അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.എത്ര കഴുകിയാലും ലഞ്ച് ബോക്സിനുള്ളിൽ നിന്നും ഭക്ഷണത്തിന്റെ ഗന്ധം വിട്ടുപോകുന്നില്ല എന്ന പ്രശ്നം പലരും നേരിടുന്നുണ്ട്. എണ്ണമയം പൂർണ്ണമായും നീക്കം ചെയ്യാനാവാത്തതു മൂലം പാത്രത്തിന്റെ നിറംമങ്ങുന്നതും പതിവാണ്. ഭക്ഷണ സാധനങ്ങൾ ഏറെനേരം അടച്ചുസൂക്ഷിക്കുന്ന പാത്രമായതിനാൽ അവ വൃത്തിയായിരിക്കേണ്ടത് ആരോഗ്യത്തിനും പ്രധാനമാണ്. അൽപമൊന്നു ശ്രദ്ധിച്ചാൽ ഈ പ്രശ്നങ്ങൾ ഒഴിവാക്കാനാകും.
ഭക്ഷണം കൊണ്ടുപോകുന്ന പാത്രം വൈകിട്ട് വീട്ടിലെത്തിയ ശേഷമാവും ഭൂരിഭാഗം ആളുകളും വൃത്തിയാക്കാൻ എടുക്കുന്നത്. മണിക്കൂറുകളോളം ഭക്ഷണവും പിന്നീട് അതിന്റെ അവശിഷ്ടവും പാത്രത്തിൽ തന്നെ അവശേഷിക്കുന്നതാണ് ദുർഗന്ധം തങ്ങിനിൽക്കുന്നതിന്റെ പ്രധാന കാരണം. അതിനാൽ ഭക്ഷണം കഴിച്ച ഉടൻ തന്നെ പാത്രത്തിലെ അവശിഷ്ടങ്ങൾ നീക്കി വെറും വെള്ളത്തിലെങ്കിലും കഴുകി വയ്ക്കുന്നത് ഒരുപരിധിവരെ പരിഹാരമാണ്. ടിഷ്യൂ പേപ്പർ കയ്യിൽ കരുതിയാൽ പാത്രം തുടച്ചെടുക്കുകയും ചെയ്യാം.
എണ്ണമയം അധികമുള്ള ഭക്ഷണമാണ് ചോറ്റുപാത്രത്തിൽ കരുതിയിരുന്നതെങ്കിൽ അത് നീക്കം ചെയ്യാൻ ചെറുചൂടു വെള്ളം ഉപയോഗിച്ച് കഴുകുന്നതാണ് ഉചിതം. ഡിഷ് വാഷ് ലിക്വിഡ് കൂടി കലർത്തി മൃദുവായ സ്ക്രബർ ഉപയോഗിച്ച് ഉരച്ചു കഴുകാം.
എത്ര വൃത്തിയായി കഴുകി വയ്ക്കുന്ന ചോറ്റുപാത്രത്തിലും ദുർഗന്ധം തങ്ങിനിൽക്കുന്നുണ്ടെങ്കിൽ അത് വൃത്തിയായി ഉണങ്ങിയിട്ടില്ല എന്നതാണ് കാരണം. കഴുകിയെടുത്ത ശേഷം ഉടൻ ചോറ്റുപാത്രം അടച്ചുവയ്ക്കരുത്. സാധിക്കുമെങ്കിൽ വെയിലത്തു വച്ചുതന്നെ ചോറ്റുപാത്രം ഉണക്കിയെടുക്കുക.
ചെറുചൂടുവെള്ളത്തിൽ പാത്രം കഴുകിയശേഷം ചെറുനാരങ്ങയിൽ നിന്നും അൽപഭാഗം മുറിച്ചെടുത്ത് ഡിഷ് വാഷ് ലിക്വിഡിൽ മുക്കി പാത്രത്തിൽ ഉരച്ചു കൊടുക്കണം. വളരെ വേഗത്തിൽ പാത്രം വൃത്തിയാക്കാൻ ഇതിലൂടെ സാധിക്കും.
