അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വൈകീട്ട് ചായക്കൊപ്പം കഴിക്കാൻ കിടിലൻ സ്വാദിൽ തയ്യാറാക്കാവുന്ന ഒരു മലബാർ വിഭവത്തിന്റെ റെസിപ്പി നോക്കിയാലോ? രുചികരമായി തയ്യാറാക്കാവുന്ന ചിക്കന്‍ ചട്ടിപ്പത്തിരി റെസിപ്പി നോക്കാം.
ആവശ്യമായ ചേരുവകള്‍
- ചിക്കന്‍ – 300 ഗ്രാം
- മൈദ – 1 കപ്പ്
- സവാള – 2 എണ്ണം
- ഇഞ്ചി – ചെറിയ കഷ്ണം
- വെളുത്തുള്ളി – 5 അല്ലി
- മഞ്ഞള്‍പ്പൊടി – 1/4 ടീസ്പൂണ്‍
- കുരുമുളകുപൊടി – 1 ടീസ്പൂണ്‍
- ഗരംമസാലപ്പൊടി – 1/4 ടീസ്പൂണ്‍
- കറിവേപ്പില
- വെളിച്ചെണ്ണ
- മുട്ട – 3 എണ്ണം
- വെള്ളം – ആവശ്യത്തിന്
- ഉപ്പ് – ആവശ്യത്തിന്
തയാറക്കുന്ന വിധം
ചിക്കന്‍ കുറച്ച് ഉപ്പും കുരുമുളകുപൊടിയും ഗരംമസാലപ്പൊടിയും ഇഞ്ചിവെളുത്തുള്ളിയും ചേര്‍ത്ത് വേവിക്കാം. ഇത് തണുത്തതിന് ശേഷം ഒന്ന് പിച്ചിയെടുക്കാം. ഇനി ഒരു പാനില്‍ വെളിച്ചെണ്ണ ഒഴിച്ച് ചൂടായശേഷം അതില്‍ ഇഞ്ചി വെളുത്തുള്ളി, സവാള എന്നിവ ചേര്‍ത്ത് വഴറ്റാം. ഇതില്‍ പൊടികളെല്ലാം ചേര്‍ത്ത് ചൂടാക്കിയശേഷം വേവിച്ച് മാറ്റിവച്ച ചിക്കന്‍ ചേര്‍ത്ത് ഒന്ന് ഇളകിയെടുക്കാം.
ഇനി ഒരു മിക്‌സിയുടെ ജാറിലേക്ക് മുട്ട, മൈദ, വെള്ളം പാകത്തിന് ഉപ്പ് എന്നിവ ചേര്‍ത്ത് നന്നായിട്ട് അടിച്ചെടുക്കാം. ഇനി ഒരു പാനില്‍ മാവൊഴിച്ചു ദോശ ചുട്ടെടുക്കാം. ഇനി ഒരു പാത്രത്തില്‍ മുട്ട പൊട്ടിച്ച് ഒഴിക്കാം കൂടെത്തന്നെ പാല്‍, കുരുമുളകുപൊടി, ഉപ്പ്, മല്ലിയില എന്നിവ ചേര്‍ത്തൊരു മിക്‌സ് തയാറാക്കാം.
ഇനി ഒരു പാനില്‍ കുറച്ച് നെയ്യ് തടവിയ ശേഷം അതില്‍ തയാറാക്കിയ ദോശ മുട്ടയുടെ മിക്‌സില്‍ മുക്കിയതിനു ശേഷം വച്ച് കൊടുക്കാം. മുകളില്‍ ചിക്കന്റെ മസാല വച്ച് കൊടുക്കാം. ഇങ്ങനെ ഒരു 5 ലെയറെങ്കിലും ഇതുപോലെ വയ്ക്കണം. ഇനി ഒരു പഴയ ഫ്രൈയിങ് പാന്‍ വച്ച് അതിന്റെ മുകളില്‍ പാന്‍ വച്ച് അടച്ച് വച്ച് വേവിക്കാം. 20 മിനിറ്റ് വേവിച്ചെടുക്കണം. ഇനി ഒരു പാനിലേക്കു മാറ്റി കൊടുക്കാം. നല്ല രുചിയുള്ള ചിക്കന്‍ ചട്ടിപ്പത്തിരി തയാര്‍.
