അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.റിലയന്‍സ് ഇന്‍ഡസ്ട്രീസിന്റെ മുഴുവന്‍ സമയ ഡയറക്ടറായി അനന്ത് അംബാനിയെ നിയമിച്ചിരിക്കുകയാണ്. റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനിയുടെ ഇളയ മകനാണ് അനന്ത് അംബാനി. മേയ് ഒന്നിനാണ് അദ്ദേഹം കമ്പനിയുടെ മുഴുവന്‍ സമയ ഡയറക്ടറായി ചുമതലയേല്‍ക്കുക.മുകേഷ് അംബാനിയുടെ മറ്റ് രണ്ട് മക്കളായ ഇഷ അംബാനി, ആകാശ് അംബാനി എന്നിവരെ ‘മറികടന്നാണ്’ ആനന്ദ് അംബാനിക്ക് സുപ്രധാന സ്ഥാനം ലഭിച്ചിരിക്കുന്നത്.അഞ്ച് വര്‍ഷത്തേക്കാണ് അനന്ത് അംബാനിയുടെ നിയമനം.
റിലയൻസിന്റെ തലമുറ മാറ്റത്തിന്റെ ഭാഗമായിട്ടാണ് ഇത്തരം തീരുമാനങ്ങളെന്ന് വിലയിരുത്തപ്പെടുന്നു. ഇതു വരെ റിലയൻസ് ഇൻഡസ്ട്രീസിന്റെ നോൺ എക്സിക്യൂട്ടീവ് ഡയറക്ടറായിരുന്നു ആനന്ദ് അംബാനി. നിലവിൽ അദ്ദേഹത്തിന് എക്സിക്യൂട്ടീവ് അധികാരങ്ങൾ കൂടി ലഭിക്കുകയാണ്.
റിലയൻസിന്റെ സുസ്ഥിര ഊര‍്ജ്ജ ബിസിനസുമായി ബന്ധപ്പെട്ടാണ് ആനന്ദ് അംബാനി പ്രവർത്തിച്ചിരുന്നത്. അടുത്ത 10 വർഷത്തിനുള്ളിൽ കാർബൺ രഹിത കമ്പനിയായി മാറാൻ റിലയൻസിന് പദ്ധതിയുണ്ട്. ഹരിതോർജ്ജം, അനുബന്ധ ഘടകങ്ങൾ എന്നിവയുടെ പ്രൊഡക്ഷൻ വർധിപ്പിക്കു വഴി ഇത് നേടാനാണ് ശ്രമിക്കുന്നത്. ഈ നിർണായക ചുവടുവെയ്പിൽ ആനന്ദ് അംബാനിക്ക് വലിയ ചുമതലകൾ നൽകിയിരിക്കുന്നു.
2020 മാർച്ച് മുതൽ ജിയോ പ്ലാറ്റ്ഫോംസിന്റെ ബോർഡിൽ ആനന്ദ് അംബാനി അംഗമാണ്. 2021 ജൂൺ മുതൽ റിലയൻസ് ന്യൂ എനർജി ലിമിറ്റഡ്, റിലയൻസ് ന്യൂ സോളാർ എനർജി ലിമിറ്റഡ് എന്നീ കമ്പനികളുടേയും, 2022 മുതൽ റിലയൻസ് റീടെയിൽ വെഞ്ച്വേഴ്സിന്റെയും, റിലയൻസ് ഫൗണ്ടേഷന്റേയും ബോർഡുകളിൽ അദ്ദേഹം അംഗമാണ്.
2023ൽ ആനന്ദ് അംബാനിയെ റിലയൻസ് ഇൻഡസ്ട്രീസ് ബോർഡിൽ അംഗമാക്കിയതിനെതിരെ Institutional Investor Advisory Services (IiAS) പരാതി ഉന്നയിച്ചിരുന്നു. തങ്ങളുടെ ആഭ്യന്തര വോട്ടിങ് നയങ്ങൾ പ്രകാരം 28 വയസ്സ് മാത്രമുള്ള ആനന്ദ് അംബാനിയുടെ പ്രായമാണ് തടസ്സമായി ഉന്നയിച്ചത്. ഇത് കൂടാതെ യു.എസ് ആസ്ഥാനമായ ഇൻസ്റ്റിറ്റ്യൂഷണൽ ഷെയർ ഹോൾഡർ സർവീസസ് ആനന്ദ് അംബാനിയുടെ കേവലം 6 വർഷം മാത്രമുള്ള പ്രവൃത്തി പരിചയം സംബന്ധിച്ച് ആശങ്ക ഉന്നയിച്ചിരുന്നതായും ബ്ലൂംബർഗ് റിപ്പോർട്ട് ചെയ്തിരുന്നു. എന്നാൽ റിലയൻസ് ബോർഡ് ആനന്ദ് അംബാനിയുടെ നേതൃത്ത്വത്തിൽ ആത്മവിശ്വാസം പ്രകടിപ്പിക്കുകയായിരുന്നു.
റിലയൻസ് എന്ന ബിസിനസ് സാമ്രാജ്യത്തിലെ പല കമ്പനികളുടെയും ചുമതലകൾ തന്റെ മൂന്ന് മക്കൾക്കുമായി അംബാനി വീതിച്ചു നൽകിയിരുന്നു. ആകാശ് അംബാനിയെ ജിയോ ഇൻഫോകോമിന്റെ മേധാവിയായി നിയോഗിച്ചപ്പോൾ, ഇഷ അംബാനിക്ക് റിലയൻസ് റീടെയിലിന്റെ ചുമതലയാണ് നൽകിയത്. റിലയൻസ് ഇൻഡസ്ട്രീസിന്റെ പൂർണമായ ചുമതല ആർക്ക്, എങ്ങനെ, എപ്പോൾ കൈമാറും എന്ന കാര്യത്തിലൊന്നും വ്യക്തതയില്ല. കമ്പനിയുടെ ചുമതലകൾ ഭാഗിച്ചു നൽകാനും സാധ്യതകളുണ്ട്. എങ്കിലും നിലവിൽ ആനന്ദ് അംബാനിക്ക് ഉയർന്ന ചുമതല നൽകിയതോടെ ഭാവിയിലും റിലയൻസ് ഇൻഡസ്ട്രീസിൽ അദ്ദേഹത്തിന് സുപ്രധാന പങ്കുണ്ടായിരിക്കുമെന്നാണ് വിലയിരുത്തൽ.
മുകേഷ് അംബാനി, തന്റെ പിതാവായ ധീരുഭായ് അംബാനിയുമായി ആനന്ദിനെ താരതമ്യപ്പെടുത്തിയിരുന്നു. കഴിഞ്ഞ വർഷം നടന്ന ആനന്ദ് അംബാനിയുടെ വിവാഹച്ചടങ്ങിനിടെയായിരുന്നു അദ്ദേഹം ഇങ്ങനെ പറഞ്ഞത്. ആനന്ദിൽ താൻ വലിയ സാധ്യതകൾ കാണുന്നു. എപ്പോഴൊക്കെ ആനന്ദിനെ കാണുന്നുവോ അപ്പോഴൊക്കെ പിതാവായ ധീരുഭായിയെ ആനന്ദിലൂടെ കാണുന്നു. ‘ഒന്നും അസാദ്ധ്യമല്ല’ എന്ന ധീരുഭായ് അംബാനിയുടെ മനോഭാവമാണ് ആനന്ദ് അംബാനിക്കുള്ളതെന്നും അദ്ദേഹം പറഞ്ഞിരുന്നു.
