ഡല്‍ഹി മെട്രോയില്‍ വിദ്യാര്‍ത്ഥികള്‍ക്ക് ഇളവ് അനുവദിക്കണമെന്ന് ആവശ്യപ്പെട്ട് ഡല്‍ഹി മുന്‍ മുഖ്യമന്ത്രിയും ആം ആദ്മി പാര്‍ട്ടി ദേശീയ കണ്‍വീനറുമായ അരവിന്ദ് കെജ്രിവാള്‍ പ്രധാനമന്ത്രി നരേന്ദ്ര മോദിക്ക് കത്തയച്ചു. ഡല്‍ഹിയിലെ വിദ്യാര്‍ത്ഥികള്‍ സ്‌കൂളിലേക്കും കോളേജിലേക്കും പോകാന്‍ മെട്രോയെ ആശ്രയിക്കുന്നുണ്ടെന്ന് അരവിന്ദ് കെജ്രിവാള്‍ കത്തില്‍ പറയുന്നു. വിദ്യാര്‍ത്ഥികളുടെ സാമ്പത്തിക ഭാരം കുറയ്ക്കുന്നതിന്, ഡല്‍ഹി മെട്രോയിലെ വിദ്യാര്‍ത്ഥികള്‍ക്ക് 50 ശതമാനം ഇളവുകള്‍ നല്‍കാന്‍ ഞാന്‍ നിര്‍ദ്ദേശിക്കുന്നു.
ഡല്‍ഹി മെട്രോയില്‍ കേന്ദ്രത്തിനും ഡല്‍ഹി സര്‍ക്കാരിനും ഓഹരിയുണ്ടെന്നും ഇതില്‍ നിന്നുള്ള ചെലവ് ഇരുവരും വഹിക്കണമെന്നും കെജ്രിവാള്‍ കത്തില്‍ പറഞ്ഞു, ഞങ്ങളുടെ ഭാഗത്തുനിന്നുള്ള വിദ്യാര്‍ത്ഥികള്‍ക്ക് ഞങ്ങള്‍ സൗജന്യ ബസ് യാത്ര ആസൂത്രണം ചെയ്യുന്നു. ഡല്‍ഹി സര്‍ക്കാരും കേന്ദ്ര സര്‍ക്കാരും ചേര്‍ന്നുള്ള 50:50 സംയുക്ത പദ്ധതിയാണ് ഡല്‍ഹി മെട്രോ. അതിനാല്‍ ഇതിനുള്ള ചെലവ് ഡല്‍ഹി സര്‍ക്കാരും കേന്ദ്ര സര്‍ക്കാരും തുല്യമായി വഹിക്കണമെന്നും കത്തില്‍ പറയുന്നു. ഡല്‍ഹിയിലെ വിദ്യാര്‍ത്ഥികള്‍ സ്‌കൂളുകളിലേക്കും കോളേജുകളിലേക്കും യാത്ര ചെയ്യാന്‍ മെട്രോയെ ആശ്രയിക്കുന്നുണ്ടെന്നും അതിനാല്‍ അവരുടെ മേലുള്ള സാമ്പത്തിക ഭാരം കുറയ്ക്കണമെന്നും കെജ്രിവാള്‍ പറഞ്ഞു. നഗരത്തിലെ സ്ത്രീകള്‍ക്ക് സൗജന്യ ബസ് യാത്ര എന്ന നിലവിലുള്ള പദ്ധതി വിപുലീകരിച്ച് വിദ്യാര്‍ത്ഥികള്‍ക്ക് സൗജന്യ ബസ് യാത്ര വാഗ്ദാനം ചെയ്യുന്ന കാര്യം എഎപി സര്‍ക്കാര്‍ പരിഗണിക്കുന്നുണ്ടെന്നും കെജ്രിവാള്‍ വെളിപ്പെടുത്തി. ഈ നിര്‍ദേശങ്ങള്‍ പ്രധാനമന്ത്രി അംഗീകരിക്കുമെന്ന് അരവിന്ദ് കെജ്രിവാള്‍ പ്രതീക്ഷ പ്രകടിപ്പിച്ചു.
ഡല്‍ഹി നിയമസഭാ തിരഞ്ഞെടുപ്പ്
ഫെബ്രുവരി 5 നാണ് ഡല്‍ഹി നിയമസഭാ തിരഞ്ഞെടുപ്പ്, ഫെബ്രുവരി 8 ന് വോട്ടെണ്ണല്‍ നടക്കും. ഭരണകക്ഷിയായ എഎപി 70 സീറ്റുകളിലേക്കും സ്ഥാനാര്‍ത്ഥികളെ പ്രഖ്യാപിച്ചു, ബിജെപി 59 സീറ്റുകളിലേക്ക് സ്ഥാനാര്‍ത്ഥികളെ പ്രഖ്യാപിച്ചു. നാമനിര്‍ദ്ദേശ പത്രിക സമര്‍പ്പിക്കാനുള്ള അവസാന തീയതി ജനുവരി 17 ആണ്, തുടര്‍ന്ന് നാമനിര്‍ദ്ദേശ പത്രികകളുടെ സൂക്ഷ്മപരിശോധന ജനുവരി 18 നും സ്ഥാനാര്‍ത്ഥികള്‍ പിന്‍വലിക്കാനുള്ള അവസാന തീയതി ജനുവരി 20 നും ആണ്. വരാനിരിക്കുന്ന തെരഞ്ഞെടുപ്പുകള്‍ എഎപി, ബിജെപി, കോണ്‍ഗ്രസ് എന്നിവ തമ്മിലുള്ള ത്രികോണ മത്സരമായി മാറുകയാണ്. 15 വര്‍ഷമായി ഡല്‍ഹി ഭരിച്ച കോണ്‍ഗ്രസ്, ഇക്കഴിഞ്ഞ തെരഞ്ഞെടുപ്പുകളില്‍ ഒരു സീറ്റും നേടാനായില്ല. 2020ലെ തെരഞ്ഞെടുപ്പില്‍ 70ല്‍ 62 സീറ്റുമായി ആം ആദ്മി ആധിപത്യം പുലര്‍ത്തി, ബിജെപിക്ക് വെറും എട്ട് സീറ്റുകള്‍ മാത്രം.