അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ചുറുചുറുക്കുള്ള ചുള്ളന്മാരുടെയും, ചുള്ളത്തികളുടേയും ക്യാമ്പസ് കഥ പറയുന്ന “PDC അത്ര ചെറിയ ഡിഗ്രി അല്ല” എന്ന ചിത്രത്തിന്റെ ഒഫിഷ്യല്‍ പോസ്റ്റര്‍ റിലീസ് ജനപ്രിയ നായകന്‍ ദിലീപിന്‍റെ സോഷ്യല്‍ മീഡിയ പേജിലൂടെ റിലീസ് ചെയ്തു. ഇഫാർ ഇന്റർനാഷണലിന്റെ ഇരുപതാം ചിത്രമാണിത്. ഇഫാറിന്റെ സാരഥിയായ റാഫി മതിര തന്നെയാണ് ചിത്രത്തിന്റെ കഥ, തിരക്കഥ, സംഭാഷണം, സംവിധാനം നിർവ്വഹിക്കുന്നത്.
2023-ല്‍ ജോഷി –സുരേഷ് ഗോപി ചിത്രമായ പാപ്പന്‍, 2023-ല്‍ ഉടല്‍ ഫെയിം രതീഷ് രഘു നന്ദന്‍-ദിലീപ് ചിത്രമായ തങ്കമണി എന്നിവയ്ക്ക് ശേഷം 2025-ല്‍ ഇഫാര്‍ മീഡിയ അവതരിപ്പിക്കുന്ന PDC-യുടെ പോസ്റ്റ്‌ പ്രൊഡക്ഷന്‍ ജോലികള്‍ ആരംഭിച്ചു.
ഈ ബയോ ഫിക്ഷണല്‍ സിനിമ ഒരുക്കിയിരിക്കുന്നത് കോമഡി പശ്ചാത്തലത്തിലാണ്. സംവിധായകന്‍റെ പ്രീഡിഗ്രി പഠന കാലവും പൊതു ജീവിതവും സിനിമാ പശ്ചാത്തലവും സമകാലിക സംഭവങ്ങളും രസകരമായി കോര്‍ത്തിണക്കിയ ഈ സിനിമയിലൂടെ, പുതുമുഖങ്ങളായ 16 യുവതീ യുവാക്കളെ മലയാള സിനിമയ്ക്ക് ലഭിക്കും.
സിദ്ധാര്‍ത്, ശ്രീഹരി, അജോഷ്, അഷൂര്‍, ദേവദത്ത്, പ്രണവ്, അരുണ്‍ ദേവ്, മാനവേദ്, ദേവ നന്ദന, ദേവിക, രെഞ്ജിമ, കല്യാണി ലക്ഷ്മി, അജിഷ ജോയ്, അളഗ, ഗോപിക തുടങ്ങിയ യുവമുഖങ്ങള്‍ക്കു പുറമേ ജോണി ആന്റണി, ബിനു പപ്പു, ജയന്‍ ചേര്‍ത്തല, സന്തോഷ് കീഴാറ്റൂര്‍, ബാലാജി ശര്‍മ്മ, സോനാ നായര്‍, വീണ നായര്‍, എസ്.ആശ നായര്‍, മഞ്ജു പത്രോസ്, ലക്ഷ്മി പ്രിയ, തിരുമല രാമചന്ദ്രന്‍, റിയാസ് നര്‍മ്മകല, ബിജു കലാവേദി, മുന്‍ഷി ഹരി, നന്ദഗോപന്‍ വെള്ളത്താടി, രാജ്മോഹൻ, സിജി ജൂഡ്, വിനയ, ബഷീർ കല്ലൂര്‍വിള, ആനന്ദ് നെച്ചൂരാന്‍, അനീഷ്‌ ബാലചന്ദ്രന്‍, രാജേഷ് പുത്തന്‍പറമ്പില്‍, ജോസഫ്, ഷാജി ലാല്‍, സജി ലാല്‍, ഉദേശ് ആറ്റിങ്ങല്‍, രാഗുല്‍ ചന്ദ്രന്‍, ബിച്ചു തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
പത്താം ക്ലാസ് പഠനം കഴിഞ്ഞയുടന്‍ കോളേജില്‍ പഠിക്കാന്‍ ഭാഗ്യം കിട്ടിയവരാണ് പ്രീ ഡിഗ്രിക്കാര്‍. ആദ്യതവണ പത്താം ക്ലാസ്സില്‍ പരാജയപ്പെടുകയും പിന്നെ വിജയിക്കുകയും ചെയ്തവരും, മാര്‍ക്ക് കുറഞ്ഞവരും ഒക്കെ അക്കാലത്ത് ആശ്രയിച്ചിരുന്നത് പാരലല്‍ കോളേജുകളെ ആയിരുന്നു.
