നിങ്ങൾ ക്ലച്ച് ചവിട്ടുന്നത് ഇങ്ങനെയാണോ ? എങ്കിൽ സൂക്ഷിക്കുക !

പലരും വൈരാഗ്യം തീർക്കുന്നതുപോലെയാണ് ക്ലച്ചിനെ ചവുട്ടിത്തേയ്ക്കുന്നത്. ക്ലച്ച് കേബിളും പാഡും മാറ്റേണ്ടി വരുമ്പോൾ മാത്രമാണ് അതോർത്ത് പശ്ചാത്തപിക്കേണ്ടി വരുന്നത്. ക്ലച്ച് നേരേചൊവ്വേ ചവുട്ടിയില്ലെങ്കിൽ വലിയ വില കൊടുക്കേണ്ടിവരും എന്നതു തന്നെ കാര്യം. സര്‍വസാധാരണമായ ചില ഡ്രൈവിങ് ശീലങ്ങളും നമ്മുടെ കാറിന്റെ ക്ലച്ചിന്റെ ആയുസ് കുറക്കും. ശരാശരി 70,000 കീലോമീറ്റര്‍ സുഖമായി ലഭിക്കുന്ന ക്ലച്ച് പ്രത്യേക അവസരങ്ങളില്‍ വെറും 10,000 കീലോമീറ്ററാവുമ്പോഴേക്കും മാറ്റേണ്ടിയും വരാറുണ്ട്. ക്ലച്ചിന്റെ ആരോഗ്യം ഉറപ്പാക്കാന്‍ എന്തൊക്കെ ശ്രദ്ധിക്കണം?

ക്ലച്ചിനുണ്ടാവുന്ന തേയ്മാനത്തിന് ഡ്രൈവിങ് ശീലങ്ങള്‍ക്ക് വലിയ പങ്കുണ്ട്. മികച്ച ഡ്രൈവിങ് ശീലമുള്ളയാളുടെ കൈവശമുള്ള വാഹനത്തില്‍ ഒരു ലക്ഷം കീലോമീറ്റര്‍ വരെയൊക്കെ ക്ലച്ച് വലിയ കുഴപ്പം വരാതെ ഇരിക്കാറുണ്ട്. ഇനി നമ്മുടെ ഡ്രൈവിങ് രീതികള്‍ അനുയോജ്യമല്ലെങ്കില്‍ വെറും 10,000 കീലോമീറ്ററിനുള്ളില്‍ പോലും ക്ലച്ച് മാറ്റേണ്ടി വരാറുമുണ്ട്.

വാഹനം ഓടിക്കുമ്പോഴും മറ്റും ഒരു കാര്യവുമില്ലാതെ ഗിയര്‍ ലിവറില്‍ കൈ വെക്കുന്ന ശീലമുള്ളവരുണ്ടാവും. ആ ശീലം അത്ര നല്ലതല്ല. പ്രത്യേകിച്ച് ക്ലച്ചിന്റെ ആരോഗ്യത്തിന്. ആവശ്യത്തിന് മാത്രം ഗിയര്‍ ലിവറിന് മുകളില്‍ കൈ വെക്കുന്നതാണ് നല്ലത്.

താഴ്ന്ന ഗിയറില്‍ പോവുമ്പോള്‍ വാഹനം വലിയ രീതിയില്‍ കുലുങ്ങുന്നുണ്ടെങ്കില്‍ അതും ക്ലച്ചിന്റെ പ്രശ്‌നങ്ങളിലേക്കുള്ള സൂചനയാവാം.

ഡ്രൈവിങ് സമയത്ത് ക്ലച്ചില്‍ അറിയാതെ കാല്‍ അമര്‍ന്നിരിക്കുന്നതാണ് മറ്റൊരു പ്രശ്‌നം. ക്ലച്ച് പെഡലിന്റെ ആവശ്യം കഴിഞ്ഞാല്‍ കാല്‍ ക്ലച്ചില്‍ നിന്നും മാറ്റി വെക്കുന്നതാണ് നല്ലത്. ഡ്രൈവിങിനിടെ കാല്‍ ക്ലച്ച് പെഡലില്‍ വെറുതേ വെക്കുന്ന ശീലവും ക്ലച്ചിന്റെ നാശത്തിനു കാരണമാവും.

ചിലര്‍ താഴ്ന്ന ഗിയറില്‍ വാഹനം ഇരമ്പിച്ചു കൊണ്ടുപോവുന്നത് കണ്ടിട്ടില്ലേ. ഇത് അല്‍പം നീണ്ടുപോയാല്‍ അവിടെയും കുഴപ്പം നീളുക ക്ലച്ചിലേക്കാണ്. ഓരോ ഗിയറിനും അനുയോജ്യമായ വേഗതയുണ്ട്. ആ വേഗതയിലും കൂടുതലായാല്‍ ഉയര്‍ന്ന ഗിയറിലേക്കു മാറണം. ഗിയര്‍ മാറുന്നത് സാവധാനം മതി.

ഡ്രൈവിങിനിടെ ക്ലച്ച് വഴുതിപോവുന്ന അനുഭവമുണ്ടെങ്കില്‍ ക്ലച്ച് തേഞ്ഞിരിക്കുന്നുവെന്നതിന്റെ സൂചനയാണ്. കാര്‍ ഗിയറിലിട്ട് എടുക്കുന്നതിന് പതിവിലും സമയമെടുക്കുന്നുണ്ടെങ്കിലും ആവശ്യത്തിലേറെ ആര്‍പിഎം വേണ്ടി വരുന്നുണ്ടെങ്കിലും ക്ലച്ചിന്റെ പ്രശ്‌നങ്ങളിലേക്കാണ് വിരല്‍ ചൂണ്ടുന്നത്.

ഗിയര്‍ മാറാന്‍ അനായാസം സാധിക്കുന്നില്ലെങ്കില്‍ അതും വാഹനത്തിന്റെ ക്ലച്ചിനു സംഭവിച്ച തേയ്മാനമാവാം കാരണം. ഗിയര്‍മാറ്റാന്‍ നോക്കുമ്പോള്‍ ആദ്യ ശ്രമത്തില്‍ തന്നെ ഗിയര്‍ വീഴുന്നില്ലെങ്കിലും കൂടുതല്‍ സമയമെടുക്കുന്നുണ്ടെങ്കിലും ക്ലച്ച് പ്രശ്‌നത്തിലേക്കാണെന്നതിന്റെ സൂചനയായി കണക്കാക്കാം.

വാഹനം ഓടിക്കുമ്പോള്‍ സംഭവിക്കുന്ന ഏത് അപശബ്ദവും ശ്രദ്ധിക്കണം. ക്ലച്ച് റിലീസ് ചെയ്യുമ്പോള്‍ പ്രത്യേകം ശബ്ദം വരുന്നുണ്ടെങ്കിലോ ഈ ശബ്ദം ക്ലച്ച് വിട്ട ശേഷം അവസാനിക്കുന്നുണ്ടെങ്കിലോ ശ്രദ്ധിക്കണം.