മുസ്ലിം ന്യൂനപക്ഷങ്ങളുടെ ഭരണഘടനാപരമായ അവകാശങ്ങളെ ഹനിക്കുന്ന വഖഫ് നിയമ ഭേദഗതി ബില് പാര്ലമെന്റില് പാസ്സാക്കിയതിനു ശേഷം കതോലിക്കാ സഭയെ ഉന്നംവെച്ചു നീങ്ങുകയാണു സംഘപരിവാര് എന്നാണ് ആര്എസ്എസിന്റെ മുഖപത്രമായ ഓര്ഗനൈസറിലെ ലേഖനത്തില് നിന്നും മനസ്സിലാക്കേണ്ടതെന്ന് മുഖ്യമന്ത്രി പിണറായി വിജയന്.
സഭയുടെ സ്വത്തിനെക്കുറിച്ച് അനവസരത്തിലുള്ള അനാവശ്യ പരാമര്ശം ചില വിപല് സൂചനകളാണു തരുന്നത്. ഓര്ഗനൈസര് വെബ്സൈറ്റില് നിന്ന് ആ ലേഖനം പിന്വലിച്ചുവെങ്കിലും അതിലൂടെ പുറത്തുവന്നിട്ടുള്ളത് ആര്എസ്എസിന്റെ യഥാര്ത്ഥ മനസ്സിലിരിപ്പാണ്. സംഘപരിവാര് മുന്നോട്ടു വെക്കുന്ന ഭൂരിപക്ഷ വര്ഗ്ഗീയതയുടെ അത്യന്തം തീവ്രമായ അപരമത വിരോധമാണ് ആ ലേഖനത്തില് കാണാന് കഴിയുന്നത്.
ന്യൂനപക്ഷ വിഭാഗങ്ങളെ ഓരോന്നോരോന്നായി ലക്ഷ്യംവെച്ച് പടിപടിയായി തകര്ക്കാനുള്ള ഒരു ബൃഹത് പദ്ധതിയുടെ ഭാഗമായി വേണം ഇതിനെ കാണാന്. പുരോഗമന ജനാധിപത്യ മതനിരപേക്ഷ പ്രസ്ഥാനങ്ങള് സംയുക്തമായി നിന്ന് ഇതിനെ ചെറുക്കണമെന്നും അദ്ദേഹം വാര്ത്താക്കുറിപ്പിലൂടെ അറിയിച്ചു.
CONTENT HIGH LIGHTS;Article in RSS mouthpiece Organizer: Extreme anti-religious sentiment of majority communalism: Pinarayi Vijayan