അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ശരീരത്തിന് ആവശ്യ പ്രധാന പോഷകമാണ് പ്രോട്ടീൻ. എല്ലുകളുടെയും പേശികളുടെയും ആരോഗ്യത്തിനും രോഗ പ്രതിരോധശേഷി കൂട്ടാനും ശരീരത്തിന് ഊര്‍ജം നല്‍കാനും ശരീരഭാരം നിയന്ത്രിക്കാനുമൊക്കെ പ്രോട്ടീന്‍ ഭക്ഷണത്തിൽ ഉൾപ്പെടുത്തേണ്ടത് അത്യാവശ്യമാണ്. പ്രോട്ടീൻ ഇല്ലെങ്കിൽ ശരീരത്തിലെ ഉപാപചയ പ്രക്രിയകൾ ശരിയായ വിധത്തിൽ നടക്കില്ല. മാത്രവുമല്ല രക്തചംക്രമണവും രോഗപ്രതിരോധ സംവിധാനവും താറുമാറാകുകയും ചെയ്യും. പേശികൾ നിർമിക്കുന്നതിനും ശരീരഭാരം കുറയ്ക്കുന്നതിനും ചർമ്മത്തിന്റെയും മുടിയുടെയും ആരോഗ്യം വർധിപ്പിക്കുന്നതിനും മറ്റും പ്രോട്ടീൻ ആവശ്യമാണ്. പ്രോട്ടീൻ അമിനോ ആസിഡുകളാൽ നിർമ്മിതമാണ്.
ദൈനംദിന ഭക്ഷണത്തിൽ പ്രോട്ടീൻ ഉൾപ്പെടുത്തേണ്ടത് അത്യാവശ്യമാണ്.ഇമ്യൂൺ ഗ്ലോബുലിൻ പോലുള്ള ചില പ്രോട്ടീനുകൾ ആരോഗ്യകരമായ രോഗപ്രതിരോധ സംവിധാനത്തിന് അത്യന്താപേക്ഷിതമാണ്. അണുബാധകളെ ചെറുത്ത് ശരീരത്തെ സംരക്ഷിക്കാനും രോഗപ്രതിരോധ ശേഷി വർദ്ധിപ്പിക്കാനും സഹായിക്കും
അത്പോലെതന്നെ ശരീരത്തിൽ ഊർജ്ജ ഉദ്പാദനത്തിനും പ്രോട്ടീൻ വലിയ പങ്ക് വഹിക്കുന്നുണ്ട്. കാർബോഹൈഡ്രേറ്റുകളും കൊഴുപ്പുകളും ശരീരത്തിന്റെ പ്രാഥമിക ഊർജ്ജ സ്രോതസ്സുകളാണെങ്കിലും, മറ്റ് പോഷകങ്ങളുടെ അഭാവത്തിൽ പ്രോട്ടീനുകളാണ് ഊർജ്ജ ഉദ്പാദനത്തിന് സഹായിക്കുന്നത്.എൻസൈമുകളുടെയും ഹോർമോണുകളുടെയും ഉത്പാദനത്തിലും പ്രോട്ടീനുകൾ ആവശ്യമാണ്. എൻസൈമുകൾ ശരീരത്തിലെ രാസപ്രവർത്തനങ്ങൾ സുഗമമാക്കാനും സഹായിക്കുന്നു. അതേസമയം ഹോർമോണുകളുടെ പ്രവർത്തനം, വളർച്ച തുടങ്ങിയ നിരവധി ശാരീരിക പ്രക്രിയകളെ ഇത് നിയന്ത്രിക്കുന്നു.
പ്രോട്ടീൻ ലഭിക്കുന്ന പ്രധാന ഭക്ഷ്യ സ്രോതസ്സുകൾ
ബ്രൊക്കോളി
ബ്രൊക്കോളി പ്രോട്ടീന്‍ സമ്പുഷ്ടമായ ഒന്നാണ്. ഇതില്‍ ധാരാളം നാരുകൾ അടങ്ങിയിട്ടുണ്ട്. 100 ഗ്രാം ബ്രൊക്കോളിയില്‍ 2.8 ഗ്രാം പ്രോട്ടീനുകള്‍ അടങ്ങിയിട്ടുണ്ട്. ഒരു കപ്പ് വേവിച്ച ബ്രൊക്കോളിയില്‍ 5.7 ഗ്രാം പ്രോട്ടീനുണ്ട്. ആന്റിഓക്‌സിഡന്റുകള്‍, ഫോളേറ്റുകള്‍, പൊട്ടാസ്യം എന്നിവയെല്ലാം ബ്രൊക്കോളിയിൽ അടങ്ങിയിട്ടുണ്ട്.
