിലപാടുകള്‍ ഉറപ്പിച്ചതെന്ന് പറയുമ്പോഴും പുതിയ പുസ്തകങ്ങളിലെ ഉള്ളടക്കത്തെപ്പറ്റി ഇരുവരും ഒരേ ആശങ്ക പങ്കുവെച്ചു. കെ എല്‍ ഐ ബി എഫ് ഡയലോഗ് സെഷനില്‍ വായനയുടെ രാഷ്ട്രീയം എന്ന വിഷയത്തില്‍ സംവദിക്കുകയായിരുന്നു ഇരുവരും.
പുസ്തകങ്ങളിലും കലകളിലും അരാഷ്ട്രീയതയും അക്രമവും പ്രോത്സാഹിപ്പിക്കപ്പെടുന്നതിനെ പറ്റി ഇരുവരും ആശങ്ക പങ്കുവെച്ചു. അടുത്തിടെ ഇറങ്ങിയ മിക്ക തെന്നിന്ത്യന്‍ സിനിമകളും അക്രമത്തെ പ്രകീര്‍ത്തിക്കുന്നതാണെന്നും അതിനു വന്‍ സ്വീകാര്യത കിട്ടുന്നുവെന്നും എം സ്വരാജ് പറഞ്ഞു. എന്നാല്‍ രാഷ്ട്രീയകൊലപാതകങ്ങള്‍ വര്‍ധിക്കുന്നു എന്ന പ്രചാരണം തെറ്റാണ്. ചരിത്രം പരിശോധിച്ചാല്‍ ഒറ്റപ്പെട്ട സംഭവങ്ങള്‍ അല്ലാതെ രാഷ്ട്രീയ കൊലപാതകങ്ങള്‍ കുറഞ്ഞതായി കാണാനാകും.
അജണ്ടകളുടെ ഭാഗമായ പുസ്തകങ്ങള്‍ക്കും സ്വീകാര്യത കിട്ടുന്നു. രാഷ്ട്രപിതാവിനെ കൊന്നതാര് എന്ന് പറയാന്‍ മടിക്കുന്ന എഡിറ്റോറിയലുകള്‍ മലയാളം ഉള്‍പ്പെടെയുള്ള മാധ്യമങ്ങളില്‍ വരുന്നു. വളച്ചൊടിക്കപ്പെടുന്ന ചരിത്രം സ്വീകരിക്കപ്പെടുന്നത് ആശങ്കാജനകമാണ്. കലാസ്വാദനത്തിലും വായനയിലും നിക്ഷിപ്ത താല്പര്യങ്ങള്‍ക്കെതിരെ ജാഗ്രത പുലര്‍ത്തേണ്ടതുണ്ട്. പുതിയ ലോകങ്ങളിലേക്ക് തുറന്നുവെച്ച വാതിലുകളാണ് പുസ്തകങ്ങള്‍. ഓരോ പുസ്തകം വായിച്ചു കഴിയുമ്പോഴും ഓരോ പുതിയ മനുഷ്യനുണ്ടാകുന്നു. ഒരേ പുസ്തകം രണ്ടുപേര്‍ വായിക്കുമ്പോള്‍ രണ്ടു പുസ്തകമുണ്ടാകുന്നു. പരന്ന വായനയാണോ ഒരേ വിഷയത്തിലുള്ള ആഴത്തിലുള്ള വായനയാണോ മികച്ചതെന്ന ചോദ്യത്തിന് ഉത്തരമില്ലെന്നും സ്വരാജ് പറഞ്ഞു.
സിനിമകളിലും പുസ്തകങ്ങളിലും ടെലിവിഷന്‍ പരിപാടികളിലുമെല്ലാം അക്രമങ്ങള്‍ പ്രോത്സാഹിപ്പിക്കപ്പെടുകയാണെന്ന് കെ എസ് ശബരീനാഥന്‍ പറഞ്ഞു. സമൂഹത്തില്‍ അക്രമങ്ങള്‍ കൂടുന്നതായി പത്രങ്ങളുടെ പ്രാദേശിക പേജ് പരിശോധിച്ചാല്‍ മനസിലാകും. പപ്പടത്തിന്റെ പേരില്‍ വരെ സംഘര്‍ഷം നടക്കുന്നുവെന്നത് ചിരിച്ചുതള്ളാനാകില്ല. മനുഷ്യന്റെ മൃഗവാസനകളെ ഇത്തരം സിനിമകള്‍ പ്രോത്സാഹിപ്പിക്കുന്നുണ്ട്. പുറമേക്ക് അക്രമകാരിയായാലും ഇല്ലെങ്കിലും അക്രമങ്ങളെ അംഗീകരിക്കുകയും ആരാധിക്കുകയും ചെയ്യുന്ന തരത്തിലേക്ക് അവ നമ്മെ പരുവപ്പെടുത്തുന്നുണ്ട്. പ്രതിവര്‍ഷം എണ്ണമറ്റ പുസ്തകങ്ങള്‍ ഇറങ്ങുന്ന നാടാണ് കേരളം. പുതിയ എഴുത്തുകാര്‍ ധാരാളമായി ഉണ്ടാകുന്നു. എല്ലാ വാര്‍ഡുകളിലും പുസ്തകോത്സവം നടക്കുന്ന തരത്തില്‍ കേരളം വളര്‍ന്നു. അത് കാലത്തിന്റെ അനിവാര്യതയാണെന്നും ശബരീനാഥന്‍ പറഞ്ഞു.
