അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ലോകത്തിലെ ഏറ്റവും ശക്തമായ സമുദ്ര പ്രവാഹത്തിന്‍റെ വേഗത കാലാവസ്ഥാ വ്യതിയാനം കാരണം അപകടകരമാം വിധം കുറയുമെന്ന് ഗവേഷകരുടെ മുന്നറിയിപ്പ്. ഗൾഫ് സ്ട്രീമിനേക്കാൾ നാലിരട്ടിയിലധികം വേഗത്തില്‍ ഘടികാരദിശയിലുള്ള പ്രവാഹമായ അന്‍റാർട്ടിക് സർക്കംപോളാർ കറന്‍റ് (ACC) സമുദ്ര പ്രവാഹം 2050-ഓടെ 20 ശതമാനം മന്ദഗതിയിലാവും എന്നാണ് അനുമാനം. അന്‍റാര്‍ട്ടിക്കയിലെ മഞ്ഞുരുകല്‍ വേഗത്തിലാവുകയും കടല്‍നിരപ്പ് ഉയരുകയും ചെയ്യുമെന്നും ഗവേഷകര്‍ മുന്നറിയിപ്പ് നല്‍കി. ഇത് സംബന്ധിച്ചുള്ള പഠനം എന്‍വിയോണ്‍മെന്‍റല്‍ റിസര്‍ച്ച് ലെറ്റേര്‍സ് പ്രസിദ്ധീകരിച്ചു. ഉയർന്ന കാർബൺ ബഹിര്‍ഗമനത്താല്‍ 2050 ആകുമ്പോഴേക്കും അന്‍റാര്‍ട്ടിക് സര്‍ക്കംപോളാര്‍ കറന്‍റിന്‍റെ വേഗം ഏകദേശം 20 ശതമാനം മന്ദഗതിയിലായേക്കാമെന്ന് മെൽബൺ സർവകലാശാലയിലെ ഗവേഷകർ നടത്തിയ പഠനം പറയുന്നു. കാലാവസ്ഥാ വ്യതിയാനം കാരണം അന്‍റാർട്ടിക്കയ്ക്ക് ചുറ്റുമുള്ള മഞ്ഞുപാളികൾ ഉരുകുന്നതാണ് ഈ മാന്ദ്യത്തിന് കാരണം.
ഗള്‍ഫ്‌ സ്ട്രീമിനേക്കാള്‍ നാലിരട്ടി വേഗമുള്ള അന്‍റാര്‍ട്ടിക് സര്‍ക്കംപോളാര്‍ സമുദ്ര പ്രവാഹം അറ്റ്‌ലാന്‍റിക്, പസഫിക്, ഇന്ത്യന്‍ മഹാസമുദ്രം എന്നിവയുമായി ബന്ധപ്പെട്ട് കിടക്കുന്നു. അന്‍റാര്‍ട്ടിക് സർക്കംപോളാർ കറന്‍റ് ഭൂമിയുടെ ആകെ കാലാവസ്ഥയില്‍ നിർണായക പങ്ക് വഹിക്കുന്നുണ്ട്. സമുദ്രത്തിലെ താപത്തിന്‍റെയും കാർബൺഡൈ ഓക്സൈഡിന്‍റേയും ആഗിരണം വഴി, ചൂടുള്ള ജലം അന്‍റാർട്ടിക്കയിൽ എത്തുന്നത് തടയുന്നത് ഈ സമുദ്രജല പ്രവാഹമാണ്. കാൻബറയിലെ ആക്‌സസ് നാഷണൽ റിസർച്ച് ഇൻഫ്രാസ്ട്രക്ചറിൽ സ്ഥിതി ചെയ്യുന്ന ഓസ്‌ട്രേലിയയിലെ ഏറ്റവും വേഗതയേറിയ സൂപ്പർ കമ്പ്യൂട്ടറും കാലാവസ്ഥാ സിമുലേറ്ററുമായ ഗാഡി (GADI) ഉപയോഗിച്ചാണ് ഗവേഷകർ താപനിലയിലെ വ്യതിയാനങ്ങൾ, ഐസ് ഉരുകൽ, കാറ്റിന്‍റെ അവസ്ഥ എന്നിവ അന്‍റാർട്ടിക് സർക്കംപോളാർ കറന്‍റിൽ ചെലുത്തുന്ന സ്വാധീനം വിശകലനം ചെയ്തത്. എൻവയോൺമെന്‍റൽ റിസർച്ച് ലെറ്റേഴ്സിൽ പ്രസിദ്ധീകരിച്ച ഗവേഷണ ഫലങ്ങൾ, അന്‍റാർട്ടിക് ഐസ് ഷെൽഫുകളിൽ നിന്ന് ഉരുകുന്ന ജലത്തിനും സർക്കംപോളാർ കറന്‍റ് സ്ലോഡൗണിനും ഇടയിലുള്ള വ്യക്തമായ ബന്ധം വെളിപ്പെടുത്തുന്നു. സർക്കംപോളാർ കറന്‍റിലുണ്ടാകുന്ന മാറ്റങ്ങള്‍ ഗുരുതരമായ പ്രത്യാഘാതങ്ങൾ ഉണ്ടാകുമെന്ന് പഠനത്തിന് നേതൃത്വം നൽകിയ അസോസിയേറ്റ് പ്രൊഫസർ ബിഷാഖ്‍ദത്ത ഗയേൻ മുന്നറിയിപ്പ് നല്‍കി.
