അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഒരു സ്പെഷ്യൽ നാരങ്ങാ കറി ഉണ്ടാക്കിയാലോ? കിടിലൻ രുചിയിൽ എളുപ്പത്തിൽ തയ്യാറാക്കാവുന്ന ഒരു റെസിപ്പി.
ആവശ്യമായ ചേരുവകൾ
- ഗണപതി നാരങ്ങ / സിട്രോൺ – 2 കപ്പ് അരിഞ്ഞത്/ 300 ഗ്രാം
- വാളൻ പുളി – 50 ഗ്രാം
- മുളകുപൊടി – 3 ടീസ്പൂൺ
- പച്ചമുളക് – 2 എണ്ണം
- കറിവേപ്പില ആവിശ്യത്തിന്
- ഇഞ്ചി – ഒരു ചെറിയ കഷണം
- വെളുത്തുള്ളി – 10 മുതൽ 15 ചെറിയ അല്ലി
- ചൂടുവെള്ളം – 3 കപ്പ്
- വെളിച്ചെണ്ണ – 1 1/2 ടീസ്പൂൺ
- കടുക് – 1 ടീസ്പൂൺ
- ഉലുവ – 1/2 ടീസ്പൂൺ
- വറ്റൽമുളക് – 4-5
- ശർക്കര – 50 ഗ്രാം
- ഉപ്പ് ആവിശ്യത്തിന്
തയ്യാറാക്കുന്ന വിധം
നാരങ്ങ അരിഞ്ഞ് മാറ്റി വയ്ക്കുക. പച്ചമുളക്, ഇഞ്ചി, വെളുത്തുള്ളി എന്നിവ നേർത്ത കഷ്ണങ്ങളായി മുറിക്കുക. 2 കപ്പ് ചെറുചൂടുള്ള വെള്ളത്തിൽ പുളി കുതിർത്ത് വയ്ക്കുക. ഒരു മൺപാത്രത്തിലേക്ക് പുളി പിഴിഞ്ഞത്, മുളകുപൊടി, അരിഞ്ഞ ഇഞ്ചി, വെളുത്തുള്ളി, പച്ചമുളക്, കറിവേപ്പില എന്നിവ ചേർക്കുക. നന്നായി ഇളക്കുക. ശേഷം പുളിയിലേക്ക് 1 കപ്പ് വെള്ളം കൂടെ ചേർത്ത് പരമാവധി പൾപ്പ് പിഴിഞ്ഞെടുത്ത് പാത്രത്തിലേക്ക് ചേർക്കുക. ഉപ്പ് ചേർത്ത് നന്നായി ഇളക്കുക.
ഇനി ഇത് അടുപ്പിൽ വച്ച് ആ ഗ്രേവി തിളപ്പിക്കുക. തിളച്ചു തുടങ്ങിയാൽ തീ ഇടത്തരം ആക്കി 15 മിനിറ്റ് വേവിക്കുക അല്ലെങ്കിൽ പുളിയുടെയും മുളകുപൊടിയുടെയും പച്ച രുചി മാറുന്നതുവരെ വേവിക്കുക. ഈ സമയം ഗ്രേവി കട്ടിയാകാൻ തുടങ്ങും. രുചി നോക്കി ആവശ്യമെങ്കിൽ മുളകുപൊടി, പുളി, ഉപ്പ് ചേർക്കുക.
ഇനി അരിഞ്ഞ നാരങ്ങ ചേർത്ത് നല്ലപോലെ ഇളക്കി യോജിപ്പിക്കുക. ഇടത്തരം തീയിൽ 5 മിനിറ്റ് മൂടി വേവിക്കുക. നാരങ്ങ വെന്തോ എന്ന് നോക്കുക. അമിതമായി വേവിച്ച് കഷ്ണങ്ങൾ ഉടച്ചു കളയരുത്. ശേഷം ശർക്കര ചേർത്ത് അടുപ്പ് ഓഫ് ചെയ്യുക. വെളിച്ചെണ്ണയിൽ കടുക്, ഉലുവ, വറ്റൽമുളക് കറിവേപ്പില എന്നിവ ചേർത്ത് താളിക്കുക. ഇത് കറിയിൽ ഒഴിച്ച് മൂടി അടച്ച് 5 മുതൽ 10 മിനിറ്റ് വരെ മാറ്റിവയ്ക്കുക. ശേഷം നന്നായി ഇളക്കി തണുക്കാൻ അനുവദിക്കുക. കിടിലൻ നാരങ്ങാ കറി റെഡിയായി.
