അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇനി പാവയ്ക്ക കിട്ടുമ്പോൾ ഇതുപോലെ അച്ചാർ തയ്യാറാക്കിനോക്കൂ.. പാവയ്ക്ക കൊണ്ട് പലതരത്തിലുള്ള വിഭവങ്ങള്‍ നമ്മള്‍ തയ്യാറാക്കാറുണ്ട് അല്ലെ, എങ്കിൽ ഇത്തവണ ഒരു അച്ചാർ ആവട്ടെ.
ആവശ്യമായ ചേരുവകള്‍
- പാവയ്ക്ക – 300 ഗ്രാം
- ഉപ്പ് – ആവശ്യത്തിന്
- നല്ലെണ്ണ – 5-6 ടേബിള്‍സ്പൂണ്‍
- കടുക് – 1 ടീസ്പൂണ്‍
- വെളുത്തുള്ളി അരിഞ്ഞത്- 1 ടേബിള്‍സ്പൂണ്‍
- ഇഞ്ചി അരിഞ്ഞത് – 1 ടീസ്പൂണ്‍
- പച്ചമുളക് അരിഞ്ഞത് – 2 എണ്ണം
- കറിവേപ്പില – ആവശ്യത്തിന്
- മഞ്ഞള്‍പ്പൊടി – അര ടീസ്പൂണ്‍
- മുളകുപൊടി – 1 ടേബിള്‍സ്പൂണ്‍
- വിനാഗിരി – 3 ടേബിള്‍സ്പൂണ്‍
- പഞ്ചസാര – അര ടീസ്പൂണ്‍
- കായപ്പൊടി – അര ടീസ്പൂണ്‍
- ഉലുവ വറുത്തുപൊടിച്ചത് – കാല്‍ ടീസ്പൂണ്‍
തയ്യാറാക്കുന്ന വിധം
പാവയ്ക്ക നന്നായി കഴുകി വെള്ളമെല്ലാം പോയിക്കഴിഞ്ഞ് കുരു കളഞ്ഞ് ചെറിയ കഷണങ്ങളാക്കി അരിഞ്ഞെടുക്കാം. ഇനി ഇത് ഒരു പാത്രത്തിലേക്ക് മാറ്റിയശേഷം ആവശ്യത്തിന് ഉപ്പ് ചേര്‍ത്ത് ഇളക്കി മൂടി വെച്ച് 10-12 മണിക്കൂര്‍ ഫ്രിഡ്ജില്‍ എടുത്തു വയ്ക്കാം. അടുത്ത ദിവസം ഇതെടുത്ത് പാവയ്ക്ക നന്നായി പിഴിഞ്ഞ് നീരെല്ലാം കളഞ്ഞെടുക്കാം. ഇനിയൊരു പാന്‍ സ്റ്റൗവില്‍ വച്ച് ചൂടാകുമ്പോള്‍ അതിലേയ്ക്ക് നല്ലെണ്ണ ഒഴിച്ച് കൊടുക്കാം. എണ്ണ ചൂടായാല്‍ കടുകിട്ട് പൊട്ടിയ ശേഷം അതിലേയ്ക്ക് വെളുത്തുള്ളി, ഇഞ്ചി, പച്ചമുളക് എന്നിവ അരിഞ്ഞതും കുറച്ച് കറിവേപ്പിലയും ചേര്‍ത്ത് വഴറ്റി എടുക്കാം.
ഇനി തീ ഓഫ് ചെയ്തശേഷം മഞ്ഞള്‍പൊടി, മുളകുപൊടി എന്നിവ ചേര്‍ത്തു കൊടുക്കാം. ഇതിലേക്ക് ഇനി പാവയ്ക്ക ചേര്‍ത്തുകൊടുത്തശേഷം നന്നായി ഇളക്കി വീണ്ടും സ്റ്റൗ ഓണ്‍ ആക്കാം. ഇത് ഒന്നു വാടിക്കഴിഞ്ഞാല്‍ വിനാഗിരി ചേര്‍ത്ത് കൊടുക്കാം. പാവയ്ക്ക നന്നായി വാടിക്കഴിഞ്ഞാല്‍ തീ ഓഫ് ചെയ്യുന്നതിന് മുമ്പ് കായപ്പൊടി ചേര്‍ത്തു കൊടുക്കാം. ഇനി തീ ഓഫ് ചെയ്ത ശേഷം അല്പം പഞ്ചസാരയും ഉലുവ വറുത്തു പൊടിച്ചതും കൂടി ചേര്‍ത്ത് ഇളക്കി എടുക്കാം. ഇതോടെ പാവയ്ക്ക അച്ചാര്‍ തയ്യാറായിക്കഴിഞ്ഞു.
