അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കുട്ടികൾക്കും മുതിർന്നവർക്കും ഒരുപോലെ ഇഷ്ടമാകുന്ന ഒരു ടേസ്റ്റി പുഡ്ഡിംഗ് ഉണ്ടാക്കിയാലോ?എളുപ്പത്തിൽ രുചികരമായി തയ്യാറാക്കാവുന്ന ഒരു കിടിലൻ റെസിപ്പി.
ആവശ്യമായ ചേരുവകള്‍
- ബ്രഡ് – 2 പീസ്
- ഞാലിപ്പൂവന്‍ പഴം – 2 ചെറുത്
- പാല്‍ – 1/2 കപ്പ്
- പഞ്ചസാര- ആവശ്യത്തിന്
- ഏലക്ക
- നെയ്- 1 ടേബിള്‍ സ്പൂണ്‍
തയ്യാറാക്കുന്ന വിധം
അരക്കപ്പ് പാലില്‍ മധുരത്തിനാവശ്യമായ പഞ്ചസാര ചേര്‍ത്ത് മാറ്റി വെക്കുക. ഒന്നോ രണ്ടോ ഏലക്ക പൊടിച്ച് ഈ മിശ്രിതത്തില്‍ ചേര്‍ക്കുക. ഒരു ബ്രഡ് എടുത്ത് അതിലേക്ക് പഴം ചെറിയ കഷ്ണങ്ങളായി മുറിച്ചു വെക്കുക. സാന്‍ഡ്വിച്ചിനുള്ള ഫില്ലിംഗ് നിറക്കുന്നതു പോലെ വേണം പഴം ബ്രഡിനുള്ളില്‍ നിരത്താന്‍. അതിനു ശേഷം രണ്ടാമത്തെ ബ്രഡ് എടുത്ത് ഈ പഴം നിറച്ച ബ്രഡിന് മുകളില്‍ വെക്കുക.
ശേഷം ഒരു പാന്‍ ചൂടാക്കി അതിലേക്ക് നെയ് പുരട്ടിക്കൊടുക്കുക. ഈ പാനിലേക്ക് ബ്രഡ് വെച്ച ശേഷം രണ്ടു വശവും മറിച്ചും തിരിച്ചും ചൂടാക്കുക. ഇതിനു ശേഷം എടുത്തുവെച്ചിരിക്കുന്ന പാല്‍ മിശ്രിത അല്‍പം അല്‍പമായി ബ്രെഡിന് മുകളിലേക്ക് ഒഴിക്കുക. ബ്രഡ് തിരിച്ചും മറിച്ചും ഇട്ടും ഇതേ പ്രക്രിയ തുടരുക. ഈ പാല്‍ ബ്രഡ് വലിച്ചെടുത്ത് ഒരു പുഡ്ഡിംഗ് പരുവത്തിലാകുന്നതുവരെ ചൂടാക്കിയാല്‍ മതിയാകും. ശേഷം ബ്രഡ് ഉടയാതെ ഒരു പ്ലേറ്റിലേക്ക് മാറ്റി ഒരു സ്‌കൂപ് വാനില ഐസ് ക്രീം കൂടി ചേര്‍ത്ത് സെര്‍വ് ചെയ്യാം.
