അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ശരീരഭാരം കുറയ്ക്കാൻ ഭക്ഷണ നിയന്ത്രണം ആവശ്യമാണ്. എന്നാൽ കലോറി കുറയ്ക്കുന്നതിന് ഒപ്പം ശരീരത്തിൽ എല്ലാ പോക്ഷകങ്ങളും ലഭിക്കുന്നുണ്ടെന്ന് ഉറപ്പ് വരുത്തുകയും വേണം. അതിനാൽ തന്നെയാണ് ശരീര ഭാരം കുറയ്ക്കാൻ ആഗ്രഹിക്കുന്നവർ ഫൈബർ ധാരാളമുള്ള മില്ലറ്റുകൾ ഡയറ്റിൽ ഉൾപ്പെടുത്തുന്നത്. നെല്ല്, ഗോതമ്പ്, ചോളം എന്നീ പ്രധാന ധാന്യവിളകളുമായി താരതമ്യം ചെയ്യുമ്പോള്‍ നന്നേ ചെറിയ ധാന്യമണികളോടു കൂടിയതും പുല്ലു വര്‍ഗത്തില്‍പ്പെട്ടതുമായ വിളകളാണ് ചെറുധാന്യങ്ങള്‍ അഥവാ മില്ലറ്റുകള്‍. ജോവര്‍ (മണിച്ചോളം), ബജ്റ, റാഗി, കുട്കി, കുട്ടു, രാംധാന, കാങ്നി, കൊടോ, തിന, ചാമ തുടങ്ങിയവയാണ് പ്രധാനപ്പെട്ട മില്ലറ്റ് വിളകള്‍. ഇവ പല നാടുകളില്‍ പല പേരുകളില്‍ അറിയപ്പെടുന്നു.
മില്ലറ്റുകളിൽ ലയിക്കുന്നതും ലയിക്കാത്തതുമായ നാരുകൾ ധാരാളമായി അടങ്ങിയിട്ടുണ്ട്. ഇത് ദഹനത്തെ മന്ദഗതിയിലാക്കുകയും കൂടുതൽ നേരം വയറ് നിറഞ്ഞതായി തോന്നിപ്പിക്കുകയും ചെയ്യുന്നു. അതുവഴി അമിതമായി ഭക്ഷണം കഴിക്കുന്നത് ഒഴിവാക്കാം.മാത്രമല്ല മില്ലറ്റിൽ മറ്റ് ധാന്യങ്ങളെ അപേക്ഷിച്ച് കലോറി കുറവാണ്. ഇത് ശരീരഭാരം നിയന്ത്രിക്കാൻ സഹായിക്കുന്നു.മില്ലറ്റുകളിൽ വിറ്റാമിനുകൾ, ധാതുക്കൾ, ആന്റിഓക്‌സിഡന്റുകൾ എന്നിവ ധാരാളമായി അടങ്ങിയിട്ടുള്ളതിനാൽ കാലറി കുറയ്ക്കുമ്പോളും ശരീരത്തിന് ആവശ്യമായ പോഷകങ്ങൾ നൽകുകയും ആരോഗ്യകരമായി നിലനിർത്തുകയും ചെയ്യുന്നു. രക്തത്തിലെ പഞ്ചസാരയുടെ അളവ് പെട്ടെന്ന് കൂട്ടാതെ നിയന്ത്രിക്കാനും മില്ലറ്റുകൾ സഹായിക്കും . അതിനാൽ ഇത് ശരീരഭാരം കുറയ്ക്കാൻ ശ്രമിക്കുന്നവർക്ക് മാത്രമല്ല പ്രമേഹരോഗികൾക്കും ഉത്തമമാണ്. അത്പോലെ തന്നെ മില്ലറ്റുകൾ ശരീരത്തിലെ ചീത്ത കൊളസ്ട്രോളിന്റെ അളവ് കുറയ്ക്കാൻ സഹായിക്കും. മില്ലറ്റുകൾ കഴിക്കുന്നത് ഹൃദയാരോഗ്യം മെച്ചപ്പെടുത്താൻ സഹായിക്കുന്നു.
