അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.റാം പൊത്തിനേനി നായകനായി വമ്പൻ ബജറ്റിൽ എത്തിയ ചിത്രമാണ് ഡബിള്‍ ഐ സ്‍മാര്‍ട്ട്. ചിത്രം സംവിധാനം നിര്‍വഹിച്ചത് തെലുങ്കിലെ പ്രശസ്ത സംവിധായകന്‍ പുരി ജഗന്നാഥാണ്. കാവ്യ താപർ ആയിരുന്നു ചിത്രത്തില്‍ നായിക. ഡബിള്‍ ഐ സ്‍മാര്‍ട്ട് സിനിമ 2019-ൽ പുറത്തിറങ്ങിയ ഐസ്മാർട്ട് ശങ്കറിന്‍റെ രണ്ടാം ഭാഗമാണ്. ബോളിവുഡ് താരം സഞ്ജയ് ദത്തും ഈ ചിത്രത്തില്‍ അഭിനയിച്ചിരുന്നു.
കഴിഞ്ഞ വർഷം ഓഗസ്റ്റ് 15നാണ് ചിത്രം റിലീസായത്. ആരാധകരില്‍ നിന്നും സിനിമ നിരൂപകരില്‍ നിന്നും ഒരുപോലെ മോശം റിവ്യൂവാണ് ചിത്രം നേടിയത്. ലൈഗര്‍ എന്ന ചിത്രത്തിന്റെ വന്‍ പരാജയത്തിന് ശേഷം പുരി ജഗന്നാഥ് എടുത്ത ഈ ചിത്രവും മോശം തന്നെ എന്ന പ്രതികരണങ്ങളായിരുന്നു വന്നത്. ഏകദേശം 55 കോടിയോളം രൂപയിലേറെയാണ് ചിത്രത്തിന്റെ ബജറ്റ്. എന്നാല്‍ ഏകദേശം 11 കോടി രൂപ മാത്രമാണ് ചിത്രം ആഗോളതലത്തില്‍ ഷെയർ നേടിയത്. എന്നാൽ ചിത്രത്തിന്റെ പരാജയ കാരണം മൌത്ത് പബ്ലിസിറ്റി മോശമായതാണ് എന്ന വ്യക്തമാക്കുന്ന മറ്റൊരു റിപ്പോർട്ടാണ് ഇപ്പോൾ പുറത്ത് വരുന്നത്. ചിത്രം യൂട്യൂബിൽ വൻ വിജയമായി മാറുകയാണ്.
ഡബിള്‍ ഐസ്‍മാര്‍ട്ടിന്റെ ഹിന്ദി പതിപ്പ് സിനിമയാണ് സര്‍പ്രൈസ് ഹിറ്റായിരിക്കുന്നത് എന്നാണ് റിപ്പോര്‍ട്ട്. ഹിന്ദി പതിപ്പ് യൂട്യൂബില്‍ 10 കോടി കാഴ്‍ചക്കാരെയാണ് നേടിയിരിക്കുന്നത്. ആവേശമുണ്ടാക്കുന്ന ഒരു മാസ് ആക്ഷൻ ചിത്രമായി ഒരുക്കിയിരിക്കുന്ന ഡബിൾ ഐ സ്‍മാർട്ടിന്റെ ഛായാഗ്രാഹണം സാം കെ നായിഡുവിന് ഒപ്പം ഗിയാനി ഗിയാനെല്ലിയും നിര്‍വഹിക്കുന്നു. ചിത്രം ആമസോൺ പ്രൈം വഴി ഒടിടി റിലീസും നടത്തിയിട്ടുണ്ട്.
