അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മീൻ വിഭവങ്ങൾക്ക് ഒരു പ്രത്യേക ഫാൻ ബേസ് തന്നെയുണ്ട് കേരളത്തിൽ. പക്ഷേ പല മീനുകളും വൃത്തിയാക്കി എടുക്കുന്നതാണ് കഷ്ടം. വീട്ടിലേക്ക് ചെറിയ മീനാണ് അച്ഛൻ വാങ്ങിച്ചു കൊണ്ടുവരുന്നതെങ്കിൽ അന്നത്തെ ദിവസം അമ്മയുടെ വക ഒരു വഴക്ക് പതിവായിരിക്കും. കാരണം അത് വെട്ടിയെടുക്കുന്നത് വലിയ ടാസ്ക്ക് തന്നെയാണ്. കരിമീൻ പോലുള്ളവ വൃത്തിയാക്കി എടുക്കാനും പാടാണ്.
എന്നാൽ ചില പൊടികൈകൾ അറിഞ്ഞിരുന്നാൽ മീൻ വൃത്തിയാക്കാൻ ഉപകാരപ്പെടും. ഇനി കരിമീനും ആറ്റുമീനുമൊക്കെ വാങ്ങിയാൽ അധികം സമയം കളയാതെ പെട്ടെന്ന് വൃത്തിയാക്കാൻ എളുപ്പവഴിയുണ്ട്. കരിമീൻ മാത്രമല്ല മഞ്ഞ കൂരിയും ഇങ്ങനെ എളുപ്പത്തിൽ വൃത്തിയാക്കാവുന്നതാണ്.
വഴുവഴുപ്പുള്ള ഈ മീനുകൾ ശരിയായ രീതിയിൽ കത്തികൊണ്ട് മുറിക്കാനും പുറംഭാഗം തേച്ചെടുക്കാനും പാടാണ്. ഇനി ടെൻഷൻ വേണ്ട, വളരെ പെട്ടെന്ന് തന്നെ കൂരി നല്ലതുപോലെ വെട്ടിക്കഴുകി എടുക്കാം. കല്ലിൽ തേച്ചെടുക്കാതെ തന്നെ തൂവെള്ള നിറത്തിൽ വൃത്തിയാക്കുകയും ചെയ്യാം. ഈ ട്രിക്ക് പരീക്ഷിക്കാവുന്നതാണ്.
ആദ്യം പാത്രത്തിൽ വെള്ളം എടുക്കാം. അതിലേക്ക് 6 കഷ്ണം കുടംപുളി ചേർത്ത് നന്നായി മിക്സ് ചെയ്യണം. ശേഷം ഗ്യാസിൽ വച്ച് ചൂടാക്കണം. ചൂടുകൂടിപോകാതെ ശ്രദ്ധിക്കണം. ചട്ടിയിൽ എടുത്തു വച്ചിരിക്കുന്ന മീനിലേക്ക് ഈ പുളിവെള്ളം ചെറു ചൂടോടെ ഒഴിക്കണം. ചൂടുകൂടിയാൽ മീൻ വെന്തുപോകും. മീൻ മുങ്ങി കിടക്കുന്നിടത്തോളം വെള്ളം വേണം. 10 മിനിറ്റ് നേരം വയ്ക്കണം. ശേഷം കത്രിക കൊണ്ട് മീനിന്റെ വശങ്ങളും വാലും കളയണം. സ്ക്രബർ കൊണ്ട് മീൻ ഉരച്ചെടുക്കാം. കൂടാതെ കത്തി ഉപയോഗിച്ച് വാലിന്റെ ഭാഗത്ത് നിന്നും മുകളിലേക്ക് ചെത്തിയാലും മതി മിനിറ്റുകൾ കൊണ്ട് മീൻ വൃത്തിയാക്കി എടുക്കാം.
CONTENT Highlight: How to clean fish
