പോളിസി ഉടമകള്‍ക്ക് വാട്‌സ്ആപ്പിലൂടെ തന്നെ പ്രീമിയം അടയ്ക്കാനുള്ള സൗകര്യം ഒരുക്കിയിരിക്കുകയാണ് എല്‍ഐസി. പലപ്പോഴും ആളുകള്‍ തിരക്കുകള്‍ക്കിടിയില്‍ എല്‍ഐസി പ്രീമിയങ്ങള്‍ വിട്ടുപോകാറുണ്ട്. സമയത്ത് പ്രീമിയം അടച്ചില്ലെങ്കില്‍ പോളിസികള്‍ പ്രവര്‍ത്തനരഹിതമാകുമെന്നു നിങ്ങള്‍ക്ക് അറിയാമല്ലോ? എല്‍ഐസി സൈറ്റില്‍ കയറിയോ, ശാഖകള്‍ സന്ദര്‍ശിച്ചോ പ്രീമിയം അടയ്ക്കാനുള്ള ബുദ്ധിമുട്ട് പലപ്പോഴും ഉപയോക്താക്കള്‍ പറയുന്നു. ഇതിനൊരുപരിഹാരം കൂടിയാണ് എല്‍ഐസിയുടെ പുതിയ ചുവടുവയ്പ്പ.
വാട്‌സ്ആപ്പ് പ്രീമിയം പേയ്‌മെന്റ് സേവനങ്ങള്‍ക്കായി എല്‍ഐസി ‘8976862090’ എന്ന ഒരു നമ്പര്‍ ആക്ടീവ് ആക്കിയിട്ടുണ്ട്. ഈ നമ്പറിലേയ്ക്ക് നിങ്ങള്‍ പോളിസിയില്‍ രജിസ്റ്റര്‍ ചെയ്ത നമ്പറില്‍ നിന്ന് ഒരു വാട്‌സ്ആപ്പ് മെസേജ് അയക്കുക. ഇതോടെ നിങ്ങളുടെ പോളിസിയും, പേയ്‌മെന്റ് വിവരങ്ങളും ലഭ്യമാകും. കൂടെ യുപിഐ വഴി പണം അടയ്ക്കുന്നതിനുള്ള ഒരു മാര്‍ഗവും തുറക്കും. ഈ ഓപ്ഷന്‍ എല്‍ഐസി ഉപഭോക്താക്കള്‍ക്ക് പ്രീമിയം ഓണ്‍ലൈനായി അടയ്ക്കാന്‍ സഹായിക്കും.
8976862090 എന്ന നമ്പറില്‍ നിങ്ങളുടെ നമ്പറില്‍ നിന്ന് ‘Hi’ എന്നാണ് അയയ്‌ക്കേണ്ടത്. ഇതോടെ എല്‍ഐസി ബോട്ട് ആക്ടീവ് ആകും. തുടര്‍ന്ന് ലഭ്യമായ ഓപ്ഷനുകള്‍ നിങ്ങള്‍ക്കു മുന്നില്‍ പ്രത്യക്ഷപ്പെടും. ഇതില്‍ നിന്ന് നിങ്ങള്‍ക്ക് ആവശ്യമായ ഓപ്ഷന്‍ ലഭിക്കും. പേയ്‌മെന്റ് ഓപ്ഷന്‍ തെരഞ്ഞെടുത്ത ശേഷം പോളിസി നമ്പര്‍ നല്‍കണം. ഇതോടെ നിങ്ങളുടെ പ്രീമിയം തുകയും നികുതിയും കാണാന്‍ സാധിക്കും. കൂടെ ലഭിക്കുന്ന ലിങ്ക് വഴി പേയ്‌മെന്റ് പൂര്‍ത്തിയാക്കാം.
പേയ്‌മെന്റ് പൂര്‍ത്തിയായ സന്ദേശം നിങ്ങളുടെ രജിസ്‌ട്രേഡ് നമ്പറിലും, ഇ- മെയിലിലും ലഭിക്കും. പോളിസി പ്രീമിയം പേയ്‌മെന്റുകള്‍ക്കു പുറമേ പ്രീമിയം കുടിശിക, ബോണസ് വിവരങ്ങള്‍, പോളിസി സ്റ്റാറ്റസ്, ലോണ്‍ യോഗ്യത ക്വട്ടേഷന്‍, ലോണ്‍ തിരിച്ചടവ് ക്വട്ടേഷന്‍, ലോണ്‍ പലിശ കുടിശിക, പ്രീമിയം അടച്ച സര്‍ട്ടിഫിക്കറ്റ്, ULIP – യൂണിറ്റുകളുടെ സ്റ്റേറ്റ്‌മെന്റ്, എല്‍ഐസി സേവന ലിങ്കുകള്‍, സേവനങ്ങള്‍ തെരഞ്ഞെടുക്കല്‍/ ഒഴിവാക്കല്‍ സേവനങ്ങള്‍ക്കും വാട്‌സ്ആപ്പ് ബോട്ട് ഉപയോഗിക്കാവുന്നതാണ്.