മറ്റ് ഭൂഖണ്ഡങ്ങളിൽ നിന്നുള്ള സതേൺ ബുൾ കെൽപ്പ്, ചെമ്മീൻ, മോളസ്കുകൾ തുടങ്ങിയ അധിനിവേശ ജീവിവർഗ്ഗങ്ങളെ അന്‍റാർട്ടിക്കയിലേക്ക് എത്തുന്നത് എസിസി തടയുന്നുവെന്ന് പഠനം പറയുന്നു. എന്നാൽ എസിസി മന്ദഗതിയിലായാൽ, അത്തരം ജീവിവർഗ്ഗങ്ങൾ, ദുർബലമായ അന്‍റാർട്ടിക് ഭൂഖണ്ഡത്തിലേക്ക് കടക്കാനുള്ള സാധ്യത കൂടുതലാണ്, ഇത് ഭക്ഷ്യശൃംഖലയിൽ ഗുരുതരമായ പ്രത്യാഘാതമുണ്ടാക്കും. ഉദാഹരണത്തിന്, അന്‍റാർട്ടിക് പെൻഗ്വിനുകളുടെ ഭക്ഷണ രീതികളിൽ മാറ്റം ഇത് സൃഷ്ടിച്ചേക്കാം. കൂടുതൽ ചൂടുവെള്ളം അന്‍റാർട്ടിക് ഷെൽഫിലേക്ക് എത്തുകയും മഞ്ഞുരുകൽ ത്വരിതപ്പെടുത്തുകയും ഒഴുക്കിനെ കൂടുതൽ ദുർബലപ്പെടുത്തുകയും ചെയ്യുന്നത് ആവാസവ്യവസ്ഥയെയും ഭക്ഷ്യവലയങ്ങളെയും തടസപ്പെടുത്തുമെന്നും പഠനവുമായി ബന്ധപ്പെട്ട ഗവേഷകനും കാലാവസ്ഥാ ശാസ്ത്രജ്ഞനുമായ ഡോ. തൈമൂർ സൊഹൈൽ പറഞ്ഞു. മെൽബൺ സർവകലാശാലയിലെ ഗവേഷകർ, ഫ്ലൂയിഡ് മെക്കാനിസ്റ്റ് അസോസിയേറ്റ് പ്രൊഫസർ ബിഷഖ്ദത്ത ഗയേൻ, കാലാവസ്ഥാ ശാസ്ത്രജ്ഞൻ ഡോ. തൈമൂർ സൊഹൈൽ, നോർവീജിയൻ റിസർച്ച് സെന്‍ററിലെ സമുദ്രശാസ്ത്രജ്ഞൻ ഡോ. ആൻഡ്രിയാസ് ക്ലോക്കർ തുടങ്ങിയവരാണ് ഗവേഷക സംഘത്തിൽ ഉണ്ടായിരുന്നത്.
STORY HIGHLIGHTS: strongest-ocean-current-on-earth-could-slow-down-by-20-percentage-by-2050-study
