അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഇലോണ്‍ മസ്‌കിന്റെ ഉടമസ്ഥതയിലുള്ള സാമൂഹിക മാധ്യമ പ്ലാറ്റ്ഫോമായ എക്സിന് വിയോജിപ്പുള്ള വിഷയങ്ങളില്‍ രാജ്യത്തെ കോടതികളെ സമീപിക്കുന്നതിനുള്ള എല്ലാ അവകാശവുമുണ്ടെന്നും എന്നാല്‍ നിയമത്തിന് മുന്നില്‍ എല്ലാവരും തുല്യരാണെന്ന ബോധം കൂടി അവര്‍ക്കുണ്ടായിരിക്കണമെന്നും ഓര്‍മ്മപ്പെടുത്തി ബിജെപിയുടെ മുതിര്‍ന്ന നേതാവും മുന്‍ കേന്ദ്ര മന്ത്രിയുമായ രാജീവ് ചന്ദ്രശേഖര്‍.
എല്ലാ സാമൂഹിക മാധ്യമ പ്ലാറ്റ്ഫോമുകളും സുരക്ഷിതവും വിശ്വാസയോഗ്യവുമായിരിക്കണമെന്ന് പ്രധാനമന്ത്രി നരേന്ദ്ര മോദി തന്നെ വ്യക്തമാക്കിയിട്ടുള്ളതാണെന്ന് (എഎന്‍ഐ) വാര്‍ത്താ ഏജന്‍സിയോട് സംസാരിക്കവേ രാജീവ് ചന്ദ്രശേഖര്‍ വ്യക്തമാക്കി. ഐടി നിയമത്തിലെ 79-ാം വകുപ്പിന്റെ ഉപയോഗം നിയമവിരുദ്ധമാണെന്ന് കാണിച്ച് മാര്‍ച്ച് 20ന് ഇലോണ്‍ മസ്‌കിന്റെ ഉടമസ്ഥതയിലുള്ള സാമൂഹിക മാധ്യമമായ എക്സ് കര്‍ണ്ണാടക ഹൈക്കോടതിയെ സമീപിച്ചത് പരാമര്‍ശിച്ചായിരുന്നു രാജീവ് ചന്ദ്രശേഖറുടെ പ്രതികരണം.
ഇന്ത്യന്‍ നിയമ വ്യവസ്ഥ ഏവര്‍ക്കും ഒരുപോലെ ബാധകമാണ്. എന്നാല്‍ നിയമവിരുദ്ധമെന്ന് തങ്ങള്‍ക്ക് തോന്നുന്ന വിഷയങ്ങളില്‍ കോടതിയെ സമീപിക്കാനുള്ള സ്വാതന്ത്ര്യവും അവകാശവും എക്സിനുണ്ട്. ഇന്ത്യയില്‍ പ്രവര്‍ത്തിക്കുന്ന സാമൂഹികമാധ്യമങ്ങളൊന്നും പരീക്ഷണാടിസ്ഥാനത്തിലുള്ളവയാകരുതെന്ന് മുന്‍പ് തന്നെ രാജ്യം വ്യവസ്ഥ ചെയ്തിട്ടുണ്ട്. മന്ത്രിയെന്ന നിലയില്‍ 2024 ജനുവരിയില്‍ താന്‍ തന്നെ ഇക്കാര്യം പറഞ്ഞിരുന്നു. അഥവാ പരീക്ഷണാടിസ്ഥാനത്തിലുള്ളവയാണെങ്കില്‍ പ്രസ്തുത വസ്തുത വെളിപ്പെടുത്തുന്നതിനുള്ള ബാദ്ധ്യതയും അവരില്‍ നിക്ഷിപ്തമാണെന്ന് രാജീവ് ചന്ദ്രശേഖര്‍ ഓര്‍മ്മപ്പെടുത്തി. നിര്‍മ്മിത ബുദ്ധിയിലധിഷ്ഠിതമായി തെറ്റായ രീതികള്‍ അവലംബിക്കുന്ന പ്ലാറ്റ്ഫോമുകള്‍ നമുക്ക് സ്വീകാര്യമല്ല. ഇത് ചൈനയല്ല, ഇന്ത്യയാണെന്നും രാജീവ് ചന്ദ്രശേഖര്‍ പറഞ്ഞു.
