ഒരുമാസത്തിനിടെ രണ്ട് കിടിലൻ ഹിറ്റുമായി മോഹൻലാൽ വീണ്ടും ഫോമിലെത്തിയിരിക്കുകയാണ്. എമ്പുരാൻ വിവാദങ്ങൾക്കിടയിലും കോടികൾ കൊയ്ത്കൊണ്ടിരിക്കുമ്പോൾ തന്നെ തുടരുമിലെ ഷൺമുഖനായി മോഹൻലാൽ വീണ്ടുമെത്തി. വെറും ആറ് ദിവസം കൊണ്ടാണ് ചിത്രം 100 കോടി ക്ലബ്ബില്‍ ഇടം പിടിച്ചത്. ഫാമിലി ഓഡിയന്‍സ് ഏറ്റെടുത്തതും അവധിക്കാലം ആയതിനാലും ചിത്രത്തിന്‍റെ ഫൈനല്‍ ഗ്രോസ് എത്രയെന്നത് പ്രവചിക്കാന്‍ ആവാത്ത സ്ഥിതിയാണ് നിലവില്‍. മോഹന്‍ലാലിന്‍റേതായി നിലവില്‍ ചിത്രീകരണം പുരോഗമിക്കുന്ന സിനിമ സത്യന്‍ അന്തിക്കാടിന്‍റെ സംവിധാനത്തില്‍ ഒരുങ്ങുന്ന ഹൃദയപൂര്‍വ്വം ആണെങ്കിലും അടുത്തതായി തിയറ്ററുകളിലെത്തുന്ന മോഹന്‍ലാല്‍ ചിത്രം അതല്ല, മറിച്ച് ഒരു റീ റിലീസ് ആണ്.
മോഹന്‍ലാലിനെ നായകനാക്കി അന്‍വര്‍ റഷീദ് സംവിധാനം ചെയ്ത ഛോട്ടാ മുംബൈ എന്ന ചിത്രമാണ് റീ റിലീസിന് ഒരുങ്ങുന്നത്. ബെന്നി പി നായരമ്പലത്തിന്‍റെ രചനയില്‍ 2007 ല്‍ പ്രദര്‍ശനത്തിനെത്തിയ ചിത്രം ആക്ഷന്‍ കോമഡി ഗണത്തില്‍ പെടുന്ന ഒന്നാണ്. അന്‍വര്‍ റഷീദും മോഹന്‍ലാലും ഒരുമിച്ച ഒരേയൊരു ചിത്രം റിലീസ് സമയത്തും പില്‍ക്കാലത്തും ലാല്‍ ആരാധകര്‍ ആഘോഷിച്ച ഒന്നാണ്. ഇന്നും ചിത്രത്തിന്‍റെ പ്രത്യേക പ്രദര്‍ശനങ്ങള്‍ പലയിടത്തും സംഘടിപ്പിക്കാറുണ്ട്. ചിത്രം റീ റിലീസ് ചെയ്യണമെന്ന ആവശ്യം ഏറെക്കാലമായി ആരാധകര്‍ സോഷ്യല്‍ മീഡിയയിലൂടെ പങ്കുവെക്കാറുമുണ്ട്. അതാണിപ്പോൾ യാഥാർത്ഥ്യമാകുന്നത്. ചിത്രത്തിന്‍റെ റീ റിലീസ് തീയതിയെക്കുറിച്ച് കഴിഞ്ഞ കുറച്ചു നാളുകളായി റിപ്പോര്‍ട്ടുകള്‍ പുറത്തെത്തുന്നുണ്ട്. ഏതാനും ദിവസം മുന്‍പ് ചിത്രത്തിന്‍റ നിര്‍മ്മാതാവും നടനുമായ മണിയന്‍പിള്ള രാജു ദിവസം കണ്‍ഫേം ചെയ്തിട്ടുമുണ്ട്. മോഹന്‍ലാലിന്‍റെ പിറന്നാള്‍ ദിനമായ മെയ് 21 ന് ചിത്രം തിയറ്ററുകളില്‍ എത്തിക്കുമെന്നാണ് അദ്ദേഹം പ്രതികരിച്ചത്. ഡോള്‍ബി അറ്റ്‍മോസ് ശബ്ദ സംവിധാനവുമായി ആവും ചിത്രം തിയറ്ററുകളിലേക്ക് വീണ്ടും എത്തുക.