അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആര്‍ത്തവസമയത്ത് അടിവയറ്റില്‍ അസ്വസ്ഥതയും ചെറിയ വേദനയും അനുഭവിച്ചിട്ടില്ലാത്തവര്‍ വിരളമാണ്. ചിലരില്‍ അടിവയറ്റിനും നടുവിനും വേദന, ഇതോടൊപ്പം തുടയുടെ ഉള്‍ഭാഗത്തു വേദന, ഛര്‍ദ്ദി, തലവേദന, തലചുറ്റി വീഴുക തുടങ്ങിയ പ്രശ്‌നങ്ങളും ഉണ്ടാവുന്നു. ചിലര്‍ക്ക് ആ സമയത്ത് ശബ്ദം, മണം എന്നിവ പോലും അസഹ്യമായി തോന്നാം. ആദ്യദിവസങ്ങളില്‍ മൂന്നോ നാലോ മണിക്കൂര്‍ വരെ നീണ്ടുനില്‍ക്കുന്ന വേദനയാണ് സര്‍വസാധാരണം. ചിലര്‍ക്ക് ഒന്നോ രണ്ടോ ദിവസം വേദന നീണ്ടുനില്‍ക്കാം.
പതിവായി ആര്‍ത്തവസമയത്തോട് അനുബന്ധമായി നടുവേദന അനുഭവപ്പെടുന്നുണ്ടെങ്കില്‍ അത് തീര്‍ച്ചയായും മാനസികമായും ബാധിക്കാം. പല കാരണങ്ങള്‍ കൊണ്ടും ഇത്തരത്തില്‍ ആര്‍ത്തവസമയത്ത് നടുവേദനയുണ്ടാകാം. ഈ കാരണങ്ങളിലേക്കാണിനി കടക്കുന്നത്.
എന്തുകൊണ്ട് ആര്‍ത്തവസമയത്ത് നടുവേദന?
ആര്‍ത്തവത്തോട് അനുബന്ധമായുണ്ടാകുന്ന ഹോര്‍മോണ്‍ വ്യതിയാനങ്ങളെ കുറിച്ച് ഏവര്‍ക്കുമറിയാമല്ലോ. ഈ ഹോര്‍മോണ്‍ വ്യതിയാനങ്ങള്‍ പല തരത്തിലുള്ള ആന്തരീകപ്രവര്‍ത്തനങ്ങള്‍ക്കും കാരണമാകുന്നതോടെ നടുവേദന അനുഭവപ്പെടാം.
ആര്‍ത്തവസമയത്ത് നല്ലതുപോലെ രക്തസ്രാവമുണ്ടാകുമ്പോള്‍ സ്വകാര്യഭാഗത്ത് തിങ്ങിനിറഞ്ഞത് പോലുള്ള അവസ്ഥയുണ്ടാകാം. ഇത് നാഡികള്‍ക്ക് നല്‍കുന്ന മര്‍ദ്ദവും നടുവേദനയ്ക്ക് കാരണമാകാം.
ചിലരില്‍ എൻഡോമെട്രിയോസിസ് എന്ന രോഗവും ആര്‍ത്തവസമയത്തെ വേദനയ്ക്ക് കാരണമായി വരാം. ഗര്‍ഭപാത്രത്തിന്‍റെ അകത്തെ ഭിത്തിയില്‍ പുറത്തേക്ക് വളര്‍ച്ചയുണ്ടാകുന്ന അവസ്ഥയാണിത്. ആര്‍ത്തവസംബന്ധമായ പല ക്രമക്കേടുകള്‍ക്കും എൻഡോമെട്രിയോസിസ് കാരണമാകാം.
പിഐഡി (പെല്‍വിക് ഇൻഫ്ലമേറ്ററി ഡിസീസ്) അഥവാ സ്ത്രീകളുടെ പ്രത്യുത്പാദന വ്യവസ്ഥയെ ബാധിക്കുന്ന മറ്റൊരു രോഗം, ഫൈബ്രോയിഡ്സ് അല്ലെങ്കില്‍ സിസ്റ്റ് എന്നറിയപ്പെടുന്ന ഗര്‍ഭപാത്രത്തിനകത്ത് അസാധാരണമായി മുഴകള്‍ (ദ്രാവകം നിറഞ്ഞത്) കാണുന്ന അവസ്ഥ- എല്ലാം ആര്‍ത്തവ വേദനയ്ക്കും മറ്റ് പ്രയാസങ്ങള്‍ക്കുമെല്ലാം കാരണമാകാം.
ടിപ്സ്…
ഇരുന്ന് ജോലി ചെയ്യുമ്പോഴോ, നില്‍ക്കുമ്പോഴോ, കിടക്കുമ്പോഴോ എല്ലാം ശരീരത്തിന്‍റെ പോസ്ച്ചര്‍ കൃത്യമായി പാലിക്കാൻ ശ്രമിച്ചാലും വേദന അല്‍പം കുറയ്ക്കാം.
ആര്‍ത്തവവേദനയെ പല രീതിയിലും ലഘൂകരിക്കാം. ചൂട് വയ്ക്കുന്നത് നല്ലൊരു രീതിയാണ്. അതുപോലെ ചെറിയ രീതിയിലുള്ള വ്യായാമങ്ങള്‍ ഈ സമയത്ത് ചെയ്യുന്നതും വേദനയ്ക്ക് ആക്കം നല്‍കാം.
ആര്‍ത്തവസമയത്തെ വേദനയ്ക്ക് പെയിൻ കില്ലേഴ്സ് കഴിക്കുകയും ചെയ്യാം. പലരും ഇത് ചെയ്യരുത് എന്ന് നിഷ്കര്‍ഷിക്കാറുണ്ട്. ഇക്കാര്യത്തില്‍ സംശയങ്ങളുണ്ടെങ്കില്‍ ഒരു ഗൈനക്കോളജിസ്റ്റിനോട് ആ സംശയം ചോദിച്ച് നിവാരണം ചെയ്യാം.
പൊതുവെ ആര്‍ത്തവസമയത്ത് സ്ട്രെസുകളിലൂടെ പോകാതിരിക്കുന്നതാണ് നല്ലത്. സ്ട്രെസ് അകറ്റുന്നതിനായി എന്തെല്ലാം കാര്യങ്ങള്‍ ചെയ്യാമോ അവയിലെല്ലാം മുഴുകാം. കാരണം സ്ട്രെസും ആര്‍ത്തവ വേദനയ്ക്കും മറ്റ് പ്രയാസങ്ങള്‍ക്കും കാരണമായി വരാറുണ്ട്.
content highlight : why-back-pain-during-periods-here-are-the-reasons
