അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ദക്ഷിണ വ്യോമസേനയും സെന്റര്‍ ഫോര്‍ എയര്‍ പവര്‍ സ്റ്റഡീസും (CAPS) സംയുക്തമായി ‘ഇന്ത്യന്‍ മഹാസമുദ്ര മേഖലയില്‍ വ്യോമ-നാവിക സേനയുടെ പോരാട്ട വീര്യം വര്‍ദ്ധിപ്പിക്കുക’ എന്ന വിഷയത്തില്‍ സെമിനാര്‍ സംഘടിപ്പിച്ചു. ദക്ഷിണ വ്യോമസേനാ ആസ്ഥാനത്ത് നടന്ന സെമിനാറില്‍ ചീഫ് ഓഫ് ഡിഫന്‍സ് സ്റ്റാഫ്, ജനറല്‍ അനില്‍ ചൗഹാന്‍ മുഖ്യാതിഥിയായിരുന്നു. വ്യോമസേനാ ഉപമേധാവി എയര്‍ മാര്‍ഷല്‍ എസ്പി ധാര്‍കരും സന്നിഹിതനായിരുന്നു.
വിശിഷ്ടാതിഥികളെ ദക്ഷിണ വ്യോമസേനാ മേധാവി എയര്‍ മാര്‍ഷല്‍ ബി മണികണ്ഠന്‍ സ്വീകരിച്ചു. നിലവിലെ ആഗോള സാഹചര്യത്തില്‍ തയ്യാറെടുപ്പിന്റെയും ജാഗ്രതയുടെയും ആവശ്യകതയെക്കുറിച്ച് ചീഫ് ഓഫ് ഡിഫന്‍സ് സ്റ്റാഫ് തന്റെ മുഖ്യ പ്രസംഗത്തില്‍ ഊന്നിപ്പറഞ്ഞു. ഇന്ത്യന്‍ മഹാസമുദ്ര മേഖലയിലെ ഇന്ത്യയുടെ സവിശേഷമായ ഭൂമിശാസ്ത്രപരമായ സ്ഥാനം സമുദ്രമേഖലയെ തന്ത്രപരമായ താല്‍പ്പര്യത്തിന്റെ സുപ്രധാന മേഖലയാക്കുന്നുവെന്ന് അദ്ദേഹം പറഞ്ഞു.
ദേശീയ താത്പര്യം സംരക്ഷിക്കുന്നതിനും ആവശ്യമായ പ്രതിരോധം സൃഷ്ഠിക്കുന്നതിനും, ഇന്ത്യന്‍ വ്യോമസേനയും ഇന്ത്യന്‍ നാവികസേനയും തമ്മിലുള്ള സമന്വയ പ്രവര്‍ത്തനങ്ങള്‍ ഉറപ്പാക്കേണ്ടത് പ്രധാനമാണ്. എയര്‍ മാര്‍ഷല്‍ എസ്പി ധാര്‍കര്‍ തന്റെ മുഖ്യ പ്രസംഗത്തില്‍ തത്സമയ രഹസ്യാന്വേഷണ വിഭാഗത്തിന്റെ പ്രാധാന്യവും മേഖലയില്‍ ഉയര്‍ന്നുവരുന്ന ഭീഷണികളെ നേരിടാന്‍ ഇന്ത്യന്‍ നാവികസേനയും ഇന്ത്യന്‍ വ്യോമസേനയും തമ്മിലുള്ള തടസ്സങ്ങളില്ലാത്ത ഏകോപനവും എടുത്തുപറഞ്ഞു.
രണ്ട് സെഷനുകളിലായി നടന്ന സെമിനാറില്‍ ദക്ഷിണ വ്യോമസേന, CAPS, ഇന്റഗ്രേറ്റഡ് ഡിഫന്‍സ് സ്റ്റാഫ് ആസ്ഥാനം, ഇന്ത്യന്‍ ആര്‍മി, ഇന്ത്യന്‍ നേവി എന്നിവിടങ്ങളിലെ സേവനമനുഷ്ഠിക്കുന്നവരും വിരമിച്ചവരുമായ മുതിര്‍ന്ന ഉദ്യോഗസ്ഥര്‍ പങ്കെടുക്കുകയും മാരിടൈം എയര്‍ ഓപ്പറേഷനുകളെ സംയോജിപ്പിക്കുന്നതിനെക്കുറിച്ചും പോരാട്ട ശക്തി വര്‍ധിപ്പിക്കുന്നതിനെക്കുറിച്ചും അവരുടെ കാഴ്ച്ചപ്പാടുകള്‍ അവതരിപ്പിച്ചു.
CAPS ഒരു സ്വയംഭരണ പ്രതിരോധ ഗവേഷണ-വിശകലന സ്ഥാപനമായി 2001-ല്‍ സ്ഥാപിതമായി, കൂടാതെ ദേശീയ സുരക്ഷ, പ്രതിരോധം, എയ്റോസ്പേസ് എന്നീ മേഖലകളിലെ ബന്ധപ്പെട്ട വിഷയങ്ങളില്‍ ശ്രദ്ധ കേന്ദ്രീകരിക്കുന്നു. നയരൂപീകരണത്തിലും തീരുമാനങ്ങള്‍ എടുക്കുന്നതിലും സംഭാവന ചെയ്യുന്നതിനൊപ്പം സായുധ സേനയ്ക്കും തന്ത്രപരമായ സമൂഹത്തിനും പൊതുജനങ്ങള്‍ക്കും ഇടയില്‍ ഈ വിഷയങ്ങളെക്കുറിച്ച് കൂടുതല്‍ മനസ്സിലാക്കാന്‍ സൗകര്യമൊരുക്കുക എന്നതാണ് ഇതിന്റെ ലക്ഷ്യം.
CONTENT HIGH LIGHTS; Center for Air Power Studies seminar organized by Southern Air Force
