അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കേരളത്തിലെ ഇടുക്കി ജില്ലയിലെ മൂന്നാറിന് കിഴക്കായി 45 കിലോമീറ്റർ അകലെയായി തമിഴ്നാട് അതിർത്തിയോട് ചേർന്ന് സ്ഥിതിചെയ്യുന്ന മനോഹരമായ ഒരു ഗ്രാമമാണ് വട്ടവട. സമുദ്രനിരപ്പിൽ നിന്ന് ഏകദേശം 6,000 അടി ഉയരത്തിലുള്ള ഈ പ്രദേശം വർഷം മുഴുവൻ സുഖകരമായ കാലാവസ്ഥയും സമൃദ്ധമായ കാർഷിക സമ്പത്തും കൊണ്ട് പ്രശസ്തമാണ്.
വൈവിധ്യമാർന്ന പച്ചക്കറികളും പഴവർഗങ്ങളും കൃഷി ചെയ്യുന്ന വട്ടവടയെ കേരളത്തിന്റെ പച്ചക്കറി ഗ്രാമം എന്നറിയപ്പെടുന്നു. കാരറ്റ്, ബീറ്റ്റൂട്ട്, ഉരുളക്കിഴങ്ങ്, ബീൻസ്, കാബേജ്, സ്‌ട്രോബെറി, പാഷൻ ഫ്രൂട്ട്, പീച്ച് തുടങ്ങിയവ ഇവിടെ പ്രധാനമായും കൃഷി ചെയ്യപ്പെടുന്നു.
പ്രകൃതിയുടെ മനോഹാരിതയും സമൃദ്ധമായ കാർഷിക പൈതൃകവും കൊണ്ട് വട്ടവട വിനോദസഞ്ചാരികൾക്ക് ആകർഷക കേന്ദ്രമാണ്. ഇവിടെനിന്ന് കൊടൈക്കനാൽ, ടോപ്‌സ്റ്റേഷൻ, മാട്ടുപ്പെട്ടി, കാന്തല്ലൂർ, മീശപ്പുലിമല തുടങ്ങിയ സ്ഥലങ്ങളിലേക്ക് ട്രെക്കിംഗ് മാർഗങ്ങൾ ലഭ്യമാണ്, ഇത് സാഹസിക യാത്രകൾക്ക് താൽപ്പര്യമുള്ളവർക്ക് അനുയോജ്യമാണ്.
വട്ടവടയിലെ തണുത്ത കാലാവസ്ഥയും പ്രകൃതിയുടെ സുന്ദര്യവും അനുഭവിക്കാൻ നിരവധി സഞ്ചാരികൾ ഇവിടെ എത്തുന്നു. കൂടാതെ, ഇവിടെ താമസിക്കുന്ന ആദിവാസി സമൂഹത്തിന്റെ സമ്പന്നമായ സംസ്കാരവും പൈതൃകവും സന്ദർശകരുടെ ശ്രദ്ധ ആകർഷിക്കുന്നു.
വട്ടവടയിലേക്കുള്ള യാത്രയ്ക്കൊരുങ്ങുമ്പോൾ നിരവധി കാര്യങ്ങൾ ശ്രദ്ധിക്കേണ്ടതുണ്ട്.
