അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.രാജ്യത്തിന്റെ സാമ്പത്തിക മേഖലയില്‍ വലിയ കുതിച്ചുകയറ്റം സൃഷ്ടിക്കാന്‍ കഴിയുന്ന ഒരു ബജറ്റാണ് കേന്ദ്ര ധനമന്ത്രി അവതരിപ്പിച്ചതെന്ന് കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റും കോണ്‍ഫെഡറേഷന്‍ ഓഫ് ഓള്‍ ഇന്ത്യ ട്രേഡേഴ്‌സ് ദേശീയ സെക്രട്ടറിയുമായ എസ്. എസ്. മനോജ് പറഞ്ഞു. എന്നാല്‍ രാജ്യത്തിന്റെ വികസന പാതയില്‍ പങ്കാളികളാകുവാന്‍ റീട്ടെയില്‍ വ്യാപാരികളെ അനുവദിക്കാത്ത ഒരു ബഡ്ജറ്റ് കൂടിയാണെന്നും അദ്ദേഹം കൂട്ടിച്ചേര്‍ത്തു. കാര്‍ഷിക വ്യവസായിക ആരോഗ്യം ടൂറിസം ഉള്‍പ്പെടെ സമസ്ത മേഖലകളിലും വിപ്ലവകരമായ മുന്നേറ്റം നടത്തുവാന്‍ നമുക്ക് സാധിക്കും. എന്നാല്‍ രാജ്യത്തിന്റെ സമ്പദ് വ്യവസ്ഥിതിയില്‍ നിര്‍ണായകമായ പങ്കുവഹിക്കുന്ന റീട്ടെയില്‍ വ്യാപാര മേഖലയില്‍ പണിയെടുക്കുന്ന ഏഴു കോടിയിലധികം വരുന്ന റീട്ടെയില്‍ വ്യാപാരികളുടെ പ്രശ്‌നങ്ങള്‍ക്ക് പരിഹാരം കാണുന്ന തരത്തിലുള്ള പരാമര്‍ശങ്ങള്‍ പതിവുപോലെ തന്നെ ഈ ബ്ജറ്റിലും കണ്ടില്ല. ഓണ്‍ലൈന്‍ കുത്തകകളെ നിയന്ത്രിക്കുന്ന തരത്തിലുള്ള പ്രഖ്യാപനങ്ങളും ഈ ബജറ്റില്‍ ഉണ്ടായില്ല.
കിസാന്‍ ക്രെഡിറ്റ് കാര്‍ഡ് സംവിധാനം കൊണ്ടുവരുന്ന ഭാരതത്തില്‍ വ്യാപാരികളെ കൂടി സമാനമായ ഒരു ക്രെഡിറ്റ് കാര്‍ഡ് ശൃംഖലയില്‍ കൊണ്ടുവരണമെന്ന് അദ്ദേഹം ആവശ്യപ്പെട്ടു. 2017 മുതല്‍ നടപ്പിലാക്കിയ ജി.എസ്.ടി യിലെ അപാകതകള്‍ മൂലം ചെറുകിട വ്യാപാരികള്‍ ഇപ്പോഴും ദുരിതം അനുഭവിക്കുന്നു. ആയതിനു പരിഹാരം കാണുന്ന പ്രഖ്യാപനങ്ങള്‍ കണ്ടില്ല എന്നുള്ളതും എടുത്തു പറയേണ്ട കാര്യമാണ്. ആദായനികുതി, ടി.ഡി.എസ്. പരിധികള്‍ ഉയര്‍ത്തിയതും സ്വാഗതം ചെയ്യുന്നു എന്നും അദ്ദേഹം പറഞ്ഞു.
