അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആറ്റുകാല്‍ പൊങ്കാലയ്ക്ക് എത്തുന്നവര്‍ക്ക് സൗജന്യമായി വിശറി വിതരണം ചെയ്ത് മുഖ്യ തിരഞ്ഞെടുപ്പ് ഓഫീസറുടെ കാര്യാലയം.വോട്ട് ചെയ്യുന്നതിന്റെ പ്രാധാന്യം ഓര്‍മ്മിപ്പിക്കാനുള്ള സാധ്യതയാണ് ആറ്റുകാല്‍ പൊങ്കാലയില്‍ തിരഞ്ഞെടുപ്പ് കമ്മീഷന്‍ വിനിയോഗിച്ചിരിക്കുന്നത്. ‘വോട്ട് ചെയ്യുന്നതുപോലെ മഹത്തരം മറ്റൊന്നുമില്ല. ഞാന്‍ തീര്‍ച്ചയായും വോട്ടുചെയ്യും.’ എന്ന സന്ദേശം ഉള്‍പ്പെടുത്തിയ വിശറികളാണ് ആറ്റുകാല്‍ അമ്പലത്തിന്റെ പരിസരത്ത് ഇന്നലെ മുതല്‍ തന്നെ വിതരണം ചെയ്തു തുടങ്ങിയത്. കേരള ബാങ്കുമായി സഹകരിച്ചാണ് പദ്ധതി നടപ്പാക്കിയത്.
വോട്ടെടുപ്പില്‍ പങ്കാളിയാക്കേണ്ടതിന്റ പ്രാധാന്യം ജനങ്ങളെ ബോധവല്‍ക്കരിക്കുന്നതിന് വേണ്ടിയുള്ള വിവിധ പ്രചാരണ പരിപാടികളുടെ തുടര്‍ച്ചയാണ് വിശറി വിതരണവും. ചുട്ടുപൊള്ളുന്ന ചൂടില്‍ പൊങ്കാലയിടുന്നവര്‍ക്ക് ആശ്വാസമേകുന്നതിനോടൊപ്പം വിശറിയിലെ സന്ദേശം വീടുകളിലേക്ക് കൂടി എത്തും എന്നാണ് പ്രതീക്ഷിക്കപ്പെടുന്നത്. തിരഞ്ഞെടുപ്പ് വര്‍ഷം അല്ലെങ്കില്‍ കൂടി വോട്ടെടുപ്പിന്റെ പ്രാധാന്യം ജനങ്ങളെ ബോധ്യപ്പെടുത്താന്‍ വിവിധ പരിപാടികളാണ് മുഖ്യ തിരഞ്ഞെടുപ്പ് ഓഫീസറുടെ നേതൃത്വത്തില്‍ സംസ്ഥാനത്ത് നടത്തി വരുന്നത്.
