പ്രകൃതിയില്‍ നിന്ന് ലഭിക്കുന്നവയില്‍ ഏറെ ഔഷദ ഗുണങ്ങളുള്ള ഒന്നാണ് തേന്‍. രോഗ പ്രതിരോധ ശേഷി വർധിപ്പിക്കാനും ആരോഗ്യ, സൗന്ദര്യ സംരക്ഷണത്തിനുമെല്ലാം ഉത്തമമാണ് തേന്‍. ജലദോഷവും ചുമ പോലുള്ള അസുഖങ്ങള്‍ക്കും ശരീര ഭാരം കുറയ്ക്കുന്നതിനും ചര്‍മ സംരക്ഷണത്തിനും ഒരുപോലെ ഉപയോഗപ്രദം. പല ആയുർവേദ ഔഷധങ്ങളിലും തേന്‍ ഒരു ചേരുവയായി ഉപയോഗിക്കാറുണ്ട്.
സാധാരണ പഞ്ചസാരയേക്കാള്‍ ഗ്ലൈസിമിക്‌ സൂചിക കുറവായതിനാല്‍ തേന്‍ കഴിക്കുമ്പോള്‍ രക്തത്തിലെ പഞ്ചസാര സാവധാനം മാത്രമേ ഉയരുകയുള്ളൂ. ഇത്‌ വിശപ്പ്‌ നിയന്ത്രിക്കാന്‍ സഹായിക്കുന്നു. രാത്രി കിടക്കുന്നതിനു മുന്‍പ്‌ ഒരു സ്‌പൂണ്‍ തേന്‍ കഴിച്ചാല്‍ ഉറക്കത്തിന്റെ ആദ്യ മണിക്കൂറുകളില്‍ കൊഴുപ്പ്‌ കത്തിക്കാന്‍ ശരീരത്തിന്‌ ഇത്‌ സഹായകമാകും.
ഭാരം കുറയ്‌ക്കാനും കൊഴുപ്പ്‌ കത്തിക്കാനും തേന്‍ സഹായിക്കുമെങ്കിലും ഭാരം കുറയാനുള്ള മാന്ത്രിക ഔഷധമായി ഇതിനെ കരുതരുത്‌. നിത്യവുമുള്ള വ്യായാമം, സന്തുലിത ഭക്ഷണക്രമം, സജീവമായ ജീവിതശൈലി എന്നിവയെല്ലാം സുസ്ഥിരമായ രീതിയില്‍ ഭാരം കുറയ്‌ക്കാന്‍ ആവശ്യമാണ്‌.
എന്നാല്‍ ഉയര്‍ന്ന തോതില്‍ കാലറി ഉള്ളതിനാല്‍ വലിച്ചു വാരി തേന്‍ കഴിക്കാതിരിക്കാനും ശ്രദ്ധിക്കേണ്ടതാണ്‌. ക്ലോസ്‌ട്രിഡിയം ബോട്ടുലിനം എന്ന ബാക്ടീരിയയുടെ ബീജകോശങ്ങള്‍ ഉണ്ടാകാമെന്നതിനാല്‍ ഒരു വയസ്സില്‍ താഴെയുള്ള കുട്ടികള്‍ക്കും അലര്‍ജിയുള്ള വലിയവര്‍ക്കും തേന്‍ നല്‍കരുത്‌.
ചൂടു വെള്ളത്തില്‍ കറുവാപ്പട്ട പൊടിയും ഒരു ടീസ്‌പൂണ്‍ തേനും കലര്‍ത്തി കുടിക്കുന്നത്‌ ചയാപചയം മെച്ചപ്പെടാനും വിശപ്പ്‌ നിയന്ത്രിക്കാനും നല്ലതാണ്‌. ചൂടു വെള്ളത്തില്‍ നാരങ്ങയോടൊപ്പവും തേന്‍ കഴിക്കാം. തേന്‍ ഹെര്‍ബല്‍ ചായ, ഇഞ്ചി ചായ, ഗ്രീന്‍ ടീ എന്നിവയിലും ബ്രേക്ക്‌ഫാസ്റ്റ്‌ ഓട്‌ മീലിലും ചേര്‍ത്ത്‌ കഴിക്കാവുന്നതാണ്‌.