അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കണ്ണൂർ എ ഡി എം ആയിരുന്ന നവീൻ ബാബുവിനെക്കുറിച്ചുള്ള ആരോപണങ്ങൾ അന്വേഷിച്ച ലാൻഡ് റവന്യൂ ജോയിൻ്റ് കമ്മീഷണറുടെ റിപ്പോർട്ടിലെ വിവരങ്ങൾ പുറത്തുവന്നതിന് പിന്നാലെ പ്രതികരണവുമായി മന്ത്രി കെ രാജൻ. നവീൻ ബാബു മനപ്പൂർവ്വം ഒരു ഫയൽ താമസിപ്പിച്ചോയെന്ന് വകുപ്പ് തലത്തിൽ പരിശോധിച്ചുവെന്നും, അദ്ദേഹം അഴിമതി നടത്തിയതായി കണ്ടെത്തിയിട്ടില്ലെന്നും മന്ത്രി വ്യക്തമാക്കി.
റവന്യൂ വകുപ്പ് ആഭ്യന്തര അന്വേഷണമാണ് നടത്തിയതെന്നും സർക്കാർ ഫയൽ കണ്ട് റിപ്പോർട്ട് അവസാനിപ്പിച്ചുവെന്നും അദ്ദേഹം പറഞ്ഞു. പൊലീസാണ് മറ്റു കാര്യങ്ങൾ അന്വേഷിക്കുന്നതെന്നും മന്ത്രി കൂട്ടിച്ചേർത്തു. എ ഡി എം കേസിലെ ക്രൈം അന്വേഷിക്കുന്ന ഏജൻസിക്ക് റവന്യൂ വകുപ്പിൻ്റെ ഈ കണ്ടെത്തൽ ഉപയോഗിക്കാമെന്നും കെ രാജൻ അറിയിച്ചു.
ഗൂഢാലോചന റവന്യൂ വകുപ്പിന് അന്വേഷിക്കാൻ സാധിക്കില്ലെന്നും പൊലീസാണ് അന്വേഷിക്കേണ്ടതെന്നും മന്ത്രി പറഞ്ഞു. പൊലീസിന് റവന്യൂ വകുപ്പ് അന്വേഷിച്ച് കണ്ടെത്തിയ കാര്യങ്ങൾ കണ്ടില്ലെന്ന് എങ്ങനെ പറയാൻ കഴിയുമെന്നും അദ്ദേഹം ചോദിച്ചു.
