അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.സി.ഐ.ടി.യു-ഡി.വൈ.എഫ്.ഐ പ്രവര്‍ത്തകനായ പത്തനംതിട്ട പെരുനാട് മഠത്തുംമൂഴിയില്‍ മാമ്പാറ പട്ടാളത്തറയില്‍ ജിതിന്‍ ഷാജിയെ ആര്‍.എസ്.എസ് – ബി.ജെ.പി പ്രവര്‍ത്തകര്‍ അതിക്രൂരമായി കുത്തിയും വെട്ടിയും കൊലപ്പെടുത്തിയ സംഭവത്തില്‍ സി.പി.എം സംസ്ഥാന സെക്രട്ടറിയേറ്റ് ശക്തമായി പ്രതിഷേധിച്ചു. കൊലപാതകത്തിന് ദൃക്സാക്ഷികളായവര്‍ തന്നെ കൊലപ്പെടുത്തിയ വിധവും ആരൊക്കെയാണ് സംഘത്തിലുണ്ടായിരുന്നതെന്നും വ്യക്തമാക്കിയിട്ടുണ്ട്. പോലീസ് ഏതാനും പേരെ കസ്റ്റഡിയില്‍ എടുത്തിട്ടുണ്ട്.
മുഴുവന്‍ പ്രതികളെയും അറസ്റ്റ് ചെയ്ത് നിയമപരമായ ശിക്ഷ ഉറപ്പാക്കണം. നാട്ടിലെ സമാധാന അന്തരീക്ഷം തകര്‍ക്കാനുള്ള ആര്‍.എസ്.എസ് നീക്കത്തിന്റെ ഭാഗമാണ് ഈ കൊലപാതകം. ശക്തമായ നടപടികളിലൂടെ ക്രിമിനലുകളെ നിയന്ത്രിക്കണം. നാട്ടിലെ സൈര്വജീവിതം തകര്‍ക്കാന്‍ വിവിധ തലങ്ങളില്‍ ഗൂഢാലോചന നടക്കുന്നുണ്ട്. സംസ്ഥാനം നാളിതുവരെ കാണാത്ത വികസനത്തിലൂടെയും മതനിരപേക്ഷത ഉയര്‍ത്തിപ്പിടിച്ച് ലോകത്തിന് തന്നെ മാതൃകയാകും വിധവുമാണ് കടന്നു പോകുന്നത്. ഈ അന്തരീക്ഷം തകര്‍ക്കലാണ് ലക്ഷ്യം. സംഘര്‍ഷമുണ്ടാക്കാനല്ല പ്രശ്നങ്ങള്‍ പറഞ്ഞു തീര്‍ക്കാനാണ് ജിതിന്‍ അവിടെയെത്തിയതെന്ന് ഇതിനകം വ്യക്തമായി.
ആയുധങ്ങളുമായി അവിടെയെത്തിയ ആര്‍.എസ്.എസ് – ബി.ജെ.പി പ്രവര്‍ത്തകര്‍ ആസൂത്രികമായി നടത്തിയ കൊലപാതകമാണിത്. ജിതിന്റെ വയറിനും തുടയിലും അടക്കം ആഴത്തിലുള്ള ഒട്ടേറെ മുറിവുകളുണ്ട്. വിരല്‍ അറ്റുപോയി. ജിതിനെ വെട്ടിയ ജിഷ്ണു സജീവ ബി.ജെ.പി പ്രവര്‍ത്തകനാണ്. കൊല നടത്തിയ ശേഷം ഇപ്പോള്‍ ബി.ജെ.പി നേതാക്കള്‍ കൈമലര്‍ത്തുകയാണ്. ക്രിമിനല്‍ സംഘങ്ങളെ വളര്‍ത്തി സി.പി.എമ്മിനെതിരെ തിരിക്കുന്നത് കാലങ്ങളായി ബി.ജെ.പി തുടര്‍ന്നു വരുന്ന ഹീനമായ രാഷ്ട്രീയമാണ്. വിഷ്ണു ഉള്‍പ്പെടെ കൊലപാതകത്തില്‍ പങ്കുള്ളവരെല്ലാം ബി.ജെ.പി യുടെ ക്രിമിനല്‍ സംഘത്തിലുള്ളവരാണ്.
ആര്‍.എസ്.എസ് – ബി.ജെ.പി സംഘം കൊലക്കത്തി താഴെ വയ്ക്കണം. ഇവര്‍ നടത്തിയ അക്രമത്തില്‍ പാര്‍ടിക്ക് നിരവധി പ്രവര്‍ത്തകരെയും നേതാക്കളെയും നഷ്ടപ്പെടുകയും ഗുരുതരമായി പരിക്കേറ്റ് അനവധിപേര്‍ ജീവഛവമാകുകയും ചെയ്തു. 2021 ഡിസംബര്‍ 02 നാണ് പത്തനംതിട്ട പെരിങ്ങരയില്‍ ലോക്കല്‍ സെക്രട്ടറിയായിരുന്ന പി.ബി. സന്ദീപിനെ ആര്‍.എസ്.എസ് ക്രിമിനലുകള്‍ അരുംകൊല ചെയ്തത്. എതിരാളികളെ ഉന്മൂലനം ചെയ്യുകയെന്ന പ്രാകൃതമായ രീതി ബി.ജെ.പി ഉപേക്ഷിക്കണം. പത്തനംതിട്ട കൊലപാതകത്തില്‍ ജനാധിപത്യ വിശ്വാസികളായ മുഴുവന്‍ പേരും പ്രതിഷേധിക്കാന്‍ രംഗത്തുവരണമെന്നും സംസ്ഥാന സെക്രട്ടറിയേറ്റ് പ്രസ്താവനയില്‍ പറഞ്ഞു.
CONTENT HIGH LIGHTSL;Strong protest over Jit’s murder: RSS-BJP group should put down the knife; Conspiracy to disrupt peaceful atmosphere: CPM
