അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വൈകീട്ട് സ്കൂൾ വിട്ടെത്തുന്ന കുട്ടികൾക്ക് വേണ്ടി ഒരു കിടിലൻ ഐറ്റം തയ്യാറാക്കിയാലോ? വളരെ എളുപ്പത്തിൽ രുചികരമായി തയ്യാറാക്കാവുന്ന ഒരു പുഡ്ഡിംഗ് റെസിപ്പി. സ്വാദിഷ്ടമായ കാരമൽ പുഡ്ഡിംഗ് റെസിപ്പി നോക്കാം.
ആവശ്യമായ ചേരുവകൾ
- പഞ്ചസാര- 1/2 കപ്പ്
- വെള്ളം- 1/4 കപ്പ്
- കടലപ്പൊടി- 2 കപ്പ്
- പാൽ- 1/2 കപ്പ്
- പഞ്ചസാര- 1 കപ്പ്
- ഏലയ്ക്കപ്പൊടി- 1 ടീസ്പൂൺ
- ഉപ്പ്- 1/4 ടീസ്പൂൺ
- മുട്ട- 2 എണ്ണം
തയ്യാറാക്കുന്ന വിധം
ഒരു പാനിൽ പഞ്ചസാരയെടുത്ത് കാൽ കപ്പ് വെള്ളം ഒഴിച്ച് അടുപ്പിൽ വച്ച് അലിയിക്കാം. പുഡ്ഡിംഗ് തയ്യാറാക്കാൻ ഉപയോഗിക്കുന്ന പാത്രത്തിലേയ്ക്ക് ഇത് മാറ്റാം. മറ്റൊരു പാൻ സ്റ്റൗവിൽ വച്ച് അതിൽ കടലപ്പൊടിയും നെയ്യും ചേർത്ത് നന്നായി റോസ്റ്റ് ചെയ്തെടുക്കുക. ചൂടാറിയതിനു ശേഷം അതിലേക്ക് പാൽ ചേർത്ത് കട്ടകൾ ഒന്നുമില്ലാതെ ഇളക്കി യോജിപ്പിച്ച് എടുക്കാം. ഇനി സ്റ്റൗ ഓൺ ആക്കി ഇടത്തരം തീയിൽ ചെറുതായി കട്ടി ആകുന്നത് വരെ ഇത് ഇളക്കി കൊടുക്കണം.
ഇനി ഇതിലേക്ക് പഞ്ചസാര ചേർത്തു കൊടുക്കാം. പഞ്ചസാര അലിഞ്ഞതിനു ശേഷം ഏലക്കാപ്പൊടിയും ഉപ്പും ചേർത്ത് അടുപ്പണയ്ക്കാം. മറ്റൊരു പാത്രത്തിൽ രണ്ട് മുട്ട പൊട്ടിച്ചൊഴിച്ച് ഉടച്ചെടുക്കാം. കാരമൽ വെച്ച പാത്രത്തിലേക്ക് ഇത് അരിച്ച് ഒഴിച്ച ശേഷം അലുമിനിയം ഫോയിൽ ഉപയോഗിച്ച് പാത്രം മൂടി ഒരു ടൂത്ത് പിക് ഉപയോഗിച്ച് ചെറിയ ദ്വാരങ്ങൾ ഇട്ടു കൊടുക്കാം. ഇനി ഇത് 30 മിനിറ്റ് ആവിയിൽ വേവിച്ചെടുക്കാം. നല്ലതുപോലെ ചൂടാറിക്കഴിഞ്ഞാൽ 2 മണിക്കൂർ ഫ്രിഡ്ജിൽ വെച്ച് തണുപ്പിച്ച് എടുക്കാം.
