ആവി പറക്കുന്ന നല്ല ചൂടൻ കൊഴുക്കട്ട, കഴിക്കേണ്ടത് തന്നെയാണ് …| kozhukkatta-easy-recipe

കൊഴുക്കട്ട കേരളീയരുടെ നാടൻ പലഹാരങ്ങളിൽ ഒന്നാണ്. വറുത്തെടുത്ത അരിപ്പൊടിയിൽ ശർക്കരയും തേങ്ങയും വച്ച് ഉരുട്ടി ആവിയിൽ വേവിച്ചെടുക്കുന്ന നല്ല ചൂടൻ കൊഴുക്കട്ട കഴിക്കേണ്ടതു തന്നെയാണ്

ചേരുവകൾ

• ശർക്കര പൊടിച്ചത്- 1¼ കപ്പ്
• വെള്ളം- ¼ + 2½ കപ്പ്
• തേങ്ങ-  2 കപ്പ്
• ജീരകം- ½ ടീസ്പൂൺ
• ഏലയ്ക്ക- 6 എണ്ണം
• അരിപ്പൊടി- 2½ കപ്പ്
• ഉപ്പ്- ½ ടീസ്പൂൺ
• നെയ്യ്-  ½ ടേബിൾസ്പൂൺ
• വെളിച്ചെണ്ണ-  ½ ടേബിൾസ്പൂൺ

തയ്യാറാക്കുന്ന വിധം

• ഒരു പാൻ അടുപ്പിൽ വെച്ച് ഒന്നേമുക്കാൽ കപ്പ് ശർക്കര പൊടിച്ചതിലേയ്ക്ക് കാൽ കപ്പ് വെള്ളം ചേർത്തിളക്കി അലിയിച്ചെടുക്കുക.
• അതിലേയ്ക്ക്  രണ്ട് കപ്പ് തേങ്ങ ചിരകിയത് ചേർത്തിളക്കി വെള്ളം വറ്റിച്ചെടുക്കുക.
• ഇതിലേയ്ക്ക് അര ടീസ്പൂൺ ചെറിയ ജീരകം പൊടിച്ചത്, ഏലയ്ക്ക ആറെണ്ണം പൊടിച്ചത് എന്നിവ ചേർത്തിളക്കി മാറ്റി വെയ്ക്കുക.
• മറ്റൊരു പാനിൽ രണ്ടരകപ്പ് വെള്ളം തിളപ്പിക്കുക.
• അതിലേയ്ക്ക് അര ടീസ്പൂൺ ഉപ്പ് ചേർക്കുക.
• വെള്ളം തിളച്ചതിനു ശേഷം അടുപ്പിൽ നിന്നു മാറ്റുക.
• ഒരു ബൗളിലേയ്ക്ക് രണ്ടര കപ്പ്  അരിപ്പൊടിയെടുത്ത് ചൂടാക്കിയ വെള്ളം കുറച്ചു വീതം ഒഴിച്ച് മാവ് തയ്യാറാക്കിയെടുക്കുക.
• ഇതിലേയ്ക്ക് അര ടേബിൾസ്പൂൺ നെയ്യ് കൂടി ചേർക്കുക.
• മാവ് ചെറിയ ഉരുളകളാക്കിയെടുക്കുക.
• അവയ്ക്കുള്ളിലായി തേങ്ങ ചേർത്ത അരപ്പ് വെയ്ക്കുക.
• ഈ​ ഉരുളകൾ ഇഡ്ഡലി തട്ടിൽ വെച്ച് ആവിയിൽ വേവിച്ചെടുക്കുക.

content highlight: kozhukkatta-easy-recipe