കൂണ്‍
കൂണിനെ സസ്യാഹാരത്തിലെ മാംസം എന്ന് വേണമെങ്കില്‍ പറയാം. വൈറ്റ് ബട്ടന്‍ മഷ്‌റൂമില്‍ കൂടുതല്‍ പ്രോട്ടീനുകള്‍ അടങ്ങിയിരിക്കുന്നു. വേവിക്കാത്ത കൂണിനേക്കാള്‍ വേവിച്ച കൂണിലാണ് കൂടുതല്‍ പ്രോട്ടീനുള്ളത്. ഒരു കപ്പ് വേവിച്ച കൂണില്‍ 5-7 ഗ്രാം വരെ പ്രോട്ടീനുകള്‍ ഉണ്ട്. കൂണില്‍ വൈറ്റമിന്‍ ബി, സെലേനിയം, ആന്റിഓക്‌സിഡന്റുകള്‍ എന്നിവയും അടങ്ങിയിട്ടുണ്ട്.
ബദാം
യു.എസ്.ഡി.എ പ്രകാരം 100 ഗ്രാം ബദാമിൽ ഏകദേശം 21 ഗ്രാം പ്രോട്ടീൻ അടങ്ങിയിട്ടുണ്ട്. പ്രോട്ടീൻ കൂടാതെ, കൊഴുപ്പുകൾ, നാരുകൾ, വിറ്റാമിനുകൾ, ധാതുക്കൾ എന്നിവയും ബദാമിൽ അടങ്ങിയിട്ടുണ്ട്.
പനീർ
നിങ്ങൾ വെജിറ്റേറിയനോ നോൺ വെജിറ്റേറിയനോ ആകട്ടെ, ഓരോ ഇന്ത്യക്കാരന്റെയും ഭക്ഷണക്രമത്തിൽ പനീറിനുള്ള സ്ഥാനം വളരെ വലുതാണ്. പനീർ പ്രോട്ടീന്റെ കലവറ കൂടിയാണ്. ശരാശരി 100 ഗ്രാം പനീറിൽ ഏകദേശം 18 ഗ്രാം പ്രോട്ടീൻ അടങ്ങിയിട്ടുണ്ട്. കൂടാതെ, കാൽസ്യം, ഫോസ്ഫറസ്, മറ്റ് അവശ്യ പോഷകങ്ങൾ എന്നിവയും പനീറിൽ അടങ്ങിയിട്ടുണ്ട്.
ദാൽ – പരിപ്പ്
പരിപ്പിലെ പ്രോട്ടീന്റെ കൃത്യമായ അളവ് പരിപ്പിന്റെ തരത്തെയും അത് തയ്യാറാക്കുന്ന രീതിയെയും ആശ്രയിച്ച് വ്യത്യാസപ്പെടാം. എന്നിരുന്നാലും, ശരാശരി 100 ഗ്രാം വേവിച്ച പരിപ്പിൽ 4.68 ഗ്രാം പ്രോട്ടീൻ അടങ്ങിയിട്ടുണ്ട്.
സോയാബീൻ
പ്രോട്ടീൻ സമ്പുഷ്ടമായ ഒരു ഭക്ഷണമാണ് സോയാബീൻ. ഇതൊരു സസ്യാധിഷ്ഠിത പ്രോട്ടീൻ കൂടിയാണ്. പേശികലകളും മറ്റ് പ്രധാന ഘടനകളുടെയും നിർമ്മാണത്തിൽ സോയാബീൻ പ്രധാന പങ്ക് വഹിക്കുന്നു. ശരീരത്തിന് ആവശ്യമായ അമിനോ ആസിഡുകളും ഇതിൽ അടങ്ങിയിരിക്കുന്നു.
മുട്ട
ശരീരത്തിന്റെ ശരിയായ പ്രവർത്തനത്തിന് ആവശ്യമായ അമിനോ ആസിഡുകൾ അടങ്ങിയ പ്രോട്ടീന്റെ മികച്ച ഉറവിടമാണ് മുട്ട. മുട്ടയുടെ വെള്ളയിൽ പ്രോട്ടീൻ ധാരാളമായി കാണപ്പെടുന്നു. ഇത് ആൽബ്യുമൻ എന്നും അറിയപ്പെടുന്നു. മുട്ടയിലെ പ്രോട്ടീൻ ശരീരം എളുപ്പത്തിൽ ആഗിരണം ചെയ്യുകയും ഉപയോഗിക്കുകയും ചെയ്യുന്നു. ആരോഗ്യകരമായ ഭാരം നിലനിർത്താനും ആരോഗ്യം മെച്ചപ്പെടുത്താനും ഇത് സഹായിക്കുന്നു.
