ബെംഗളൂരു ആസ്ഥാനമായുള്ള ന്യൂമെറോസ് മോട്ടോഴ്സ് തങ്ങളുടെ ഡിപ്ലോസ് മാക്സ് ഇലക്ട്രിക് സ്കൂട്ടർ പുറത്തിറക്കി. ഏറെ പ്രത്യേകതയുള്ള ഈ വണ്ടി മഹാരഷ്ട്രയിലെപൂനെയിൽ നടന്ന 2025 ലെ ഭാരത് മൊബിലിറ്റി ഗ്ലോബൽ എക്സ്പോയിലാണ് ഇത് ആദ്യമായി അവതരിപ്പിച്ചത്. ഇപ്പോൾ വിവിധ വിപണികളിൽ ഘട്ടം ഘട്ടമായി ഇത് ലഭ്യമാക്കുന്നു. 1.13 ലക്ഷം രൂപയാണ് ഈ സ്കൂട്ടറിന്റെ എക്സ്-ഷോറൂം വില.ന്യൂമെറോസ് ഡിപ്ലോസ് മാക്സ് ലളിതവും എന്നാൽ കരുത്തുറ്റതുമായ രൂപകൽപ്പനയോടെയാണ് വരുന്നത്. വൃത്താകൃതിയിലുള്ള എൽഇഡി ഹെഡ്ലൈറ്റുകൾ, സ്പ്ലിറ്റ് സീറ്റുകൾ, സീറ്റിനടിയിലെ സ്റ്റോറേജ് തുടങ്ങിയവ ഇതിൽ ഉൾപ്പെടുന്നു. ഈ സ്കൂട്ടറിൽ ഒരു ഡിജിറ്റൽ ഇൻസ്ട്രുമെന്റ് കൺസോൾ ഉണ്ട്, അതിൽ റൈഡിംഗ് മോഡുകൾ, ജിയോഫെൻസിംഗ്, വെഹിക്കിൾ ട്രാക്കിംഗ്, മോഷണ മുന്നറിയിപ്പ് തുടങ്ങിയ കണക്റ്റിവിറ്റി സവിശേഷതകളുണ്ട്.ഇത് എല്ലാത്തരം റോഡുകളിലും സുഖകരമായ യാത്ര സമ്മാനിക്കും. ഇതിന് 150mm ഗ്രൗണ്ട് ക്ലിയറൻസുണ്ട്, മികച്ച ബ്രേക്കിംഗിനായി ഡിസ്ക് ബ്രേക്കുകളും ഉപയോഗിച്ചിട്ടുണ്ട്.
2.67 kW (3.5 bhp) കരുത്തും 138 Nm ടോർക്കും ഉത്പാദിപ്പിക്കുന്ന ഹബ്-മൗണ്ടഡ് പിഎംഎസ് മോട്ടോറാണ് ന്യൂമെറോസ് ഡിപ്ലോസ് മാക്സിന് കരുത്തേകുന്നത്. ഈ സ്കൂട്ടറിന് മണിക്കൂറിൽ 63 കിലോമീറ്റർ വേഗത കൈവരിക്കാൻ കഴിയും. ഇതിന് 1.85 kWh ന്റെ രണ്ട് ലിഥിയം-അയൺ ബാറ്ററികളുണ്ട്. ഇത് ഇക്കോ മോഡിൽ 140 കിലോമീറ്റർ ശക്തമായ റേഞ്ച് നൽകുമെന്ന് അവകാശപ്പെടുന്നു. 1.2 kW ചാർജർ ഉപയോഗിച്ച് 4 മണിക്കൂറിനുള്ളിൽ ഇത് പൂർണ്ണമായും ചാർജ് ചെയ്യാനും കഴിയും.
നിലവിൽ, ന്യൂമെറോസ് മോട്ടോഴ്സിന് കർണാടക, തമിഴ്നാട്, കേരളം എന്നിവിടങ്ങളിലായി 14 നഗരങ്ങളിൽ ഇവൻ ഓടുന്നുണ്ട്, 2027 സാമ്പത്തിക വർഷത്തോടെ 50 നഗരങ്ങളിലായി 100ൽ അധികം ഡീലർഷിപ്പുകൾ തുറക്കുമെന്ന് കമ്പനി പറയുന്നു. പൂനെയിലെ ലോഞ്ചിനുശേഷം, ഈ വർഷം മഹാരാഷ്ട്രയിൽ മാത്രം 20 പുതിയ ഡീലർഷിപ്പുകൾ കൂടി തുറക്കാൻ കമ്പനി പദ്ധതിയിടുന്നു.