ബന്ധുവീട്ടിലെ പടുതാക്കുളത്തില്‍ വീണ് മൂന്ന് വയസുകാരി മരിച്ചു. തിരുവനന്തപുരം കൊച്ചുള്ളുര്‍ ഗായത്രിവീട്ടില്‍ രാജേഷ് ആനന്ദ്-ആശ കവിത ദമ്പതികളുടെമകള്‍ ആരാധ്യ രാജേഷാണ് മരിച്ചത്.
തിങ്കളാഴ്ച രാവിലെ 11ഓടെ കുമാരമംഗലത്തുള്ള ആശയുടെ കുടുംബ വീടായ സന്തോഷ് വില്ലയിലായിരുന്നു അപകടം. വീട്ടിനുള്ളില്‍ കളിക്കുന്നതിനിടെ കാണാതായതിനെ തുടര്‍ന്ന് നടത്തിയ തിരച്ചിലിലാണ് ആരാധ്യ സമീപത്തെ മീന്‍ വളര്‍ത്തുന്ന പടുതാ കുളത്തില്‍ മുങ്ങിത്താഴുന്നത് കണ്ടത്.
തുടര്‍ന്ന് ആശയുടെ സഹോദരന്‍ സന്തോഷ് ഉടന്‍ വെള്ളത്തിലിറങ്ങി കുട്ടിയെ പുറത്തെടുത്ത് തൊടുപുഴയിലെ സ്വകാര്യ ആശുപത്രിയിലെത്തിച്ചു. തീവ്രപരിചരണ വിഭാഗത്തില്‍ പ്രവേശിപ്പിച്ചെങ്കിലും വൈകിട്ടോടെ മരിക്കുകയായിരുന്നു. മൃതദേഹം കുമാരമംഗലത്തെ വീട്ടുവളപ്പില്‍ സംസ്‌കരിച്ചു.