1996-98 കാലഘട്ടത്തില്‍ കൊല്ലം ജില്ലയിലെ ട്രിനിറ്റി കോളേജ് എന്ന റസിഡന്‍ഷ്യല്‍ പാരലല്‍ കോളേജില്‍ വിവിധ ജില്ലകളില്‍ നിന്നുള്ള ചെറുപ്പക്കാര്‍ക്ക് താമസിച്ചു പഠിക്കാന്‍ അവസരം ലഭിക്കുന്നു. സ്കൂള്‍ ജീവിതത്തിന്‍റെ ഇടുങ്ങിയ മതിലുകളിൽ വീർപ്പുമുട്ടിയ ടീനേജ് കാർ, വിശാലമായ സ്വാതന്ത്ര്യം ആഘോഷിക്കാന്‍ കോളേജ് ജീവിതം എന്ന മതിലുകളില്ലാത്ത ലോകത്തിലേയ്ക്ക് കടന്നുവരുന്നു. ഈ ചെറുപ്പക്കാരുടെ കലാലയ ജീവിതവും സ്വപ്നവും പ്രണയവും ചിന്തയും എല്ലാം സിനിമയില്‍ ചര്‍ച്ചയാകുന്നു.
വര്‍ഷങ്ങള്‍ക്കു ശേഷം വാട്സ് ആപ്പ് കൂട്ടായ്മയിലൂടെ വീണ്ടും സൌഹൃദം പുതുക്കുന്ന കൂട്ടുകാര്‍. അവരില്‍ ഒരാളായ ജോസഫ് മാത്യൂ ഒരു ഊരാക്കുടുക്കില്‍ പെടുന്നതും ഒരൊറ്റ ദിവസം കൊണ്ട് കൂട്ടുകാര്‍ പല വിധത്തിലുള്ള ഇടപെടലുകള്‍ നടത്തുന്നതും, അയാളെയും കുടുംബത്തെയും ആ ഊരാ കുടുക്കില്‍ നിന്നും രക്ഷിക്കുന്നതുമാണ് ചിത്രത്തിന്റെ മറ്റൊരു വഴിത്തിരിവ്.
പൂര്‍വ്വ വിദ്യാര്‍ഥി വാട്സ് ആപ്പ് കൂട്ടായ്മകള്‍ കാരണം ഒളിച്ചോട്ടങ്ങള്‍ പതിവാകുന്നു എന്നും,കുടുംബ ജീവിതങ്ങള്‍ തകരുന്നു എന്നും പരക്കെ ആക്ഷേപമുള്ള സാഹചര്യത്തില്‍ അത്തരത്തിലുള്ള ഒരു വാട്സ് ആപ്പ് കൂട്ടായ്മ, യഥാസമയത്തുള്ള അതിശക്തമായ ഇടപെടലിലൂടെ ഒരു കുടുംബത്തെ അക്ഷരാര്‍ത്ഥത്തില്‍ രക്ഷപ്പെടുത്തുന്ന കഥ കൂടിയാണ് PDC.
ഉണ്ണി മടവൂര്‍ ആണ് ചിത്രത്തിന്റെ ഛായാഗ്രഹണം. കലാ സംവിധാനം സജിത് മുണ്ടയാട്. ചിത്രസംയോജനം വിപിന്‍ മണ്ണൂര്‍. കോറിയോഗ്രാഫി മനോജ്‌ ഫിഡാക്. റാഫി മതിരയും ഇല്യാസ് കടമേരിയും എഴുതിയ വരികള്‍ക്ക് ഫിറോസ്‌ നാഥ്‌ സംഗീതം നല്‍കുന്നു. K.S. ചിത്ര, ജാസി ഗിഫ്റ്റ്, ഫിറോസ്‌ നാഥ്‌, സാം ശിവ, ശ്യാമ, ജ്യോതിഷ് ബാബു എന്നിവര്‍ ഗാനങ്ങള്‍ ആലപിക്കുന്നു. പശ്ചാത്തല സംഗീതം – റോണി റാഫേൽ, പരസ്യകല- മാനു ഡാവിഞ്ചി, പ്രൊഡക്ഷൻ കൺട്രോളർ – മോഹൻ അമൃത, മേക്കപ്പ് – സന്തോഷ് വെൺ പകൽ, വസ്ത്രാലങ്കാരം – ഭക്തൻ മങ്ങാട്, സഹസംവിധാനം – ആഷിക് ദിൽ ജിത്, സഞ്ജയ് ജി കൃഷ്ണൻ, പി.ആർ.ഒ – അയ്മനം സാജൻ,വിതരണം -ഡ്രീം ബിഗ്‌ ഫിലിംസ്.
CONTENT HIGHLIGHT: pdc athra cheriya digree alla