മൂന്നാർ ടൗണിൽ നിന്ന് 35 കിലോമീറ്റർ അകലെയുള്ള പാമ്പാടും ഷോല നാഷണൽ പാർക്ക്. തമിഴ്നാട്ടിലെ ഡിണ്ടിഗൽ ജില്ലയിലെ കൊടൈക്കനാലിൻ്റെ അതിർത്തിലാണ് ഈ ഭാഗം. മൂന്നാറിൽ നിന്ന് വടവട്ടയിലേക്കുള്ള യാത്ര വന്യമൃഗങ്ങളുടെ സാന്നിധ്യമുള്ള പാമ്പാടും ഷോള നാഷണൽ പാർക്കിനുള്ളിലൂടെയാണ്. ആറുമണിക്ക് മുൻപ് ചെക്ക് പോസ്റ്റിൽ എത്തണം. ഇവിടെ വാഹനത്തിൻ്റെ നമ്പരും വിവരങ്ങളും നൽകണം. ചെക്ക് പോസ്റ്റ് കടന്നാൽ അഞ്ച് കിലോ മീറ്റർ ദൂരം വനത്തിലൂടെയാണ് യാത്ര. ഈ ഭാഗത്ത് വാഹനങ്ങൾ നിർത്താനോ വീഡിയോ പകർത്താനോ ഫോട്ടോ എടുക്കാനോ പാടില്ല. ചെക്കുപോസ്റ്റിൽ നിന്ന് ഈ വിവരങ്ങൾ ലഭിക്കും. കാട്ടുപോത്ത് ഉൾപ്പെടെയുള്ള മൃഗങ്ങൾ റോഡിൽ ഉണ്ടാകും. അതിനാൽ ശ്രദ്ധിച്ചാകണം യാത്ര. വട്ടവടയിൽ നിന്ന് തിരികെ മൂന്നാറിലേക്ക് എത്താനാണ് പ്ലാൻ എങ്കിലും ഈ സമയം കർശനമായി പാലിക്കണം. രാത്രിയും ഏറെ വൈകിയുമുള്ള യാത്ര അപകടകരമാണ്.
വട്ടവടയിൽ പെട്രോൾ പമ്പുകൾ ഇല്ല എന്നതാണ് ശ്രദ്ധിക്കേണ്ട മറ്റൊരു കാര്യം. അതിനാൽ മൂന്നാറിൽ നിന്ന് യാത്ര ആരംഭിക്കുമ്പോൾ തന്നെ ആവശ്യത്തിനുള്ള ഇന്ധനം വാഹനത്തിൽ ഉണ്ടെന്ന് ഉറപ്പാക്കണം. വട്ടവടയിൽ ബ്ലാക്കിൽ ഇന്ധനം ലഭിക്കും. ഒരു ലിറ്റർ പെട്രോളിന് 120 രൂപയാണ് ഇത്തരത്തിൽ നൽകേണ്ടത്. വാഹനങ്ങൾക്ക് തകരാർ സംഭവിച്ചാൽ അവ പരിഹരിക്കാനാകുന്ന വർക് ഷോപ്പുകൾ ഇല്ല എന്നതും ശ്രദ്ധിക്കേണ്ടതാണ്.
വട്ടവട യാത്രയിൽ ശ്രദ്ധിക്കേണ്ട മറ്റൊരു കാര്യം താമസസൗകര്യമാണ്. വളരെ ചെറിയ കാർഷിക ഗ്രാമമായതിനാൽ തന്നെ താമസ സൗകര്യങ്ങളും കുറവാണ്. താമസസൗകര്യം മുൻകൂട്ടി ബുക്ക് ചെയ്ത ശേഷം മാത്രമാകണം ഇവിടേക്ക് എത്താൻ. ഹോം സ്റ്റേ സംവിധാനങ്ങൾ പലയിടത്തും ഉണ്ടെങ്കിലും മതിയായ സൗകര്യങ്ങളുടെ കുറവുണ്ട്. ഹോട്ടലുകൾ ഇല്ല എന്നുതന്നെ പറയാം. അതിനാൽ താമസിക്കാനായി കണ്ടെത്തുന്നയിടത്ത് ഭക്ഷണം ഉറപ്പാക്കണം. നെറ്റ് വർക്ക് പ്രശ്നവും അനുഭവപ്പെട്ടേക്കാം. ബിഎസ്എൻഎല്ലിനാണ് ഭൂരിഭാഗം ഭാഗത്തും സിഗ്നൽ ലഭിക്കുക. എടിഎം കൗണ്ടറുകളുടെ എണ്ണം കുറവായതിനാൽ ആവശ്യത്തിനുള്ള പണം കയ്യിൽ കരുതണം. വട്ടവട ടൗണിൽ നിന്ന് എറണാകുളത്തേക്കും തിരിച്ചും കെഎസ്ആർടിസി ബസ് സർവീസുകളുണ്ട്.
content highlight: vattavada-near-munnar
