എളുപ്പത്തിൽ തയ്യാറാക്കാവുന്ന ഒരു തൈര് കറി പരീക്ഷിച്ചാലോ?

കുറഞ്ഞ ചേരുവകൾ ഉപയോഗിച്ച് വളരെ പെട്ടെന്ന് രുചികരമായി എളുപ്പത്തിൽ ഒരു തൈര് കറി പരീക്ഷിച്ചാലോ?

ആവശ്യമായ ചേരുവകൾ

• തൈര് ഒരു കപ്പ്
• ഇഞ്ചി ഒരുകഷ്ണം ചെറുതായി അരിഞ്ഞത്
• തേങ്ങ കുറച്ച്
• പച്ചമുളക് ആവശ്യത്തിന്
• ഉപ്പ്
• ഉണക്കമുളക്
• കറിവേപ്പില
• കടുക്

തയ്യാറാക്കുന്ന വിധം

ആദ്യം തന്നെ ഒരു മിക്സിയുടെ ജാറിലേക്ക് മീഡിയം വലിപ്പത്തിൽ അരിഞ്ഞുവെച്ച ഇഞ്ചി കഷണങ്ങൾ ഇട്ടുകൊടുക്കുക. അതിലേക്ക് തേങ്ങയും, പച്ചമുളകും, ഒരു ടീസ്പൂൺ തൈരും കൂടി ചേർത്ത് പേസ്റ്റ് രൂപത്തിൽ അരച്ചെടുക്കുക. ഈ ഒരു കൂട്ട് നന്നായി അരയുമ്പോൾ രണ്ട് ടീസ്പൂൺ തൈര് കൂടി അതിലേക്ക് ഒഴിച്ച് മിക്സിയുടെ ജാറിലിട്ട് കുറച്ചുകൂടി അരച്ചെടുക്കാം.

ഈ കൂട്ട് തൈരിലേക്ക് ചേർത്ത് നല്ലതുപോലെ മിക്സ് ചെയ്യുക. കറിയുടെ അളവിനനുസരിച്ച് ആവശ്യാനുസരണം വെള്ളമൊഴിക്കാം . ആവശ്യത്തിന് ഉപ്പ് കൂടി ചേർക്കാം. കടുക് പൊട്ടിക്കാനായി പാൻ ചൂടാക്കി വെളിച്ചെണ്ണ ഒഴിച്ച് അതിലേക്ക് കടുകും, ചെറുതായി അരിഞ്ഞെടുത്ത ഇഞ്ചിയും, ഉണക്കമുളകും, കറിവേപ്പിലയും കൂടി ഇടുക. ഈ താളിപ്പ് കറിയിലേക്ക് ചേർത്ത് നല്ലതുപോലെ മിക്സ് ചെയ്യുക.