അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
പശ്ചിമ ബംഗാൾ മുഖ്യമന്ത്രി മമത ബാനർജിയും കേന്ദ്ര ആഭ്യന്തര മന്ത്രി അമിത്ഷായും തമ്മിലുള്ള പോര് പുതുതല്ല. എന്നാ‍ൽ ഇപ്പോൾ കേന്ദ്ര ആഭ്യന്തര മന്ത്രിയ്ക്കും ബിഎസ്എഫിനുമെതിരെ നേരിട്ടെത്തിയിരിക്കുകയാണ് ബംഗാളിന്റെ ദീദി. വഖഫ് നിയമത്തെച്ചൊല്ലി ബംഗാളിൽ നടക്കുന്ന അക്രമം ഗൂഢാലോചനയാണെന്ന് ആരോപിച്ചിരിക്കുകയാണ് മമത. ബംഗ്ലാദേശി അക്രമികളെ സംസ്ഥാനത്ത് പ്രവേശിക്കാൻ അനുവദിക്കുന്നതിനായി കേന്ദ്ര ആഭ്യന്തര മന്ത്രി അമിത് ഷായും ബിഎസ്എഫും ഗൂഢാലോചന നടത്തിയെന്നാണ് ആരോപണം.കൊൽക്കത്തയിൽ മുസ്ലീം പുരോഹിതന്മാരുമായി നടത്തിയ കൂടിക്കാഴ്ചയിലായിരുന്നു പ്രസ്ഥാവന.പ്രധാനമന്ത്രിയോട് ഞാൻ അഭ്യർത്ഥിക്കുന്നു. അദ്ദേഹം ആഭ്യന്തരമന്ത്രിയെ (അമിത് ഷാ) നിയന്ത്രിക്കണം. അദ്ദേഹം എല്ലാ ഏജൻസികളെയും ഉപയോഗിച്ച് നമുക്കെതിരെ ഗൂഢാലോചന നടത്തുകയാണ്. മോദി ജി ഇല്ലാതിരിക്കുമ്പോൾ എന്ത് സംഭവിക്കും?” മമത പറഞ്ഞു.
പ്രധാനമന്ത്രി നരേന്ദ്ര മോദിയോട് മൃദുസമീപനം സ്വീകരിക്കുമ്പോൾ തന്നെ അമിത് ഷായ്‌ക്കെതിരെ മമത നിലപാട് സ്വീകരിക്കുന്നത് ഇതാദ്യമല്ല. 2022 ൽ, സിബിഐയും ഇഡിയും ആഭ്യന്തര മന്ത്രാലയത്തിന് കീഴിലായതിനാൽ, അന്വേഷണ ഏജൻസികളുടെ ദുരുപയോഗത്തിന് പിന്നിൽ പ്രധാനമന്ത്രിയാണെന്ന് താൻ വിശ്വസിക്കുന്നില്ലെന്ന് മമത പറഞ്ഞു.
വഖഫ് നിയമം പാസാക്കുന്നതിനെതിരായ പ്രതിഷേധത്തിനിടെ ബംഗാളിലെ മുർഷിദാബാദ്, സൗത്ത് 24 പർഗാനാസ് ജില്ലകളിൽ വ്യാപകമായ അക്രമത്തിന് സാക്ഷ്യം വഹിച്ചു. സംഷേർഗഞ്ചിൽ ഒരു ജനക്കൂട്ടം വെട്ടിക്കൊലപ്പെടുത്തിയ അച്ഛനും മകനും ഉൾപ്പെടെയുള്ളവർ മരിച്ചവരിൽ ഉൾപ്പെടുന്നു.
കലാപത്തെക്കുറിച്ചുള്ള പ്രാഥമിക അന്വേഷണത്തിൽ ബംഗ്ലാദേശി അക്രമികൾക്ക് പങ്കുണ്ടെന്ന് കണ്ടെത്തിയതായി കേന്ദ്ര ആഭ്യന്തര മന്ത്രാലയത്തിന് അയച്ച റിപ്പോർട്ടിൽ പറയുന്നു. ബംഗ്ലാദേശുമായി അതിർത്തി പങ്കിടുന്ന ജില്ലകളാണ് അക്രമം പൊട്ടിപ്പുറപ്പെട്ടത്.
ബംഗാൾ അതിർത്തിയോട് ചേർന്നുള്ള 2,200 കിലോമീറ്റർ നീളമുള്ള ബംഗ്ലാദേശ് അതിർത്തി കാക്കുന്ന ബിഎസ്‌എഫാണ് അയൽരാജ്യത്ത് നിന്നുള്ള അക്രമികളെ അകത്തുകടത്താൻ അനുവദിച്ചതിന് ഉത്തരവാദികളെന്ന് മമത ആരോപിച്ചു.
“ബംഗാളിൽ കലാപം സൃഷ്ടിക്കാൻ പുറത്തുനിന്നുള്ള ആളുകളെ കൊണ്ടുവരാൻ കേന്ദ്ര ഏജൻസികളെ ഉപയോഗിക്കാനാണോ നിങ്ങളുടെ പദ്ധതി? എന്തുകൊണ്ടാണ് ബിഎസ്എഫ് ഇത്തരമൊരു പ്രതിസന്ധി ഒഴിവാക്കാത്തത്?” എന്നായിരുന്നു മമതയുടെ ചോദ്യം
വഖഫ് നിയമ ഭേദഗതി തനിക്ക് അനുകൂലമാക്കനുള്ള നീക്കത്തിലാണ് മമത ബാനർജി.വഖഫ് നിയമത്തിനെതിരായ പോരാട്ടത്തിൽ തന്റെ പാർട്ടി മുൻപന്തിയിലാണെന്ന് തൃണമൂൽ കോൺഗ്രസ് മേധാവി പ്രതിഷേധക്കാർക്ക് ഉറപ്പ് നൽകിയിട്ടുണ്ട്. സമാധാനപരമായ പ്രതിഷേധങ്ങളിൽ ഏർപ്പെടാൻ അവരെ പ്രേരിപ്പിക്കുകയും ചെയ്യുന്നതിലൂടെ ജനസമ്മതിയാണ് ലക്ഷ്യം
