തിരുവനന്തപുരം: പാർട്ടി ആവശ്യപ്പെട്ടാൽ എൻസിപിയുടെ സംസ്ഥാന പ്രസിഡൻ്റ് സ്ഥാനം ഏറ്റെടുക്കുമെന്ന് തോമസ് കെ തോമസ് എംഎൽഎ. പാർട്ടിയിൽ താൻ സംസ്ഥാന പ്രസിഡൻ്റാകണമെന്ന് ആവശ്യം ഉയരുന്നുണ്ട്. പാർട്ടിയെ ഒറ്റക്കെട്ടായി കൊണ്ടുപോകലാണ് പ്രധാനം എന്നും അദ്ദേഹം പറഞ്ഞു.
പിസി ചാക്കോയുടെ രാജിയുടെ കാരണം അറിയില്ല. ചാക്കോ പലപ്പോഴും തീരുമാനങ്ങൾ എടുത്തത് ഒറ്റക്കായിരുന്നു. കൂടെ നിന്നവർ പറയുന്നത് അതേ പടി വിശ്വസിക്കുന്ന സ്വഭാവമാണ് ചാക്കോയ്ക്ക്. പാർട്ടി യോഗങ്ങളിൽ ഒഴിവാക്കേണ്ട പല പരാമർശങ്ങൾ ചാക്കോ നടത്തി. പിസി ചാക്കോ പാർട്ടി വിടില്ലെന്നും പാർട്ടിയിൽ പിളർപ്പുണ്ടാകില്ലെന്നും എൽഡിഎഫിൽ ഉറച്ചുനിൽക്കുമെന്നും തോമസ് പറഞ്ഞു. ശശീന്ദ്രനെ പുകഴ്ത്തിയ അദ്ദേഹം എകെ ശശീന്ദ്രൻ മികച്ച നേതാവാണെന്നും പറഞ്ഞു.
എ.കെ.ശശീന്ദ്രനെ മാറ്റി തോമസ് കെ.തോമസിനെ മന്ത്രിയാക്കാന്‍ പി.സി.ചാക്കോ നടത്തിയ നീക്കങ്ങള്‍ നടക്കാതെ വന്നതോടെയാണ് അധ്യക്ഷ പദവി ഒഴിഞ്ഞതെന്നും റിപ്പോര്‍ട്ടുകളുണ്ട്. ഇതിനിടെ ശശീന്ദ്രനും തോമസ്.കെ.തോമസും കൈകോര്‍ക്കുകയും ചെയ്തു. ശശീന്ദ്രന്‍ മന്ത്രിസ്ഥാനത്ത് ഉറച്ചതോടെ തോമസ്.കെ.തോമസിനൊപ്പം നേരത്തെ നിന്നിരുന്ന പല ജില്ലാഭാരവാഹികളും ശശീന്ദ്രന്‍ പക്ഷത്തേക്ക് മാറിയിരുന്നു.