അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കോൺക്രീറ്റ് മിക്‌സിംഗ് മെഷീനുള്ളിൽ കൈ കുടുങ്ങിയ തൊഴിലാളിയെ മുക്കം അഗ്നിരക്ഷാസേന രക്ഷപ്പെടുത്തി. ഓമശ്ശേരി-കൊടുവള്ളി റോഡിന്റെ സൈഡ് കോൺക്രീറ്റ് ജോലിക്കെത്തിയ നന്മണ്ട സ്വദേശി മണ്ണാറക്കണ്ടി റഫീക്ക് (51) ആണ് അപകടത്തിൽപെട്ടത്.
ബുധനാഴ്ച ഉച്ചയ്ക്ക് രണ്ട് മണിയോടെ താഴെ ഓമശ്ശേരിയിൽ ആണ് സംഭവം. ഉച്ചഭക്ഷണത്തിനായി ജോലി നിർത്തി മെഷീൻ വൃത്തിയാക്കുന്നതിനിടെ മിക്സർ മെഷീന്റെ റൊട്ടേറ്റിങ് വീലിന്റെ പൽചക്രത്തിനുള്ളിലേക്ക് കൈപ്പത്തി കയറിപ്പോകുകയായിരുന്നു.
നാട്ടുകാർ രക്ഷപ്പെടുത്താൻ ശ്രമിച്ചെങ്കിലും സാധിക്കാത്തതിനാൽ അഗ്നിരക്ഷാസേനയെ വിവരം അറിയിക്കുകയായിരുന്നു. സ്റ്റേഷൻ ഓഫിസർ എം.അബ്ദുൽ ഗഫൂറിന്റെ നേതൃത്വത്തിൽ സ്ഥലത്തെത്തിയ സേനാംഗങ്ങൾ ഹൈഡ്രോളിക് സ്‌പ്രെഡർ ഉപയോഗിച്ച് നിമിഷനേരം കൊണ്ട് രക്ഷപ്പെടുത്തി. ഓമശ്ശേരിയിലെ സ്വകാര്യ ആശുപത്രിയിൽ എത്തിച്ച റഫീക്കിനെ വിദഗ്ധ ചികിത്സയ്ക്കായി കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി.
സീനിയർ ഫയർ ഓഫിസർ എൻ.രാജേഷ്, സേനാംഗങ്ങളായ എം.സി.സജിത്ത് ലാൽ, കെ.അഭിനേഷ്, ജി.ആർ.അജേഷ്, എം.കെ.അജിൻ, എൻ.ശിനീഷ്, അനു മാത്യു, ശ്യാം കുര്യൻ, ജോളി ഫിലിപ്പ്, കെ.എസ്.വിജയകുമാർ എന്നിവരാണ് രക്ഷാപ്രവർത്തനം നടത്തിയത്.
