സ്ത്രീശക്തീകരണത്തിന്റെ തിളങ്ങുന്ന മാതൃക സൃഷ്ടിച്ച് അദാനി വിഴിഞ്ഞം പോര്‍ട്ടിലെ വനിതാ ക്രെയിന്‍ ഓപ്പറേറ്റര്‍മാര്‍. വിഴിഞ്ഞം സ്വദേശികളായ 7 പേര്‍ ഉള്‍പ്പെടെ 9 വനിതാ ഓപ്പറേറ്റര്‍മാരാണ് പോര്‍ട്ടിലെ യാര്‍ഡ് ക്രെയിനുകളുടെ (CRMG) പ്രവര്‍ത്തനം നിയന്ത്രിക്കുന്നത്. ആകെ 20 ക്രെയിന്‍ ഓപ്പറേറ്റര്‍മാരാണ് വിഴിഞ്ഞത്ത് ജോലി ചെയ്യുന്നത്. ഇന്ത്യയില്‍ ഇതാദ്യമായാണ് വനിതകള്‍ ഓട്ടോമേറ്റഡ് സിആര്‍എംജി ക്രെയിനുകളുടെ നിയന്ത്രണം ഏറ്റെടുക്കുന്നത്.
വിഴിഞ്ഞം, കോട്ടപ്പുറം, പൂവാര്‍ സ്വദേശിനികളായ പി. പ്രിനു, എസ്. അനിഷ, എല്‍. സുനിത രാജ്, ഡി.ആര്‍. സ്റ്റെഫി റബീറ, ആര്‍.എന്‍.രജിത, പി.ആശാലക്ഷ്മി, എ.വി. ശ്രീദേവി, എല്‍.കാര്‍ത്തിക, ജെ.ഡി. നതാന മേരി എന്നിവരാണ് വിഴിഞ്ഞം പോര്‍ട്ടിലെ വനിതാ ക്രെയിന്‍ ഓപ്പറേറ്റര്‍മാര്‍.
മത്സ്യത്തൊഴിലാളി കുടുംബങ്ങളില്‍ നിന്നുള്ള വനിതകളും ടീമിലുണ്ട്. അതീവ വൈദഗ്ദ്ധ്യത്തോടെ ചെയ്യേണ്ട ജോലിയാണ് ഇവര്‍ ഏറ്റെടുത്തിരിക്കുന്നത്. പോര്‍ട്ട് യാര്‍ഡിലെ കണ്ടെയ്‌നറുകളുടെ നീക്കം ഓപ്പറേഷന്‍ സെന്ററിലെ അത്യാധുനിക റിമോട്ട് ഡെസ്‌ക് വഴിയാണ് നിയന്ത്രിക്കുന്നത്. സയന്‍സ് ഡിഗ്രി, പിജി യോഗ്യതയുള്ള ഇവര്‍ അദാനി വിഴിഞ്ഞം പോര്‍ട്ടില്‍ അദാനി ഫൗണ്ടേഷനു കീഴിലുള്ള അദാനി സ്‌കില്‍ ഡെവലപ്‌മെന്റ്‌സെന്ററിന്റെ സഹകരണത്തോടെ വിദഗ്ധ പരിശീലനം പൂര്‍ത്തിയാക്കിയാണ് ജോലിയില്‍ പ്രവേശിച്ചത്.