മലപ്പുറം എടപ്പാളിന് അടുത്ത് മാണൂരില്‍ ബസുകൾ കൂട്ടിയിടിച്ച് അപകടം. കെഎസ്ആർടിസി ബസും ടൂറിസ്റ്റ് ബസും കൂട്ടിയിടിച്ച് ആണ് അപകടം സംഭവിച്ചത്. രണ്ട് ബസുകളിലുമായി ഉണ്ടായിരുന്ന മുപ്പതോളം യാത്രക്കാര്‍ക്ക് പരുക്കേറ്റു. ആരുടെയും പരിക്കുകൾ ഗുരുതരമല്ല. ഇന്ന് പുലര്‍ച്ചെ 2.50-ന് ആയിരുന്നു അപകടം സംഭവിച്ചത്.
അപകടത്തിൽ പരിക്കേറ്റ മൂന്നുപേർക്ക് സാരമായ പരിക്കുകളാണ് ഏറ്റിരിക്കുന്നത്. എങ്കിലും ഗുരുതര സ്വഭാവമുള്ളതല്ലെന്ന് ഡോക്ടർമാർ വ്യക്തമാക്കി. അപകടത്തിൽപെട്ട രണ്ട് ബസുകളുടെയും മുൻഭാഗം പൂര്‍ണമായും തകര്‍ന്നു. അപകടത്തിന്‍റെ കാരണം എന്താണെന്നത് ഉള്‍പ്പെടെ വ്യക്തമല്ല. സംഭവത്തെക്കുറിച്ച് കൂടുതൽ അന്വേഷിച്ചുവരുകയാണെന്ന് പൊലീസ് അറിയിച്ചു. അപകടം സംഭവിച്ചത് പുലർച്ചെ ആയതിനാൽ ഉറങ്ങിപ്പോയതോ അമിത വേഗതയോ ആയേക്കാം അപകട കാരണം. പരിക്കേറ്റവരെ ആശുപത്രികളിലേക്ക് മാറ്റി.
ഗുരുതരമായി പരിക്കേറ്റവരിൽ ഒരാളെ കോട്ടക്കലിലെ സ്വകാര്യ ആശുപത്രിയിലും രണ്ടു പേരെ തൃശൂര്‍ മെഡ‍ിക്കൽ കോളേജിലേക്കും മാറ്റിയിട്ടുണ്ട്. തൃശൂര്‍-മലപ്പുറം സംസ്ഥാനപാതയിലാണ് അപകടമുണ്ടായത്. തൃശൂരിൽ നിന്ന് മാനന്തവാടിയിലേക്ക് പോവുകയായിരുന്ന കെഎസ്ആര്‍ടിസി ബസും കാസര്‍കോട് നിന്ന് എറണാകുളത്തേക്ക് പോവുകയായിരുന്ന ടൂറിസ്റ്റ് ബസും ആണ് കൂട്ടിയിടിച്ചത്. അപകടം നടന്ന ഉടൻ തന്നെ നാട്ടുകാര്‍ പരിക്കേറ്റവരെ എടപ്പാളിലെ ആശുപത്രിയിലെത്തിക്കുകയായിരുന്നു.