ഉച്ചയ്ക്ക് ചോറിന് ഒരുഗ്രൻ ചമ്മന്തി കൂടെ ആയാലോ?

ഉച്ചയ്ക്ക് ചോറിന് ഒരുഗ്രൻ ചമ്മന്തി കൂടെ ആയാലോ? എളുപ്പത്തിൽ തയ്യാറാക്കാവുന്ന ഒരു റെസിപ്പി.

ആവശ്യമായ ചേരുവകള്‍

• വറ്റല്‍ മുളക്
• ചെറിയ ഉള്ളി
• കറിവേപ്പില
• കാന്താരി മുളക്
• വെളുത്തുള്ളി
• വെളിച്ചെണ്ണ
• ഉപ്പ്
• പുളിവെള്ളം
• ശര്‍ക്കര

തയ്യാറാക്കുന്ന വിധം

ഈയൊരു ചമ്മന്തി തയ്യാറാക്കാനായി ആവശ്യമായിട്ടുള്ള പ്രധാന ചേരുവകള്‍ വറ്റല്‍ മുളക് 4 മുതല്‍ 5 എണ്ണം വരെ, ചെറിയ ഉള്ളി 20 എണ്ണം തോല് കളഞ്ഞു വൃത്തിയാക്കി എടുത്തത്, കറിവേപ്പില ഒരു തണ്ട്, കാന്താരി മുളക് മൂന്നെണ്ണം, വെളുത്തുള്ളിയുടെ അല്ലി രണ്ടെണ്ണം, വെളിച്ചെണ്ണ, ഉപ്പ്, പുളിവെള്ളം, ശര്‍ക്കര ഇത്രയും സാധനങ്ങളാണ്. ആദ്യം തന്നെ ഒരു പാന്‍ അടുപ്പത്ത് വെച്ച് ചൂടായി വരുമ്പോള്‍ അതിലേക്ക് അല്പം വെളിച്ചെണ്ണ ഒഴിച്ച് കൊടുക്കുക. എണ്ണ ചൂടായി തുടങ്ങുമ്പോള്‍ ഉണക്കമുളക് ഇട്ട് വറുത്തെടുത്തു മാറ്റി വയ്ക്കുക.

ശേഷം ചെറിയ ഉള്ളിയും വെളുത്തുള്ളിയും ഒന്ന് എണ്ണയിലിട്ട് വഴറ്റി മാറ്റി വയ്ക്കാവുന്നതാണ്. ഇവയുടെ എല്ലാം ചൂട് മാറി തുടങ്ങുമ്പോള്‍ ഒരു ഇടികല്ലെടുത്ത് അതിലേക്ക് ഉണക്കമുളകും ഉള്ളിയും ഇട്ട് നല്ല രീതിയില്‍ ചതച്ചെടുക്കുക. അത് എടുത്തു മാറ്റിയശേഷം അതേ കല്ലിലേക്ക് കറിവേപ്പിലയും കാന്താരി മുളകും ഇട്ട് ചതച്ചെടുക്കുക. ചതച്ചെടുത്ത എല്ലാ കൂട്ടുകളും ഒരു പാത്രത്തിലേക്ക് ഇട്ട് ഒന്ന് മിക്‌സ് ചെയ്യുക. ശേഷം അതിലേക്ക് ആവശ്യത്തിന് ഉപ്പും പുളി വെള്ളവും ഒഴിച്ച് ഒന്ന് മിക്‌സ് ചെയ്ത് എടുക്കണം. അവസാനമായി ശര്‍ക്കര ചീകിയത് കൂടി അല്പം ചേര്‍ത്ത് മിക്‌സ് ചെയ്ത ശേഷം ചൂട് ചോറിനൊപ്പം സെര്‍വ് ചെയ്യാവുന്നതാണ്.